صارالي زمن عايش بعين الليل
وبحبه المشاعر بيه جياشه
وأتعب عالقمر جي شفته وكفه ينام
من ينام هسه أنا أفرش فراشه
الكواكب يمي تنثر من شعرها ألوان
وتشوفه حرير تباهه بقماشه
وحتى لا شعر كوكب يلف علاخ
على شعر الكواكب ركبت ماشه
مره السمه أزدحمت وانا صاعد فوك
أمر بين النجوم وكوه أتحاشه
ملتمات تدري السبب شنهو الجان
شمعه أنضربت بطلقات رشاشه
وبعد طفي الشموع أنبجه لحال الليل
القمر مات وبعد نص عمره ماعاشه
وجف الحزن صفك صعد فوك الغيم
كص وجه الشمس بجناح فراشه
لليسألني جانت هالسمه بيا حال
أوصفها قبل لا كلشي يتلاشه
تلفزيون جان تبث ضوه النجمات
جاهل رفع أيده وكسر الشاشه
وزحل والمشتري وأورانس و نبتون
سواهن دكم بردان دشداشه
وأنا أقرا الحضوض وأعرف الأبراج
وأعرف كل برج محتار بأنعاشه
برج الأسد يزأر دم طلع بالصوت
غلط غلطه وزأيره أنجرح بنيابه
من مات الزأير الأسد ظل حزنان
كابل كبر صوته وتيه الغابه
الجدي برجه أجه وشاف الأسد تعبان
عاف أكل الزرع ظل ياكل ذيابه
وبرج الحمل مات و يابطن لتجيب
منفوخه البطون وكلها جذابه
والميزان برجه تناثر بهالكون
كص جفوف ميزانه وقفل بابه
والعذراء برج الرقه والأحساس
جكاير باعت و هملته الكتابه
وبرج القوس مسكين برغم مهزوم
لابد بالسمه وساحكته دبابه
قوس القزح صار الوتر عالنجمات
يعزف مدري ينزف كام بأحساسه
وبرج الدلو هواي أنفعل لجل القوس
كسر خشب دلوه بكصة الفاسه
والجوزاء كل واحد صفاله بصوب
حط بنصهم الشيطان وسواسه
والأسبان صعدوا فوك برج الثور
جروه بالحبل وانكطعت أنفاسه
والسرطان برجه أنتشر بين الناس
وأول مابده كام وأكل ناسه
وبرج الحوت ماراد بمذله يموت
بالمكلوب فك حلكه وبلع راسه
والعقرب توفه بموسم التفريخ
بس خلف عقارب شايله أمواسه
.
.
.
.
لشاعر / حسين الكعبي
رد مع اقتباس
المشاركة الأصلية كتبت بواسطة الريم
