الغضب بعيونه يملي الشواجير
وحيا اعلى الجهاد
العافية بخير
اعارك بعد بيه
اعدال عمرين
واتعنى المنايا ووين متصير
مارفلي جفن كلهم يعرفون
وعليه شهود كتاب التقارير
عشت ليل السواتر
امضغ الموت
وخذت وياه اني اشكد تصاوير
وحليب امي اذا شدينه السروج
وعلى الطبو بغفلة الغانمة تغير
اشد روحي برسنها واعكر الساك
واطبلهم كبل طبة المغاوير
ونجلي الما جلت ونزاعل الخوف
ونشل اجدامهم بالممشى وتحير
وحشاها الروح لو عزت بالزماط
ابشري نينوى بفرحة التحرير
ولدج بالدرب اتلكيهم ابطال
ولد شعلان ذوله اهل المكاوير
***
ولا هم عايزة وترد عليه النوب
بصلافة عين وكحة تفوت بعيوني
تقاريرك بعدني ادفع ثمنهن عوز
والكيبل بعد مطبوع بمتوني
ونذالاتك لهسه مسجلة بالروح
محفوظة بضميري وتمشي بظنوني
تخوني جنت بس ياذنب سويت
على حجاية انحجت ربعك يخونوني
ويحكمني ضمير البعث بالاعدام
ورميا بالرصاص بحقد ترموني
ومايشفي غليلك هذا ويكفيك
تختمها بسفالة من تسلموني
تطلب من هلي لافاتحة تسوون
ولانسمع بجي لمن يدفنوني
وتمد ايدك لاابوي تريد منه فلوس
مالات الرصاص البيه عدمتوني
لاهم عايزة وترجع عليه النوب
تحلف بالعقيدة وبدلة زيتوني
ـــــــــــــــــــــــــ ــــــــــــــــ
حمزه الحلفي ..
رد مع اقتباس
