قصيدة رائعة بحق الامام علي (عليه السلام) ..
السلام عليكم ورحمة الله وبركاته ..
لقد ارتأيت ان اورد لكم هذه القصيدة الرائعة ... بحق امير المؤمنين (عليه السلام) ..
هيعونه اليطوف بحضرتك مظلوم
وهيعونه اليشكي همومه بالحضرة
يا سيف النبي ويا فرحة المسكين
ويا باب الصبر للي خلص صبره
تمنيت بضريحك روحي من تروح
يا زوج البتول الطاهرة الحرة
حتى الانبيا تندب علي الكرار
اسمك يا علي بالموزمة اشكبره
تاريخك مجد يا سيد التاريخ
يا علم الفلك و الكون والذرة
منو مثلك علي ضحا شكثر للدين
وآخر تضحياته يضحي في عمره
ومنو السموه اسد في معركة صفين
وبصولة بدر خله الزلم حدره
ومنهو الي قهر امة بني اسرائيل
وظلت الى الان اباسمه منقهرة
علي اسمك كبل ما واحد مسميه
جبرائيل خط اسمك على الصخرة
بالكعبة يحيدر طلكت امك بيك
وحتى الجني الازرك لبد في جحره
يونس ندب بيك انته كبل لتصير
وكال احضر علي وخلصني هالمرة
يندب يا علي المتضايق المظلوم
واليندب علي اشكد ينفتح صدره
عفيه شكد عظيم انته يبو الابطال
الجن والانس منك كلها متوشره
منو غيرك شفيع النا يبو الكلفات
لو قامت الساعة بنارها الكبرة
يا ركن الرسالة ويابو ثأر الله
ويا اول القدرة وآخر القدرة
ويا سيف الفقار وقاري علم الغيب
ويا بيرغ محمد ساعة الوزرة
يا صنديد يالمثلك فلا موجود
وكعبة الطلكتك مو حكها مفتخرة
عاشرنا طريقك بأول المشوار
وبس ابن الزنا الي ينكر العشرة
والله يا علي امن انخاك وكت الضيج
همومي تروح كلها وتنجلي الحسرة
محمد بالغدير اشكال للاسلام ؟.
مو وصى بعلي من بعده بالامرة ؟!
ويتبره محمد منه يوم الدين ..
كلمن ما حزن في ليلة الطبرة
علي وابنه حسين العجب الثورات
بيرغ رفع راسه ابآخر الصورة
حسين الماخذه دينه وكتاب الله
شلون يذل حسين وامه الزهرة
نادى الموت اولى من ركوب العار
وخله جيوشهم عالارض مطشرة
وابنك ابو فاضل بالغضب بركان
ليث وبالشدايد محد يكدره
سحكها بالفرات وخله دمها يسيل
تمنيت الفرات تنشف ولا قطرة
لان عطش كبود المصطفى الاحرار
وعباس انغدر باليمنى واليسرى
مهموم اشتكيلك حالي يا مولاي
انه بصدري يحيدر غافية العبرة
توازت يا علي والباطل السياف
والحق صار اخرس وانركب ظهره
ما يخدر جرجنا ولا يريد يطيب
اسم فرعون بيه الجرح شيخدره
يا حامي الحمى شنسوي محتارين
تعبنا من الدماء والظلم والهجرة
ما صارت كبل حتى بزمن نمرود
السواها يزيد وزمرته وشمره
انه منين اشتكيلك واحجي من يا باب
من هذا زماني القاسي وغدره
حقدوا عالنسل جي من علي الكرار
شجم هاشمي آية وضيعوا ذكره
خلصنه انتيهنا كلي وين نروح
وعيشتنا صفت يا عيشة الكشرة
يا حاكم يجينا يكظ علينا السوط
قسوى بسيوفهم وجفوفهم قذرة
اعتقالات ومشانق سجل التاريخ
وماكو من ظلمهم كل بشر يبرى
شكد سنين عشنا بعالم الاحزان
كل اليوم نتأمل البشرى
من هالك إلمالك لنشرى ولنباع
ووطنا يا علي صار بورق سعره
الحدمن سيدي .. الحدمن سيدي استعمار باستعمار
ويا حاكم يجينا محمل بشره
اطينا تضحيات من الشباب هواي
مو مليون حتى تعدوا العشرة
شجا هذا الوطن بي كثرة الرايات ؟.
وكلمن رايته ودستوره وقصره
وشجاه هذا الوطن يا وطن البترول
الحراميه تحوف ومحد ينطره
رد مع اقتباس
