گــــالولك نســـاك ..
وصدگتهم ليــش ..
وانت الحـذرتني .. وگتلي عدوانك
أشصـــار وشختلف ..؟!
وأنكلبت الايات
بيهم صدگت .. وانطيت برهانك ..
ذبولك طعم ..
من حچوا عني وياك ..
حچايه وبالچذب بس .. باگوا السانك ..
ماحاجه امنگلك ..
آنه ماناسيك ..
لأن تعرف ابگلبي .. لهسه ماخانك ..
خوانك صفوا ..
لا والنبي ايغشوك ..
مثل خوان يوسف .. ذوله خوانك ..
ولك عدوان صدگ ..
آنه اخاف اعليك ..
يمشوك أبدرب .. ويضيع عنوانك..
تعال وخل اذكرك ..
ماضي الك وياي ..
غفت چم مره روحي .. ابين ذرعانك ..؟؟
وتعال وخل اذكرك ..
يمكن انت انسيت ..
شم عطر الهوى .. تلگاه ابقمصانك ..
وتعال وخل اشوفك ..
بالگلب نيشان ..
بس توصل لگلبي .. اتشوف نيشانك ..
ماذكرك بيه ..؟
ولاحرف بالشوگ ..؟
ولاطبعات چفي الفوگ بيبانك ..؟
يا نهر آنه مايك ..
وابجافي اتضيع ..
صبخه وجرح ..گاع اتصير احضانك ..
تتباهه بزرع ..
واچفوفك اموردات ..
بتعب اچفوف اديه .. وصار بستانك ..
على الباگوك ..
روح وشمر الذرعان ..
چا حظي عليه .. امسرفن اردانك ..؟!
چنت قديس ..
اشوفك ترهب ابملگاك ..
واطيور الترافه .. الگبل رهبانك ..
بس غروك ربعك ..
العن الشيطان ..
علامك صاحبت .. يفلان شيطانك ..
ليغرك اجناحك ..
اني احذرك شوف ..
نار البيه تحرگ .. ورق جنحانك ..
رد مع اقتباس
