هنا

[** pearl of the sea**]

مرحبا شلونكم ان شاءالله بخير؟؟

عندي سؤال او بالاحرى استفسار :


((لاب توبي متطلع بي الشبكات مال النت الا اربطه بالمباشر يعني مااكدر اكنك بس عـــالراوتر الا اربط الواير المباشر يلا يكنك ..
طبعا اني ممعرفه البلوتوث ويكلولي انتي لان نظامج اكس بي مو وندوز 7 فلازم تعرفين البلو توث يلا يكنك بدون واير))..


صحيح هذا الحجي ؟؟

[fairy touch]

هاي يرادلها السيد المشرف ...اني بالشبكات اموري مو تمام ...ان شالله ما يقصرون

[Samer]

السلام عليكم

مرسل البلوتوث (اللي يتعامل وية اشارة البلوتوث) يختلف تماما عن مرسل الوايرليس (الـ Wifi) .. كل واحد هو (كارت) منفصل بداخل الحاسبة و كل واحد يتعرف بتعريف خاص وحده ..ممكن يشتغل البلوتوث بدون وايرليس .. و ممكن يشتغل الوايرليس بدون البلوتوث ..لذلك الكلام اللي كايليه إلج مو صحيح.. هاي نقطة

النقطة اللاخ مو مهم شنو النظام اللي منصبته .. ما دام تعريفات أجزاء الحاسبة مالتج متوفر لهذا النظام .. مثل كارت الشاشة ، كارت الـ Lan .. كارت الوايرليس .. إلخ . .. و ممكن جدا إذا حاسبتج إصدار جديد.. ما تلكين تعريفات إلها تشتغل على (الاكس بي) ... ممكن تكون متوفرة للفيستا و السفن فقط .... بهذه الحالة تنصيب الويندوز 7 هو الخيار الأمثل لتعريف كل الكارتات مال حاسبتج (ما دام تعريفاته متوفرة من موقع الشركة مثل Dell او HP )

المشكلة اللي عندج وحدة من احتمالين:

1- أنه يكون كارت الوايرليس ما معرف عندج (كارت الـ Wifi) .. و يحتاج تنزليله او تلكيله تعريف . علمود تعرفيه معرف لو لا . تروحين على الـ Device manager (توصليلها كلك ايمن على الـ My computer و بعدين تختارين properties و من عدها تختارين Device manager .. و بعدين تشوفين اكو علامة صفرة عندج ضمن الاجهزة لو لا .. إذا اكو علامة صفرة أمام جهاز إسمه Network Controller .. يعني عندج الوايرليس ما معرف على الأكثر.

طريقة لاخ تعرفين بيها الوايرليس معرف لو لا... تروحين على My Network بالديسكتوب .. تسوين كلك ايمن و تختارين Properties علمو توصلين لنافذة الـ network connections راح يطلعلج ايقونات تخص كارتات الشبكات اللي منصبة عندج .. إذا ما لكيتي شي إسمه (Wireless Network Connection) .. يعني ما منصب عندج كارت الوايرليس .. على الاكثر راح تلكين بس الـ (Local Area Connection) .. اللي هو تسميه مباشر (واير) او إسمه LAN . و اسمه العلمي Ethernet Card


2- إذ جان معرف عندج الـ Wireless مال الحاسبة .. تروحين على الأيقونة مالته (الـ Wireless Network Connection) و تضغطين عليه دبل كلك .. علمود تطلعلج قائمة بالإشارات المتوفرة و منها إشارة الراوتر مالتج و تربطين عليها

إذا ما تطلعلج قائمة بالإشارات .. (رغم الأيقونة موجودة) .. ممكن جدا يكون الوايرليس مالتج طافي من خلال زر (إطفاء/تشغيل) الوايرليس بالحاسبة .. عادة يكون أما على جانب الحاسبة مجرد تشغليه .. او يكون ضمن الأزرار مال الكيبورد (بمجموعة أزرار الـ F1 , F2 , F3 ) .. مجرد تدوريه وين .. و تلكين عليه علامة أشارة وايرليس .. تضغطين عليه ضغطة وحدة علمود تشغليه .. او يجوز تحتاجين تضغطين على مفتاح (fn) بالكيبورد سوى وية زر الوايرليس (مثلا: fn وية F12) سوى بنفس الوقت علمود يشتغل الوايرليس و تطلعلج الشبكات

رجعيلي خبر .. و إذا ممكن صورة لنافذة الـ network connections إذا ما متأكدة .. ، نوع الحاسبة و موديلها علمود نلكيلها تعريف إذا مشكلة تعريف.. و اني بالخدمة

تحياتي

[spyman]

ما عندج اي مشكلة بالاتصال ولا بالتعريف .... ما دام يطلع عندج الروتر ماكو مشكلة بالتعريف

اما مسئلة المراكز ما تطلع الج هذا الشيء طبيعي لان سحب اللابتوب للوايرلس يكون ضعيف نسبياً ...

[** pearl of the sea**]

شكراً على المساعده ..
اخي سامر المشكله طلعت انو مامعرف الوايرليس..كل ما بالموضوع..
لاب توبي نوعه DELL vostro 1015

ان شاءالله تلكيلي حل لهالمشكله..

[Samer]

السلام عليكم

دوسي هنا

و افتحي الصفحة .. راح تشوفين شكولات حاسبتج .. هذه الصفحة هي صفحة تنزيل التعريفات لحاسبتج الـ DELL vostro 1015

هذا الرابط احفظيه عندج بالمفضلة .. لأن دائما تحتاجين تنزلين من عنده تعريفات لأجزاءالحاسبة مالتج .. سواء منصبة اكس بي او سفن

تروحين بقائمة (اصناف التعريفات) على Network و تحملين كل الدرايفات Drivers اللي تخص الـ Wireless ( تلكين بيها كلمة Wireless) .. مجرد تضغطين على زر Download اللي كبالها

الـ Application مال الوايرليس مو مهم ....بس تكدرين تحمليه و تنصبيه إذا حجمه قليل و يفيدج


بعد ما تنزلين الملفات اللي تخص الوايرليس .. نصبيها على حاسبتج و احتمال تحتاج ترسيت .. و إن شاء الله يشتغل الوايرليس(شوفي الخطوات فوك بردي الاول علمود تعرفيه تعرف لو لاع )

ودي

[** pearl of the sea**]

تسلم سامر كولش تعبتك وياي اسفه..الله يخليلك مينا الحلوة..

[ليش ستعجلت تدريني ماخون]

احسنت اخ سامر على هذي المعلومات المفيدة