بعض الناس
كاين بعض الناس تغلي دخلاني ** من البغض والغش تقدي فيها النار
يضحكلك والوجه زعمة زهواني** ووراك فـــــالغيبة منـاوض الغبـــار
ايشيع في خبار عنك بالعاني ** ونت تحسب فيه صاحب من لخيـار
هذاك يسموه بكري حرطاني ** مـــا يعرف للــواجب و ديمـا غـــدار
ياما صحبت الناس عز من عياني ** درتهم فـــــالبال وكثر من الجـار
هزيت لي كان طـايح ويعـــاني ** رديتـــــو راجل ولا مــــن لكبـــــار
دار قــــرون تغر وعبد الفــــاني ** ولا ينطـح في حبـــــابو بدينـــــار
ونسى ذاك الخير ونسى عنواني ** يتفكرني غير كي هز المنشــار
يكلم بالعار فية وفي خــــواني** وكي يلقـــــاني يجيني طاير طيــــار
يتبسم ويضم فيــة لحظــــاني** يتعنق ويبــوس ويــــــن يا مغـــــوار
في وقت الشدة صد عني خلاني** بدلني الخاينة وعشق لقمـــــــار
بين الناس يصول يدعة غــــاني** مـــــال الخطفة يروح ما يخلي اثــار
تبقى يــــامغـرور وحدك تعــــاني ** وحلاوت اليــــــوم تــــوليــلك مرار
بين اهلك وتحس روحك بــــــــراني ** في غربة ومضيع مفتاح الــــدار
وكلامك مـــوحال يقلل من شاني ** وسيـــاق معروف يعاير لخيــــــار
والفـــاهم يفهم معنا لمعــــــاني ** وسلك ذهب ما يصدي ولا ينهــار
رد مع اقتباس
