زعل خوان نزعل
زعل خوان نزعل ونتراضه اردود
طبع الخوه ماي اليعطش يردله
راضعنه الوطن مو بيدك انته تروح
هيه الخوه قابل ثوب وتبدله
وافرض بدلتني شلون جا والدين
مو وكت الصلاه ماعدنه بس قبله
تره الخوان تعتب والعتب مسموح
والزين العتب من ينحجي يقبله
كافي الخشبه عدنه تصير بس تابوت
وبباقي الدول صبوره لو رحله
وكافي بجادر يداوم الطالب كام
يقره الفاتحه والمدرسه معزله
وكافي بلايه كحله عيون الحديثات
عرفن بس دمع ما عرفن الكحله
وكافي احلم احب جوه الورد والياس
موجوه القصف والدنيه مشتعله
وكافي احلم جذب عنتر بعد ما اصير
وياهي العدها واهس واقتنع عبله
وكافي اطفالنه يقلدونه انه وياك
وبالعيد اشترو قناصه موحجله
وحته يصير مثلي ومثلك ابني شلون؟
يتحارش بخوه يتقصد يزعله
ليش بلا سبب نتكاتل انه وياك
تكتلني واكتلك شنهي النحصله
اكتلني بشرط سدلي الفضائيات
واضمنلي الخبر ماواحد يوصله
وخل زعلك فرات شما يريد يطول
يم كرمة علي ويتراضه وي دجله
رد مع اقتباس
