شمحلاه الزمن لو جنت وياي
وشمحلاها الحياه لو نجتمع بيهه
شنو يسوه عمرنه نخلصه بالزعلات
واجروح الكَلب بدموم نبجيهه
شنو رأيك حبيبي اتفق وياك
ننسى احزانا وللأبد نطويهه
وندفن كل زعل ونمَوت العذال
وإشموع العشكَـ بالفرح نضويهه
واحضنك وابتسم وارسم على الشفات
بوسه وللشفايف روحي تهديهه
وبحجة شقى ابقى أبَوس بيك
وأحس انفاسي تصعد ماترد ليهه
ومااستثني كلشي وماكو ممنوع
وننزع كل خجل والخجله نمحيهه
ونغمض اعيونه ونحقق الأمال
ونكتب صرنه واحد ماكو ثانينه
واروح اوياك عمري بعالم الأحلام
ونغفى بالحضن احنه وليالينه
وتسألني حبيبي كَلي شنهو الصار
احس الدنيه حلوه والطعم بيهه
معقوله العشكَـ هالكَد حلو اوياك
ومعقوله الغرام الجان مالينه
وأجاوب مبتسم أي ياحبيب الروح
هاي أشواكَنه غطت موانينه
وحققنه جزء والباقي عالايام
مثل ارواحنه نربط اسامينه
وماكو مستحيل بُحبي وياك
أقهر كل حواجز وكتي بانيهه
وانا الفارس حبيبي الماخذلتك يوم
احارب هالزمن وأهزم ميادينه
واحطم كل قلاعه واهدم السور
وأكتبلك حبيبي بنص حياطينه
ونتيجة هالنصر راح ارتبط وياك
ونضحك على الدنيا العاندت بينه
ونبدلها حبيبي بدنيا للعشاكَـ
واشموع العرس تضوي بصوانينه
وننثر بالورود بكل درب شفناه
ونذكر كل سوالفنه وحجينه
هناه كعدنه... هناه فرحنه
هناه شكينه وبالألم اهناه بجينه
وبدموع الفرح اكتبلك أهواك
وننسى ادموعنه النزلت حزينه
وماطولك حبيبي عالعهد وياي
أخلي الكون يهتز من اسامينه
رد مع اقتباس
