غلطة كانت
فيها عجلت برحيلك
غلطة يوم خدعوك
طاوعت صحابك
عنى صديت أوصدت بابك
غلطة يوم اخترت تبعد
وانت فاكر فى بعادك
مر عذابى وكل شقايا
وفى صدودك تفنى
احلامى ومنايا
غلطة كان يوم قلت ليك
انت أفراحى وهنايا
وانت سيد روحى
وانت شريانى ودمايا
غلطة كان فيك اشعلت
وهج الغرور
وبديت تراوق ومات فى قلبك
اجمل الاحساس وفيك مات
انبل شعور
كنت بترجاك كتير
وديمه اوجد ليك عذر
اقول ياقلبى سامح
لسه ما عرف الهوى
ولسه فى عمر الريد صغير
بكرة يكبر بكره يتعلم كتير
بكره تزهر زهور الريد
رياض الفه ومحنة
تنضح شذى وتنضح عبير
غلطة كانت منى
وغلطة كانت منك إنت
ما كان هواى يطرق لبابك
وانت تجهل معنى الغرام
وانت تجهل فى دنيا الريد كتير
قدر مكتوب وكان لابد
يجمع والفراق يبقى المصير
ومرت سنين كل واحد فى سبيل
ما عدنا نتذكر ومات فينا الحنين
والليلة بس جمعتنا صدفه
ولمحت فى عينيك ندم
فاضت دموع
تحكى بى حرقة والم
تحكى كيف جارت عليك
بعدى السنين
أظلمت دنياك
والحسرة باتت ليك طعم
عرفت كيف الهم
عرفت ويلات الانين
ما خلاص اصبحنا
فى هوج الرياح
ما بتفيد كلمة ندم
لا لا ما تفتح جراح
طوانا ليل داجى وطويل
ما بيطلع تانى لى لقيانا
من بعده الصباح
هون عليك
بكره تلتئم الجراح
وينبت الريش من جديد
بعد الكسر لا بد ينجبر الجناح
بقلمى/ ود جبريل
رد مع اقتباس
المشاركة الأصلية كتبت بواسطة Gogo alkordea
