السلام عليكم ورحمة الله وبركاته.
اخواتي الغاليات في هاد المنتدى المفييييييييييييييييييد قبلو عليا نشارككوم بهاد ليشوصون بالدجاج والشعرية الصينية .
اولا كنحتاجو لعجينة لي خاصها تكون رطبة ملي طيب باش لي عضهوم مايخليش فيهوم شي سنة ويبقا يدعي فينا عوض مايدعي معانا ههههه.
مقادير العجينة: زلافة دقيق+ملح+خميرة +2 معالق زيت+40 غرام زبدة دائبة +ماء دافي للعجن.
نعجنوها ونغطيوها ترتاح على مانوجدو الحشوة.
الحشوة: فيها الدجاج انا خلطت الجنيوحات والصدر+بصلة مقطعة صغيرة+تومة محكوكة+حامض مصير مقطع+التوابل:سكنجبير+الابز ر+الملح+حرقوم عرق+شوية السمن الحار+ملعقة زيت الزيتون.
كنديرو الكل يتشحر مزيان عاد كنزيدو الفلفلة مقطعة مربعات وزيتون اخضر مقطع.
من بعد مايطيب كولشي كنهزو دوك الجنيوحات نحيدو منهوم العضومة ونفرتتو صدر الدجاج + كنديرو الشعرية الصينية لي فايت لينا درناها فماء سخون وصفيناها وقطعناها بالموس او المقص.
كنخليو الحشوة تبرد جانبا وكنبسطو العجينة تكون رقيقة ونقطعوها بقطاعة دائرية ولا زلافة الحجسم حب رغبة اي حادڭة وكنديرو الحشوة الوسط ونسدوها باش تولي عندنا نصف دائرة ونحطوها فلاطة مدهونة ونحاولو نسدو الجوانب بالفورشيط يعني نضغطو على جناب العجينة باش ماتخرجش الحشوة وباش نديرو ديك الزواقة بحال القطاعة ديال ليشوصون.
وملي نساليو ڭاع العجينة والحشوة لي عندنا كندهنو باصفر البيض مخلط بشوية دالخل وندردرو الحبة السوداء او جنجلان.ثم الى الفرن راه مكياخدوش الوقت في الطياب لان العجينة رقيقة .
وفي الاخير كانت هادي هي النتيجة
نتمنى نكون شرحت بالتفاصيل الدقيييييييييقة وايضا الوصفة تنال اعجابكوم وخا راها معروفة لللللللللكن كما ڭلت هي اقل مايمكن لي نساعد به المبتدئات في الطبخ لاني كنت بلاصتهوم واحد النهار وبلاصتي خداتها واحد الانيقة لي راها كتقرا حاليا في الموضوع هههههههههه.
متمنياتي لكن بالصحة وتحقيق الاماني
رد مع اقتباس