بسم الله الرحمن الرحيم
السلام على صاحب السكينة
السلام على المدفون بالمدينة
السلام على المنصور المؤيد
السلام على ابي القاسم محمد بن عبد الله
ورحمته وبركاته ومغفرته ورضوانه
السلام عليكم احبتي ورحمة الله وبركاته ..
شعير ونخاله اوذره
يحيى العلاق
شعب طيب طيبته العمت عليه
بقه لابس مستحه الحد ماعره
ايشوفه بعيونه اليطعنه اومايگول
اوبدل مايبليه يدفن خنجره
ابعفا الله عما سلف جاب السنين
والسلف كل يوم يذبح منحره
كافي مو دمك تسكع عالرصيف
اوثگِل موتك كسر ظهر المگبره
اوظلت اطفالك يتامه ابلا معيل
كافي شبعو عفو عند المقدره
ذللك المحتل ترس صدرك رصاص
اوعلى جثتك كتب نرجو المعذره
اولأن بالقرآن آيات الجهاد
لزم قرآنك اوفرغ بيه سره
اعتمد لتثور عندك برلمان
مايقصر اي عمل يستنكره
واعدوك ابحصه من نفط الجنوب
تالي گمت الماي تشريه مشتره
ردو احلامك على ارفوف الحصار
والعذر بس الامان انوفره
اوهاي خمس سنين ماصار الامان
ادري يمته ايصير بعد الآخره
اوسيطره ابصف سيطره ابصف سيطرات
والوضع ماصار تحت السيطره
الشعب ناده ولاكن لاحياة
ضاگ بيه الحال حشم شاعره
اليّوَصِل الصوت ساكت ماله صوت
من بعد مافاز شال الحنجره
اوشوف انجازات مابعد السقوط
باوع التغيير شوف الغيره
الصيدليه الخافره منهج قديم
اجه عهد الطائرات الخافره
حصتك امن الموت توصل للسرير
واليفوته اليوم يرجعله السره
وذا تنصاب ابجرح بالك تحير
تلگه الف قناص فاتح متجره
والله يرحم ذيچ ايام الحصار
من طحنه اشعير ونخاله اوذره
هسه صاروخ اليفر رحّة البيت
يطحن الزلمه اوطفلهم والمره
صير نازح حتى يرضه الاحتلال
مايحب احياء ما متهجره
فرغولك ملعب اونصبو اخيام
جان غايتهم يسوونك كره
انته لاعب بالوسط لاعب اساس
والحكم باجر تنفخه الصافره
رد مع اقتباس
