أمطك مشتهي لو مطگت الچيلات
ما علمني ابوي منالميض اجفل
انا العندي زلم بالخلب ايجيسون
مو جيسة مصوب لا شرط تكتل
انا سيف المعارك شايخ اعلى الروس
مو منجل حصاد أيشيخ عالسنبل
انا منصعد فرس تنزل شبر بالكاع
وتضل من وراي اسبوع ما تصهل
ما احفر مواضع بيها اضم الراس
من احفر مواضع فشك بيه اشتل
انا انفاسي كلها مكاسره أبارود
احس النفس ماصخ لو هوه محمل
أهي عشرة كتل ويغزر الدخان
ما خاويتها وشاجورها موشل
انا فرضه وشعيره احجايتي منتثور
اطم روحي منسولف سالفه تفشل
ما اثق بالسن مرات حگ ويضيع
من تسولف ام عريف ما ترتل
انا الهدو علي سويتهم غربيل
ونزعت جلودهم للمشتهي ايغربل
خليت الزلم ينلظم بيها الخيط
يطلع من ظهر ومنالصدر يدخل
وكت الغيض سرفنت الجلد والثوب
ولمن زامطت سرفنت حتى الضل
أشد ضلع بضلع لو ما لگيت حزام
هيه الخوه غيره وما تجي توسل
انا الطيف جَسر يلكط بشر بالعين
ألي يحلمون بيه جفونهم تهدل
جدمي منرد انكته اطيح منه دروب
ماشيهن شبش وي شامت اوي خل
انا امي اعلى ميت ما تعرف تگول
تگضيها العرس والفاتحه تهلهل
امي البالحچي ترهم صدر ديوان
ومن تغزل غزلها معدل تعدل
ومن كد ما غزلها مرتب ومفتول
يجيها العنكبوت وعدها عش يغزل
أفه شلون انطي ظهري الفشگ مثل الضيف
افرشله الضلوع وبيهن يحول
وانا واكف نمت خاف انطي ظهري لكاع
وخاف مننطي ظهري الموقف يزعل
اموت وهيبتي ترافكني بعد الموت
موت المجفي ذله الهيبه للمجبل
انفتگ حتى الكبر من راد بيه ايضيك
ومنكر للفتگ بتراب وابره يشل
اوصيكم وصيه انطوها للدفان
انا بهاي الكبور بهامي ما يدخل
چبير انا ومقدس والكبور زغار
نشفولي نهر ونوب بيه انزل
" للشاعر حسين السيد نور "
رد مع اقتباس
