كــوؤس ألالم
خطار عدنه الفرح أعلكـَ صواني إشموع
خافن يمر بالعجد رش العجد بدمــوع
ياكلبي وين الحزن... حدر الحدر مدفوع
دومك توّن ونتك تبجي إبدمع مفجوع
طيفك أمل جذاب فوكـَ السمه مرفوع
بالك تصيح إبحزن صوت الحزن مسموع
خطار عدنه الفرح أعلكـَ صواني إشموع..!
شكبان ليلك غضب بالك تفر باليل
دافن بصيص الأمل سهـّر نجوم سهيل
حط إلنه موكـَد جمر زوّد سعير الويل
ذوّب شموع الوصل فرهد حبابي الهيل
بس لا يبوكـَ العمر .. طيف العمر ملسوع
خطار عدنه الفرح أعلكـَ صواني إشموع.!
لمِلم سنينْ العمر نعثرها ليل الضيم
فارشها فوكـَ الهضم طرزها لون الغيم
مشتال عمرك ذبل ماحن نثيث الديم
والكـَيظ إجاك إبثكـَـل بصرك تظل إمجيم
خيال حلمك مركـَ شتكـَله عيب إنهيم
يبست أنهار الأمل أنتظر روحي إتموع
خطار عدنه الفرح أعلكـَ صواني إشموع..!
بدموعي طيفك غركـَ إمسح دموع الطيف
شمسح جزاني الوكت راح الحلم ياحيف
كـَمريه مامش بعد ليش إحنه موش إبصيف؟
ظلمة إو دواشكـَ حزن لاتظن روحي إبكيف
غرّب شراع الفرح أهلاً إجانه الضيف
حسبالي يسوه العتب ثاري العتب مرفوع
خطار عدنه الفرح أعلكـَ صواني إشموع..!!
للشاعر
عزيز السماوي
رد مع اقتباس
المشاركة الأصلية كتبت بواسطة بريق الماس
