مساجلتي مع العملاق حسين الساعدي
يمكن طاحت ويه الدمعه!!
/////////////////
الشاعر حسين الساعدي
يا عالم ياهو ايدليني!!
ودعته وحاير بلرجعه
صارت ظلمه وضاعت عيني
يمكن طاحت ويه الدمعه!!
------------------
مريم حسين
محتاره الناس ابموضوعك
والفرحه المن عندك راحت
ودعته وصبيت ادموعك
وبيا دمعه العينك طاحت!
-----------------
الشاعر حسين الساعدي
مدري بيا دمعه الحزنانه
جرت عيني ابسرعه اوياهه!
مدري اهناكَ ومدري اهنانه
طاحت عيني اوين الكاهه!
-------------------
مريم حسين
تذكر ودعته ابيا شارع!
ياهو المثلك ضَيع نفسه
هاي الناس اويانه اتباوع
حته اندور عينك هسه
--------------------
الشاعر حسين الساعدي
يمكن غاد ابذيج الساحه
ودعته وطاحت دمعاتي
طاحت عيني الما مرتاحه
من شافت جيت شماتي
---------------------
مريم حسين
لا بلشارع لا بلساحه
دورناهن ماكو اعيونك!
دمعاتك يمكن ذباحه
مذبوح وجرحك بجفونك
----------------------
الشاعر حسين الساعدي
خافَنهن طاحن كدامه
من ودعته ابذيج الليله
مايدري ابروحي المحتامه
ياهو اليوصله ويحجيله!
--------------------
مريم حسين
دورنه اعيونك ما شفنه
هيج اعيون ابهاي الوسعه
وشكد ادموع اتصادفنه
وبكل شارع شامر دمعه!
------------------------
الشاعر حسين الساعدي
هايم ما أدري ابخطواتي
عالودعته ومابي رَجعه
يا مريم صبن دمعاتي
وما أدري العين ابيا دمعه!
رد مع اقتباس
المشاركة الأصلية كتبت بواسطة فهد الزيادي
