سامحيني الدنيا ما تسوة زعل
من يدك شباجكم عصفور والدنيا مطر
كولي محبوبي اجة وحلي الشعر
من تجي نسمة خفيفة تناغي بزلوفج خجل
كولي محبوبي برد
كولي محبوبي كعد
اشاه يافي الكصيبة شجم شمس بردانة تدفة على سدك
جم نهر خدران والشهوة نوارس حطت اسراب على حدك
ردي بفراكج صرت كاع النجف ميت برد
ردي بفراكج الدنيا الوانهة انترست جذب
موناليزة وشخبطتهة دموعي بعدج ماكو دافنشي اليروحلهة ويرد
خلاف عينج كلشي باهت
حتى طعم الموت باهت
لاخسارة ولا ربح
خبزة امي وجلمة اليمة صباح الخير مابيهة طعم
الدنيا محتاجة ملح
سامحيني محلفج بخل الصبح
واحلفج بحر الظهاري وكل مواعيد الصبح
سامحيني بداعت اول كلمة كاتبلج احبج
ذابهة ابابج حرز
ردي لية....
بية تقوة ملك ماشاف الاثم مرة بحياتة
طلك جناحة لجل يمشي على دربج
اشتهيتج.....
بية حسرة عانس بزفة اختهة
بيدهة تصفط غطاهة وتحلم بليلة عرس
من افك بيبان قمصاني القديمة الكة عطرج يلعب بنصهن مثل طلاب ومكيفين
ماعندهم درس
صوت عطرج يترس الغرفة بلابل
ويترس عيوني سهر
صوت عطرج يكلب اللحظة شهر
يكلب النشغة مطر
يكلب ايامي صفر
ياترافة شمس من تغيب تتوضة بنهر
سامحيني الدنيا ما تسوة زعل
الاجل واكف مثل وحاش ديرتنا القديمة متاني يكتلني الخجل
سامحيني
رد مع اقتباس
