كد حجايتي..وكون الله لاينطيك
كد حجايتي..وكون الله لاينطيك
ربك مايخلي بنادم بعازة
مانرهم بعد,والملكة زحمة وعيب
بنفس البيت ندخل زفة وجنازة
خشن وكتك وانه معيشك حرير ايام
انت المو وجه نعمة رغبت بازة
عبرتك جسر,يمة الصراط يضيع
بأحلامك جنت تتمنى تجتازة
شلعتلك ريتي من كتلي نفس محتاج
مسلمك بيده انت والله تتجازه
الاعمه البي وفه لو ظل شهر بردان.
يموت وللحطب ماينطي عكازة
اطلع من حياتي وسد وراك البال
ماترهملي عشرة تربة وميازة
انه محبس ذهب مومال اطب تنور
وعلي صعبة انلبس بجفوف خبازة
يطيارة ورق عمرك هوى وجم خيط
لتجبرني عله كطعة خيطك اتوازه
واهب نسمة ملح والجم واذي الريح..
واشبك كل جرح من هامته لجازة
براسك فكرة بيها اتوارد الشيطان
جان ابليس منك ياخذ ايعازة
قبل فترة عزمتني بوجبة الطعنات
اكلك كافي وتحط خنجر عوازه
كون يركضك الله بسلف مال ذياب
وعله متونك جبل وبجدمك كزازة
ذيج الساعه تعرف قيمتي من تطيح
الدرع مو بالفرح,بالشدة تعتازة
ومااسمعك بعد لو بذني تنفخ صور
من يكفلك نبي مااسدلك عازة
علة شمرة جف طفل كل يوم اطيح بكاع..
شفت طيحات ماشافتها ربازة
ومو شغلة وراثة بخدي غمازات
حفر ثكل الدمع بخدودي غمازة
منو يراوس عمر وانطيه فرق سنتين
راحة يوم ابدلها بشهر عازة
وصلت حدها كافي اخنك شمع بالبير
من هالساعه اطم البير بعزازة
رد مع اقتباس
