ومضات على الحروف الابجديه
{ شذرات ابجديه}
-أ-
تانيت اعله باب اشفافك سنين
الچلمه تكولها ---- لبلشفه خافيها
اثاري تستحي وشفايفك بالعين
الچلمه بشفة اخرس صعب يحجيها
-ب-
هنيالك متدري------- بنار الگلوب
تنام ومستريح ومالك احباب
وانه محاصر صرت للشوك مطلوب
مثل مطلوب والديانه ع الباب
- ج-
تكتلني وتگلي شصايرشبيك
وفوكاها تگلي الشده تفرج
شاب بهمة العشرين مطيك
بتسعينه ترده ورجله تعرج
-د-
اصبغنه ويرد--- وأرجع اغطيه
ويرجعلي واصبغه الشيب ويعود
مثل لزگه لزگلي تحيرت بيه
ما خله علي فرهدني فرهود
-هه-
هام وياه گلبي وصبح مفتون
مايسمع كلامي شلون احاجيه
مثل سجين صاير بيد مجنون
لا اگدر امنعه ---- ولا اخليه
-و-
لاتگلي بگلبك انه اول واخير
هواي في حبك اضنهم حاروا
سهم البعينك يصيب الّي يطير
شلون گلي البل أرض لو ساروا
- ز-
اخ -----ياآخر زمن مر بالعراق
ما تفض وياك اله بمعجزه
صارت الساسه مثل خيل السباق
تركض وتسرع تريد الجائزه
-ح-
چي نمشي سوه ما امشي وحيد
چن طرنه بحلم ليفوك بالريح
ما خايف نطيح الايد بالايد
خايف من نحط كلوبنه اطيح
-ط-
نظراتك رصاص وانه مثل الطير
من حگي الوذ واحتمي بشرطه
ميهمن بعد ما طول انه بخير
ومادام اليطيح الغير بالورطه
-ي-
انه متوقع رحيلچ-----وادري لو رحتي تجين
شوفي ياكلب ليشيلچ--- وانتي طبع مسودنين
جنت منج اشتكيلچ-------وانتي منچ تشتكين
- ك-
ما أقبل------ اذا بالبشر تنقاس
وغيرك بالبشر كل حال مقبول
لان مثل الشمس وتضوي للناس
ولكنك گمر ع الارض منقول
-م-
جلّ الصوره وجهك رسم مرسوم
يالوجهك شمس بس الگلب اظلم
موظالم صرت انه صرت مظلوم
تظلمني وارحمك وادري ماترحم
-ن-
شما أگلك تعال تگلي بعدين
تليفوني تعب من كثر ما رن
گلبي بغيبتك ما بين نارين
لا راضي يهيد ولا رضه يجن
-س-
المغرور مثل الگمر----- أزغار بعيونه الناس
وبعين كل البشر---------- أزغير ما ينقاس
-ع-
عليمن هل التكبر ياهو اليدوم
ومعقوله التعرفه - يغير الاطباع
أبنادم لو زهت وياه متدوم
ياكل من ثمرها--- وتاكله الگاع
-ف-
تدري ليش انه بجفه ما أمر عليك
حته شوگي يزيد وانه مجافي
حته أضمك ع الصدر يوم التقيك
وآخذ اخدودك تشمها أشفافي
-ص-
يرحل لو ميرحل ما يظل وحده
ما يكدر بعد من--- عندي يتملص
لان شما زعل يبقه الكلب عنده
واذا عنده الكلب ما أضنه يتخلص
-ق-
أبنظره گلبي ارتبط ------ بهذا الحلو الراقي
امره عليه اختلط ---------- ظنيته أعراقي
من جيت أحط النقط ------واكشفله أوراقي
بس هاي گلي فقط ------- والماني الباقي
-ر-
سومر حلم بالوطن---------من حمرابي أسطور
مكتوبه بيها العدل------------ومدونه من نور
ولمن صحى من الحلم------- أتفاجأ من الجور
لاشاف بيها عدل ----------ولا بالوطن دستور
- ش-
صح صحيح العنب عالي بدوركم
وهم صحيح بعيد صعب أنحوشه
ع الاقل تعلون نبقه انشوفكم
وبالعيون الكم صور منقوشه
-ت-
چنت وياك انظر واعرف الناس
وبصحابي خصوصا عندي نظرات
دوهني أفراگك دارلي الراس
خلاني اشوف أصحابي شمات
--ث-
أنته من يوسف الك فرع وأصول
أنته لاصدفه أنخلقت ولا عبث
الجاذبيه العندك---توكف العقول
حقه تلفزيونه---- وكف البث
-خ-
غني يگولون عني وانه أفلاس
لان مابينت--- مكسور يم اخ
مگابر خلصتها ورافع الراس
وانه بالبيت اسب الزمن وانفخ
-ذ-
أبرفاه الناس لا تاخذ قياس
بالشدايد قيس ذاك وهذا
مراية الشدات تطيك انعكاس
فرق مابين الأجه واللآذا
-ض-
بالمزاد نعرض گلبي وصار الك
لان بس انته عرفت تروضه
لهذا ابد---- لتظنه گلبي يزعلك
ولو زعل وياك معناها رضه
-ظ-
يشيل خشمه الفوگ من يلبس ذهب
ومن تلبسه يطيح خشمه اعله الارض
النار لو متزيدها----- وتحط حطب
جان مات لسانها وما ظل نبض
-غ-
لتگلي محبتك گد الاشجار
وترسملي ثمر وتلونه باصباغ
ما أريدن جنان مشيده بنار
ولا اريدن ذهب بالوهم ينصاغ
شذرات
من كلمات
ناصر اسماعيل الموزاني
كتبة بتاريخ2004
الرجاء عند النقل ذكر الاسم
رد مع اقتباس
المشاركة الأصلية كتبت بواسطة حسن الرماحي
