بعدة الليل... يرسم صورتج علبال
يأول ضوة بدنياي ... يترس وحشة عيوني !!
يسالوفة أبتدت من أول الكاروك
لحد آخر نفس بيّة !!!
شوفيلج وانة الناطور
وأنتي الفضلج الغبشة
يلطيفج كبر ويّاي ... طول بطول
ويّة أحلامي يتمشّة !!
تهزّيني علكيفج لمّن تلولين
وأتمرجح على متونج ... رمش بطران
يعاند بالبجي ويغتاض
بس لسانج يغشّة
يلبصوتج سوالف ريف .... هاكد لامّة البكشة
ياحسبة سهر بالليل ... ضلّت شابكة ضنوني
من أصفن على متونج
يحط نورس على عيوني !!!!
وأحن واشتاك
ويردلي الزغر تذكار ... جان بديرتي بكدّي
رد بينة يدانك هور
جزانة الشيب سكتة وفات ... ريل ايّامنة يعدّي
دحدّر يابلم بالروج
كضّيت العمر خطّار ... ماطارش على البردي
رد بينة يدانك هور
بجتافي وشالة حيل ... مشتاكة لدفع مردي
شيرّد صباي ؟
وحبل صفناتج ... يشرني على وجه الباب
أعثر من بعد صوبين .... وعيونج ألي تفكّة
شيرّد صباي ؟
واتحمّة على موكد حضنج السهران
ويلفني الحنين وياج ... حدما تهفت الضنكة
فضيّة خلك جنتي وياي
حتى بونّتج ضحكة !!!!!
أرد دافن سلف لوجيت ... مرّة وطوّل غيابي !!!
يسر فركاج ... رّشة ماي بس بضهري من ينباح
تتكّدر الدنية شما عليج تدور
وانتي البالج المرتاح
همّج مايظل مطروح ... حدة المغرب وينزاح
شجّاية ولمن تدعين
بجفوفج سكف عرش الله هليلّاح
رد مع اقتباس
المشاركة الأصلية كتبت بواسطة مجنونة عيونك
