مساجلتي بالابوذيه مع الشعراء
الشاعر زاهد المسعودي وابوطيبه السعيدي
والشاعر حسين الساعدي
///////////////////////////////////
مريم حسين
نهوني من محبته اشكثر منهاي
اعيونه الضيعني وضعت من هاي
جنه ما عرفني ايكول من هاي
ولا جن بالصغر عشنه سويه
//////////////////////////
ابوطيبه السعيدي
حلمي إلشيعوه بصبح ونهوه
وشاتي ورد عليه بطيف ونهوه
إنتفض جرحي بكفاه وصاح ون هوه
يبلسم رد عفتني ليابليه
//////////////////////////
مريم حسين
أحب كل يوم اشوفنهم وأمرهم
لأنهم دوه لجروحي وَمرهم
ضكت أنه العسل منهم ومرهم
طلع ما ينجرع مرهم عليه
/////////////////////////
الشاعر زاهد المسعودي
لا تحجي بقديم العشك كف فاك
ما تدري نسيت اشجنت كفّاك ؟؟
هذاك الضيم أبداً فلا كفّاك
أجيت اليوم تعصر جرح بيه
////////////////////////
مريم حسين
شوصفلك يهد اجبال حزني
وسيف الهجر من صديت حَزني
ما حزت الصبر والضيم حزني
على فركاك من اكطعت بيه
/////////////////////////
الشاعر زاهد المسعودي
ألي صاحب يصاحب مرمراني
ومران الصبر هدني مُر مراني
حديد اعصاب عندي مرمر آني
بس دوس البطن سببلي اذيه
///////////////////////////
مريم حسين
رحنه ومن جديد انوب عدنه
لأن انتو ابغلاة الروح عدنه
نعد باحسانكم ونزيد عَدنه
وجيناكم نحب نلتم سويه
/////////////////////////
الشاعر حسين الساعدي
اعيوني قبل صوتي كَلمنك
وانشل جفي اعله بابك كلَ منك
حبيبي الصار بيه كله منك
اجيت انته وجبت كل الأذيه
ااالساعدي
//////////////////////////
مريم حسين
اعيونك يا حبيبي كلَمني
وأحس متني اعله بابي كلَ مني
انجان الضيم اجالك كله مني
أموت روحي اريد ابهاي اديه
///////////////////////////
ابوطيبه السعيدي
لجلهم تعبت حالي وهميت
وصحت وكت الوفه وفو وهم ميت
إعمدت للثوب أشكنه وهميت
إذكرت ساتر علي كضيت إديه
///////////////////////////
مريم حسين
كافي امن الملامه يل تلمني
وين االفرح وهمومي تلمني
زين وضلت اهدومي تلمني
اهدومي اشكد فضل الها عليه
///////////////////////////
الشاعر زاهد المسعودي
خلف الله عليكم شكر منكم
وجزه اللي بدر منكم شكرمنكم ؟؟
أضوك المر واكَولن شكر منكم
المهم ما تفرح الشمات بيه
//////////////////////////
مريم حسين
يصاحب ما نصفت اوياي مره
بس القهر مره بأثر مره
وصيتي لو متت للقبر مره
ولو من البعد سَلم عليه
/////////////////////////
الشاعر زاهد المسعودي
راح وعاف عين وشاله بيهه
وكَلب باجفان لفّه وشاله بيهه
صرت مثل اليتيمه وشال ابيهه
مشه وصار العمر علكَم عليه
/////////////////////////////
مريم حسين
عيني ما غفت ليله بعدكم
اشبيدي والزمن عني بعدكم
اتمنه ما نسيتوني بعدكم
على ذاك العهد لو للمنيه
/////////////////////////
الشاعر زاهد المسعودي
رحتو وجن مشت روحي وراكم
وجنت احيا من امر بيكم واراكم
متى تعودون ما ادري وره كم
نواتهنّه وتعود الروح اليه
//////////////////////////
مريم حسين
عشر تيام ضلن كون عديت
وأسافر لو عليك ابعيد عديت
جرحني الزمن وأنه اهواي عَديت
وخاف ابغربه جرحي ايهج عليه
/////////////////////////////
ابوطيبه السعيدي
حبك شلع هرش الكلب شتلاه
وكلبي إجم صديج بضيج شتلاه
صبري عليك مثل الزرع شتلاه
تمر حسبة وكت واكعد بفيه
////////////////////////
مريم حسين
كلبي الضاع عنوانه وداره
على ذاك القسه كلبه وداره
نسه اشكد كلبي اله وَده وداره
نساني وما بعد يسأل عليه
////////////////////////
ابوطيبه السعيدي
حصاد الهم بثر فركاك بيدار
جفيت وشوف وكتي شلون بيدار
بنالك هلكلب يازين بيدار
دخيلك لاتدع دارك خليه
/////////////////////////
مريم حسين
عَلي ليش اكطعت يازين وَصلك
تزعل عَلَي لو نمام وِصِلك
شوف الكلب يم الدار وصلك
عافاني واجاك ابهل مسيه
///////////////////////
Ali Rahman
وحك يعكوب وي دموع يوسف.
حسافة وللاسف ذكراك يؤسف
ولك طرواك جن عصفور يوسيف
يذبحني ويرد الروح بية
///////////////////////////////
مريم حسين
مافاضي لجن اكعد وفض لك
واقدمنك على غيرك وافضلك
لاني ماناس وكفاتك وفضلك
وكفت اوياي من اكطعوا بيه
////////////////////////////
ابوطيبه السعيدي
أبد غيرك يصاحب فضلينه
وسر إلي يغثك فضلينه
لون معدن صحبتك فضلينه
أفضله علبنوك العالميه
///////////////////////////
٥
مريم حسين
اسولف صفنة أسراري وفضلك
مثل سفره ابكرم حاتم وفضلك
لأن ما ينسي طيبك وفضلك
خذت نوط الكرامه ابهل قضيه
////////////////////////////
الشاعر زاهد المسعودي
الفكر يحباب جي حبكم فضه الكم
وصرتو طيور وكَليبي فضه الكم
ابد ماناسي يا احبابي فضلكم
ولوما حبكم اني بلا هويه
////////////////////////////
مريم حسين
زمنه إمن المصايب عاد فضنه
وفضينه إمن الافراح وزاد فضنه
إذا مطره صغيره وهيج فضنه؟
أظن وكت الصدك نغرك سويه
/////////////////////////////
ابوطيبه السعيدي
الوكت دلهم حزن بجفاك فظنه
وخرده بعيد للشمات فظنه
أبشرك للرجاب بدمع فظنه
أما آن الأوان إتعود إليه؟
///////////////////////////
مريم حسين
اعزلك علبشر كلها وفضلاك
لان ما ينسي طيبك وفضلاك
وبالي المافضه الغيرك وفض لاك
لأنك طيب وكلك حميه
رد مع اقتباس
المشاركة الأصلية كتبت بواسطة احمد جبر حمود
