اول وصولي الى استونيا ..سكنت في عمارة لا شفت فيهة فتحي ولا فتحي شاف حد ...اروح وارجع كل اللي اشوفة سيارات الجيران وريحة الطبخ , الى فد يوم اندك جرس الشقة يوم السبت الظهر, لكيت أمرأة عجوز بالباب ( عمرهة بالثمانيات)طلبت مني اساعدهة بتحريك قنفات البيت بالهول من مكان الى مكان ثاني ...
اول دخولي الشقة , مريت بالمطبخ , وشفت قفص بيه ارنب بالمطبخ , والارنب يحتضر نايم واكو يمة خس ولهانة وهو مايدري بالدنيا شكو ماكو, سألتهة شبيه, كالت كبير بالعمر , سألتهة عن اسمة , كَالت كيكي ...المهم ساعدتهم ورجعت ...
بعدهة طلبت مني مرة ان انظف الثلج لأن جدول تنظيف باب العمارة عليهم ..فبديت انظف الطريق بدلا منهم, اتسوك الهم اكثر من مرة ...صارت علاقتي بيهم طيبة , الى ان اجة اليوم المشؤوم ...
ساعة بـ3 بالليل اندك الجرس اكثر من عشر مرات متتالية فتحت الباب ...الحجية تبجي , تصيح زوجي مات , رحت لكيتة بآخر نفس, خابرت الاسعاف, كالوا انتة جيبة راح توفر وقت ...اخذتة بالسيارة للمستشفى طلعت بيه جلطة , بقيت وياه لثاني يوم الصبح ...بس عندي دوام ..اضطريت اتركة ...فكألوا تكدرون تاخذوه للبيت بس المفروض ميسوي اي جهد يأثر على سير عمل القلب التعبان, فأنطيت رقم تلفوني للحجية وكلتلهة اي شئ يصير اتصلي بيه على تلفوني ...
اني بنص الشغل واتصلت الحجية , كل اللي أفتهمتة منهة وهي تبجي ( مات , تعال بسرعة) ..اخذت اجازة ورجعت للبيت واتذكرت الرجال والصراحة عيني دمعت , وصلت للشقة مالتهم , دكيت الباب انفتحت الباب , اشو الحجي واكف كدامي ؟؟؟ كلتلهم منو الماااااااااات ؟ كالوا كيكي !!
اني صرت عصبي بديت احجي بالعراقي من عصبيتي لأن اجازة العمل ينقطع جزء من الراتب وكنت بحاجة الفلس , كلتهلم وهسة صخام مات ..اني شنو دوري بالموضوع , كالوا كيكي بالمستشفى انتة تروح تجية وتدفنة احنة كبار بالعمر وحالتنا النفسية متسمح ...
واني بالسيارة رايح للمستشفى , اتصلت بأخوية واني ضايج ..كال شبيك ياستار ..كتلة كيكي مات , كال كيكي منو ؟؟ كتلة الارنب مال جيرانة ...وبدة يسوي هوسات بالبيت ع التلفون ..ضحكت الى درجة ردت اسوي حادث ...
نزلت للمستشفى وعيوني مدمعة من الضحك , المستشفى مو مستشفى ..عبارة عن عيادة بيطرية , دخلت الدكتورة كالت انتة منو ؟ كلتلهة ولي امر كيكي , والدكتورة بدت تعتذر , احنة سوينة اللي علينة , واني عيوني مدمعة من الضحك عبالهة كنت ابجي , كالت تحب تلقي نظرة عليه قبل لا تستلم الجثة ؟؟ اني جسمي بدة يهتز اكثر من الضحك بس ع الوضع الصامت ...الطبيبة تأثرت ودموعهة نزلت ...المهم استلمت الجثة ..وخليتة بجنطة السيارة , اتصلت بأهل المتوفي ...كلتلهم كيكي وياي هسة شنو ؟ كالوا تاخذة لمقبرة الحيوانات اكو واحد ثاني ينتظرك ..واصرف من جيبك واحنة ننطيك ..درجة الحرارة كانت سالب 25 يعني مستحيل يندفن احد اذا مو نار وملح وعملية معقدة ...كلتلهم شنو رأيكم ان اخليه يرتاح بطريقة افضل من الدفن ...كالوا على راحتك ...خليتة بسيارة الزبالة اللي كانت بالمنطقة ...وراح كيكي ...
رد مع اقتباس
هع
