بوطنه الامهات معصبات ولابسات الحزن احلى كلاده
وبوطنه الدمع شك خد الايتام والضحك شكك حلوك القاده
الحمد لله كلت من راح صدام
شو ياهو التكضه صار صدام
واكو صدام بس لابس عمامه
بعهد صدام جان البيت مكسور
ومن البرد ليلك ماتنامه
هسه البيت زين وصار بيه جام
بس كلب العراق انكسر جامه
الكراسي ليش كعدت عالكراسي
لان ماكو زعيم ولا زعامه
ذله بذله نكضي الليل منام
والصبح بالمدرسه ندرس كرامه
اوالدنه الوطن بابا نسميه
اشو بابه عدل وحنه يتامه
ممنوع التجول ياوطن بيك
لان حتى الدرب ساحب اقسامه
شنو منع التجول حتى الاعضام
والدم ماكدر يمشي بعضامه
عجيب اشكد ائمه ياوطن بيك
اوجهك للرحم مابيه علامه
عجيب وبيك ابو فاضل العباس
وعندك جف ولاء عندك شهامه
يوميه قيامه ياوطين بيك
اذن كلش سهل يوم القيامه
