أنه الونيت والونه جبيره!
اخر مساجلاتي مع الاستاذ حسين الساعدي
؛؛؛؛؛؛؛؛؛؛؛؛؛؛؛
أنه الونيت والونه جبيره
أنه الونيت
بيدك صوبت كلبي وجرحته
متقصد تجرحه و ما رحمته
وجتالي صرت يمعود انته
وجتالي صرت يمعود انته
حضر فصلك وجيب العشيره
وأنه الونيت والونه جبيره
أنه الونيت
ااالساعدي
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
نصحتك وانته ماخذت النصيحه
اجيت وعاينت عيني الوكيحه
وروحك بلدرب طاحت جريحه
وروحك بلدرب طاحت جريحه
عفتها اتروح ياروحك أسيره
وأنه الونيت والونه جبيره
أنه الونيت
مريم
؛؛؛؛؛؛؛؛؛؛؛؛؛؛؛؛؛؛؛؛؛؛؛
شفتج بلحديقه إوكلت ورده
ما أدري الورد هيج ايتعده
شميته وصفت هالشمه شده
شميته وصفت هالشمه شده
شميته ودخت والحيره حيره
وأنه الونيت والونه جبيره
أنه الونيت
ااالساعدي
؛؛؛؛؛؛؛؛؛؛؛؛؛؛؛؛
والشم الورد لازم يطلبه
يل ظنيت هاي الشمه لعبه
لازم تفتهم معنه المحبه
لازم تفتهم معنه المحبه
وجهك غاد عني لا تديره
وأنه الونيت والونه جبيره
أنه الونيت
مريم
؛؛؛؛؛؛؛؛؛؛؛؛؛؛؛؛؛؛
ياورد البعد ما بيه اعوفك
كون إمن الصبح باجر وَشوفك
وموتن كون ما تسمح ضروفك
وَموتن كون ما تسمح ضروفك
خبر عاجل تسمعه اعله الجزيره
وأنه الونيت والونه جبيره
أنه الونيت
ااالساعدي
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛
علامك مستعد للشر علامك
كاسر خاطري ابعبرة كلامك
صفي النيه يحسين ابغرامك
صَفي النيه يحسين ابغرامك
بلورده التشمهه ابهل ضفيره
وأنه الونيت والونه جبيره
أنه الونيت
مريم
؛؛؛؛؛؛؛؛؛؛؛؛؛؛؛؛؛؛؛؛؛؛؛
وبحب الزغيره اشورطاني
عمر تسعين عده وشايب اني
يم الورد ما أدري اشخذاني
يم الورد ما أدري اشخذاني
ويشل الحال ياعشك الزغيره
وأنه الونيت والونه جبيره
أنه الونيت
ااالساعدي
؛؛؛؛؛؛؛؛؛؛؛؛؛؛؛؛؛؛؛؛؛؛؛
أرجعك شاب ونته ابعز شبابك
وَصيرلك كمر يضوي اعله بابك
وأضحكك حيل وتودع عذابك
وَضحكك حيل وتودع عذابك
مثل تلميذ وتنجحه المديره
وأنه الونيت والونه جبيره
أنه الونيت
مريم
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛
الى اللقاء في مساجلات قادمه مع اجمل التحايا
رد مع اقتباس
المشاركة الأصلية كتبت بواسطة abas satar
