شعر بحق علي ابن ابي طالب (ع) جرحك يحيدر
((جرحك يحيدر))
**************
جرحك بالضلع نام // يحيدر والكَلب صام
شمس وكمر وآيات
تبجي نجوم دمعات
ويَّه دموع الأيام
********
خيَّم ليلي ماشفنه نجم صبحه // فكدناك
أخذ منَّه الزمان أيامنه وفرحه // جفيناك
العهد وياك جرحك بالكَلب جرحه // بجيناك
ماظل شيعي يحلم بالأمل يصحه // بليّاك
يبو تراب أحنه ألأيتام // كبر جرحك ميلتام
حبَّك ساكن الذات
تبجي نجوم دمعات
ويَّه دموع الأيام
********
نواسي أرواحنه بالآه والونّه // بجينه
محبتك سيّدي لاشك ولاظنَّه // سَكينه
عهد الذر حيانه وياك بالجنَّه // ولينه
شيعه وبيك نتحامه من المحنه // أحتمينه
يمكسرهه لصنام // يمحققهه لحلام
نتحمَّل اللوعات
تبجي نجوم دمعات
ويَّه دموع الأيام
********
الحزن منصوب وسط كلوبنه وكل دار // لليوم
هظمنه الحسن يومه من الزمان أندار // مسموم
وفده دينه الحسين ودمَّه سيل أنهار // مظلوم
وسفر زينب طويل بليل ماله نهار // بهموم
العزيزه الحره تنظام // سبيَّه محمله آلآم
غريبه أبين شمّات
تبجي نجوم دمعات
ويَّه دموع الأيام
********
حاضر بالشدايد دومك ويانه // فخرنه
وعناد الوكت بالمحن خلآّنه // صُبرنه
أمام الانس والجن علي مولانه // ذخرنه
ينخاك الفرج بالفجر رجوانه // نطرنه
مثل الموته نيَّام // بكهف أنتاني أنسام
للفقـــــار صولات
تبجي نجوم دمعات
ويَّه دموع الأيام
********
ظَلمُوهه علينه وحيَّروا للحال // مجروح
الوطن بحضان قاده وساسه حظَّه مال // مذبوح
سفينه بغير ملآّح وسفرهه طال // لا روح
شيعة علي واحدهم صفه رحّال // وينوح
أبوطنَّه عشنه بوهام // سكنَّه حجاره وخيام
نصحه بظيم ونبات
تبجي نجوم دمعات
ويَّه دموع الأيام
********
رد مع اقتباس
