شعر دموع بيوتنه
دموع بيوتنه
حركَ وجه السنين العمر يلهب نار
وكَضينه العمر بسنينه انطفي..!!
اسنين اشوهت بيش امشي ويه الناس
كامن يستحن ما يمشن بصفي…
رف الروح صارت للحزن متروك
وتلكَه العنكبوت…معشعش بـرفي!!
((((لدور ضحك بشفافي شبعت نوح
مثل ثكله ابحضنهه الولـد متـوفي…)))) ترررررررف
هواي الراح مني ومااكَولن راح
ويسألوني شتريد وكَلت متكفي
اصم جفي اعله حالي ومااشوف الناس
وبكيفي اشوكت مااريد افك جفي…
وابلع صوت بجيي واشرب الدمعات
وانكر كل عذابي ولوعـتي وانفي..
وما الف الجرح واتوسل اعله اضماد
ولآاريـد اليجيني ويتعب ابلفـــي
اظل بسنوني اعضهه ومااطلع الآه
اذا شفت النزف جروحي مشّفي
دنيه تعلمت مااشوف منج خيـــــر
حشميهـن عليّ همومج وكلفـــي
ياعين اشبعد ونخاف لترفيــــــــن
راح الراح كله براحتج رفـــي
دموع ابيوتنه البعناهه كَبل العوز
كلهه ديون هاي..اشنكَدر انوفي ؟!!
ركضْ اجدامنه الخلت اثر بالكَاع
من ذاك الوكتة والجدم متحفي
جان الماكو عدنه وكلشي عدنه اهواي
هسه هواي عدنه..وكلشي ميكفي!!
هسه اطفال عدنه بلايه لعابات
ويلعبون بخلكَنه اللعب من يلفــي.
رد مع اقتباس
