الى الوطن
ثق لو بالعراق يصير طوفان ... ونبي الله نوح يرد علينه
يباوع بالبشر ما يلكة انسان ... ويصعد وحدة وتمشي السفينة
من سجن لسجن جبت العمر يا عراق ... وعليك بكل وكت مسلطك مفارك
لسواد عيون شعبك ما اجاك انسان ... اجت كلهه لسواد عيون ابارك
ما باسوك اخوتك وانته خد الكاع ... ودمعتين على طولك يجرن انهارك
بسك يا وطن لا تشعل الهم نار ... غموك العرب وادفوا بنارك
ذلتنا الدول ردينه مكسورين ... بس انته الغريب مدلل بدارك
مثل حاتم جنت تذبح فرس للضيف ... بس شعرة فرس ما يسوة خطارك
يجدي الماي زرعك وانته ذو النهرين ... خلصت العمر تسكي بزرع جارك
زرع جارك كبر ما مد عليك فيايي ... بسمة ارضته وعبرت اسوارك
مو امريكا ثارك لا وصدام ... كون من العرب ناخذلك بثارك
لا تزعل علي من حقي لو مليت ... من بقت تحتمل وبضلعة بسمارك
منو الجرحة على طولة وانته دربك سيف ... وانته احق بالملح ويكملة مشوارك
بلده انغطته وظل خايف ابراهيم ... وانا بطرك الجلد واتحملت نارك
كادوني بحبل وعيوني معصوبات ... ماطلعوا حرف من خزنة اسرارك
بعد شاكثر بعد مو اني الاول ذاك ... داراني الوكت وانته الوكت دارك
من جف اليسلم خدي ظل يخاف ... من كد ما بجه من جفوف خطارك
واني من يا وكت يسطرني هذا وذاك ... وانه الهوة من يطكني اتعارك
وعذرتك يا وطن لان انا طيب ذات ... لو غيري وعلي ما يقبل اعذارك
لو اشرف شعب بالدنيا عايش بيك ... جان جملة بمزادي انباعت ديارك
بس احنه وعلي جم مرة طكنه الجوع ... بعنه هدومك وما بعنه زنجارك
وغيرك يا وطن لو النه حق نختار ... نعوف الدنيا كلهه ونرد نختارك
دينارك سقط وانسحك بالرجلين ... بس يسحك دول من يمشي دينارك
المن تشتعل شو كلهم ابن زياد ... بس انته ابن الحسين وشعبك انصارك
نلطم عالصدر كلما سمعنه اخبار ... خلصنه العمر دم تنزف اخبارك
امس كصن شعرهن بابل واشور ... وشكن زيجهن من باكوا اثارك
سبوا سومر بعد شمتاني يا ابو الهول ... وبرج بيزا اغتصب باليل عشتارك
صاير ما تشور يا ضريح عزير ... باكوك اليهود وباكوا حمارك
وباكوا عاج عاد وورقة الميلاد ... وانسينه انته بعمر يا ادم صيارك
امس بيك حلمت جنك نبي وتبعوك ... وعلى فراشك لكيته ينوح كرارك
واثقت بصاحبك بس صاحبك جذاب ... بس عنك زلف ودلاهم اثارك
وانسحك بيت العناكب وارملاته تصيح ... وبقت روس الحمام مطشرة بغارك
لازم تفتخر بس انته الاختاروك ... مقبرة الامة وربك اختارك
يا اترب وطن واخصب ارض للموت ... اليريد يضل عدل يتغطى بحجارك
ولكن ياوطن اعذرني لو ضجيت ... انا قلبي عليك وناري من نارك
تضل ليا وكت تطفي انته للاجيال ... وتضل ليا وكت تتذبح انصارك
وتضل ليا وكت يومية تنطي حسين ... ومثل زخ المطر تتساقط اقمارك
وتضل ليا وكت اهلك سباية تروح ... ورماحك ركب ومدخلة ديارك
وتضل ليا وكت ساكت يا ابو حسنين ... مو شك الغمد مولاي فقارك

اتمنى تعجبكم القصيدة هية صوتية بس اني كتبتهه بايدي

مااعرف الشاعر