بيني وبين الولاية نزيف اعتاب
ادكــَ يا بـــاب
بيني وبين الولاية نزيف اعتاب
اعله باب الله تدلّيني
وينكر حركَتي الشبّاج
وبنيّة مطر عالجام اطيح اتراب
وكل البيدي,,,اكسر واهس الشيطان
واتعوّذ بكلمة (ليش؟؟)
من الكَه بظهري طعنة وناب
واتداين خلكَ صفصاف
من ايشح عليّه الراي
وعالشامت ولا فد يوم
حجيت بنبرة العاكَول
رغم ما مر لهاتي الماي
ورغم هذا,,,
ولا ينضاكَ تعبي ابهامة النخلة
كَللهم ولك ياطين
يابذرة التجيب افياي!
اسألوهه النجوم الغفت بعيوني شكثر تانيت
وسامرني الصبر والناي
جا ليش الجروف الخذت نص الحيل
ويه اول روجة تمسحني وأرد مكتوب
يا شاطي اللي يرضه ابهاي
بس لاوين؟؟؟
اظل اخنكَ صدى ابروحي
محّد بيهم ايسمعه
واظل لاوين؟؟
بعيوني الخذاهه الريل
جابسلك الف دمعة
مو انته الكَلتلي:
(ايموت شاعر,,يعلكَ السلطان شمعة؟)
جا انه اشبيدي عالظلمة؟
جم فانوس مد حيله اعله طول الليل
وازاني وكَلت قسمة
يشرّاية صور بالماي
يهل الشعر
يهل اللّيل
جريمة الكَمر ينباع بسعر نجمة!
رد مع اقتباس
