شربتنه الدنيه هاي اشكال ظيم
شربتنه الدنيه هاي اشكال ظيم
وكاس مر مكاسر بطعم الصبر
موته عشنه بس فرقنه ويه اليموت
احنه عشنه ابيت بس هوه بكبر
الله يشهد بيض خالقنه بديه
مدري ليش الدنيه سوتنه سُمُر
الوكت نظحكله ونرد فد مستحين
منه ما شفنه بس عيونه الحمر
فعل ماظي احلامنه انحققها ليش
وغير ناس احلامها ابفعل الامر
الفقير ايعيش بس خاطر يموت
بس جفن وتراب ياخذ مل عمر
والغني ياخذ وياه شكم فقير
حتى مايستغرب بيوم الحشر
بعنه كلشي لجن عزينه الظمير
والغير يركض لو سمع كلمة سعر
الدنيه طف وصعبه علصاحب امام
يلكه كل الناس صارتله الشمر
ناس مخلوقه لأجل تلكه النعيم
وناس مخلوقه لأجل بس تنتظر
...محمدالصادق...
رد مع اقتباس
