مساجله رمضانية في ليلة الجرح
عام 2014/رمضان
بحُب أمير المؤمنين
__________________
الشاعر حسين الساعدي
مو دم وحك رمضان وبهل كرامه
راسك يبو الحسنيين ينزف يتامه
__________________
مريم حسين
راسك يبو الحسنين ينزف مساكين
وتصدع الاسلام وتيتم الدين
__________________
الشاعر حسين الساعدي
والكعبه يا كرار كلش حزينه
والكوفه هذا اليوم تسئلني وينه!
__________________
مريم حسين
والكعبه هذا اليوم لبست سواده
واستشهدت وياك يابو الشهاده
__________________
الشاعر حسين الساعدي
والكعبه هذا اليوم فكدت ولدهه
لبست سواد العيد بس هو عدهه
__________________
مريم حسين
طبره وقست بالناس كلش عجيبه
واتيتمت هالناس وبهل مصيبه
__________________
الشاعر حسين الساعدي
هالطبره طبرة موت يعني النهايه
وتصدعت هاليوم كل الولايه
__________________
مريم حسين
ريتك يبو الحسنين دوم ابسلامه
من بعدك ابيا حال حال اليتامه
__________________
الشاعر حسين الساعدي
سالم يبو الحسنين ويه الولايه
وبراسي كون اتصير الطبره هايه
__________________
مريم حسين
بعدك يبو الحسنين عشنه ابندامه
والدنيا ما تنراد وين السلامه
__________________
الشاعر حسين الساعدي
يادمعة البلعين واسي الزجيه
هاليله ابو الحسنين طايح رميه
__________________
مريم حسين
يابو الحسن وياك دنيا وقيامه
نفديلك الارواح وانته ابسلامه
__________________
الشاعر حسين الساعدي
أصفن واكول اشلون حيف والف حيف
سيف الله ياكرار ويطبرك السيف!
__________________
مريم حسين
يا ابن ملجم ليش بلطبره هايه
يتمت هذا اليوم كل الولايه
_________________
الشاعر حسين الساعدي
يابا الحسن غدروك ماكدرو اعليك
لو باالحرب ماجان واحد يلاكيك
__________________
مريم حسين
يازينب ابيا حال يا زينب اشلون
وبحيدر الكرار غمضها العيون
__________________
الشاعر حسين الساعدي
وياك اضل وياك دنيا وقيامه
وما يرهم ابلياك تاج الزعامه
__________________
مريم حسين
لمصابك الهل يوم يذرف دمعنه
بعدك يحامي الجار حرنه ابوضعنه
__________________
الشاعر حسين الساعدي
وينك يحامي الجار نتمنه عايش
جا ما تطلب للدار هاي الدواعش
__________________
مريم حسين
كل العراق ايصيح وينك يكرار
لو تحضر العدوان ماتبقه بالدار
__________________
الشاعر حسين الساعدي
حبك فرض عاالناس وبكلشي فارض
وشافونه حبيناك صاحوا روافض
__________________
الشاعر حسين الساعدي
وينه اليداوي الروح كلش كئيبه
ويكتبلي أجمل بيت وبهل مصيبه
__________________
مريم حسين
أبشر وجاك البيت بسم الصميده
والحيدر الكرار تحله القصيده
__________________
الشاعر حسين الساعدي
غربه وغريب الدار واشلون ازورك
معميه هاي العين تتمنه نورك
__________________
مريم حسين
سلمت كون اليوم يوصل سلامي
وبحضرة الكرار وحسين امامي
__________________
الشاعر حسين الساعدي
لأرض النجف صديت وأرسل تحيات
لعيون ابو الحسنين كل السلامات
__________________
مريم حسين
والكوفه هذا اليوم كلش حزينه
وتكول ابو الحسنين ما مر علينه
__________________
الشاعر حسين الساعدي
والكوفه هذا اليوم لو تعرف اشلون
من البجي والنوح ما خلت اعيون
__________________
مريم حسين
خلينه أنه اوياك ننصب عزيه
ونواسي بالدمعات بت الزجيه
__________________
الشاعر حسين الساعدي
ويه الحسن وحسين ونواسي عباس
والحيدر الكرار نلطم عله الراس
__________________
مريم حسين
ونتشارك ابدمعات عين ابوسط عين
ونقدم الدمعات كلهن لابو احسين
__________________
الشاعر حسين الساعدي
نتشارك ابدمعات دمعه اويه دمعه
وياحيدر الكرار ما منه رجعه
_________________
مريم حسين
كل الإجو عشاك بسم الولايه
وبحيدر الكرار كل الهدايه
__________________
الشاعر حسين الساعدي
صاح وهتف جبريل طايح سندهه
والكعبه هذا اليوم طبرو ولدهه
__________________
مريم حسين
وبجاه ابو الحسنين وبهل مصيبه
ما تبقه هاي الدار وحشه وكئيبه
__________________
الشاعر حسين الساعدي
وتعنه للكرار ممشه اعله راسي
وتشرف ابهل راي رغم المأسي
مريم حسين
نتعنه للكرار لا ما نعوفه
لو زرعو العبوات لازم نشوفه
__________________
الشاعر حسين الساعدي
وياك اضل وياك وبلا ندامه
يابا الحسن وياك دنيا وقيامه
__________________
مريم حسين
واليبغض الكرار لا ما نريده
حته الصلاه والصوم ماظن تفيده
__________________
الشاعر حسين الساعدي
لو يبني كعبه انوب وبصفها كعبه
واليبغض الكرار ميراضي ربه
__________________
مريم حسين
نكتب بعد ونزيد باحله التحيات
يستاهل الكرار كل الكتابات
__________________
الشاعر حسين الساعدي
يادمعة البلعين با لج تضلين
وبهالمصاب اليوم صاير لبو احسين
__________________
مريم حسين
يادمعة البلعين ولمن تضلين
وتيتموا هل يوم كل الموالين
__________________
الشاعر حسين الساعدي
كون الدموع ادموم ونصبها يا ناس
هذا الوكع كرار والطبره بالراس
رد مع اقتباس
المشاركة الأصلية كتبت بواسطة بنت الوطن
