مو ذنب الشعر لومايحركك بيت ***بس ذنب اليكتبة وشايل احساسة
ولاذنب الضحك وبكلبه طعنة موت***وبعين الشماتة تموت حراسة
عاين عالشجر مجبور يهوة النار***لان خاصرتة بيهة استوطنت فاسة
ومن بعد الجمر يتمنة روحة رماد***يخاف من الغشيم بمشية لو داسة
مو كل تاج صدك يكعد اعلة الروس***ولا كلمن يصير التاج مقياسة
اكو راسه عدل والخله من التاج***واكو تاجه عدل والخله من راسة
على صهوة جوادة مبين الخيال***ومن شمرة عنانة بجفة لو جاسة
امشي اعلة الاثر بس اعبر العثرات***وادوس بكل مكان الغير ماداسة
اذا ما الك بصمة اتجنب التاريخ***شلك بالجدال ودوخة صياحة
هذا النهر يمك مو كلت سباح***بعدك عالجرف عبرت السباحة
لتلوم الورد لو خاصم البستان***بستانك سكت من مات فلاحة
ماتصبح جبل ماترتفع مترين***وانتة صفاحك معلمة عالراحة
رد مع اقتباس
المشاركة الأصلية كتبت بواسطة abas satar
