بمناسبة عودة البعوض
أنا والبك ( البعوض) وليس غيره
بما ان منزلي يقع على مشارف احدى البحيرات الصناعية التي انشأتها البلدية( عن غير قصد)
فأنا منذ ايام لم اذق طعم النوم بسبب الطن والون مال البك الي هلكني وسوا بيه هستريا وورم
كل شي بيه بدءا من عيوني وأجفاني الزهرية وصولا الى خدودي الطرية وانتهاءا باصابع اقدامي
المهلبية وجلدي صار مثل لوحة سريالية كلها فاحات فاحات وردية
بالله عليكم شلون يرهم الوردي ويه الجوزي؟؟؟؟؟؟؟؟؟
***********************
وبعد ايام من المعاناة المريرة وبعد استشارة (المواطنة المستراحة) زوجتي قررت بعد التوكل على الله شن حرب شعواء على البك بكل الاسلحة المتوفرة في الاسواق المحلية والتكنلوجيا الصينية
وتوجهت الى السوك ولسان حالي يكول ( أعلكها وعليه وعلى أعدائي )
وظليت أسأل واتطقس عن كل ما موجود ..... ووكفت يم محل يبيع مواد زراعية وشوفني صاحب المحل مبيد حشرات عبارة عن مسحوق بداخل جيس ووياه شيشة صغيره بيها سائل مثبت حتى يدوم المفعول ستشهر اني هم كيفت واشتريته وعلى وجهي ابتسامة خبيثة لاني تصورت الفلاكة الي راح تصير بالبك ههههههههههه
********************
اجيت على محل مال مواد كهربائية لكيت عنده مطكاكات كهربائية مال بك يدوية وثابتة بس اليدوية ارخص وهماتين شحن فأشتريت ثنتين حتى اني وزوجتي واحد يكبس والاخ يرفع ونلعب لعب (يا بوية شراح يصير بالبك اليوم؟)وهم لكيت عندة بلك يتخله بي مثل الصابونه وينفث المبيد بالجو وهم ريحتة معطر واشتريت وحدة ورجعت للبيت طاير من الفرح
********************
اول شي سويت شرح متكامل للمواطنة المستراحة زوجتي عن الانجاز الي حققته وقدرة الاسلحة الفتاكة الي اشتريتها .... خطية هي هم فرحت وراحت يم امها بين ما اني ارش المبيدات ونرجع العصر للبيت (لان ابو الزراعية كال اتركو البيت فد ساعتين حتى لا تتأثرون بالمواد الكيمياوية )
جبت سطلة وخليت بيها المسحوق وحطيت علي خمس لترات مي وظليت اخوط بيه وبعدين فرغت شيشة المثبت فوكاه وخطته واني ابتسم ابتسامة( توم القط لمن جان يحضر سم حتى يكتل جيري الفار) وخليت المطكاكات على الشحن ورجعت للمحلول حطيتة بالمرشة
وبلشت من برة البيت وعلحياطين وداير ما يدور الابواب والشبابيج ودخلت للبيت رشيت الزوايا كلهن شبعتهن ورشيت غرفة النوم ولحيت بيها (لغاية في نفس يعقوب)حتى خلف الكنتور وجوة الجربايه وبعدين رشيت المطبخ وكمت خليت هاي الي مثل الصابونة بالبلك وحطيتها بالكهرب وقفلت البواب ورحت للكهوة يم جماعتي واني كاعد يمهم واصفن واردد شعارات حماسية بيني وبين نفسي مثل (فليذهب البك الى الجحيم )(بك بك شيل ايدك مواطن تعبان ما يريدك)(وتذكرت نشيد قديم مال لاحت رؤوس الحراب) واغنية ام كلثوم يا اهلا بالمعارك
**********************
المهم رجعت المغرب للبيت ولكيت زوجتي هم جايه وشلنا الركدات نضرب بيهن البك وشكد حلو لمن يطكطكن وصارت صافية دافية لا طن ولا ون وعم الهدوء ........
سوينا عشا وتعشينا وشربنا جاي ابو الهيل احتفالا بالمناسبة والنصر العظيم وتوجهنا لغرفة النوم نطلع قهر الايام الي فاتت واحنا نتكلب وما نكدر ننام وشغلت السمفونيات(نغمات الشخير) التعبانية ونمت شلون نوم لذيذ وحار وطيب
********************
كعدت بنص الليل على صوت المواطنة مدري شبيها لكيتها يم المغسلة لازمه معدتها وتزوع(اجلكم الله)وتصيح
-ويلي يمة لحكيلي راح اموت
صحت بيها شبيج يا معوده وكعتي كلبي
كالت معدتي دتوجعني وراسي ديفتر ونفسي دتلعب .... اني رأسا لمعت ببالي فكرة (اكيد الطفل التعبان)صار حقيقة واقعة وكيفت وطرت من الفرح ورحت خابرت عمتي(امها)كتلها عمة ترة السالفة هلشكل كالت ميخالف وليدي لا تخاف انشا الله خير ولازم تنطيني بشارة(عبالك هي الي بشرتني بنت ... الذين )
بس وره ربع ساعة زادت حالتها سوء واضطريت اخابر الاسعاف الفوري ولمن وصل رحنا اخذنا امها رغم معارضة السايق والتدردم ماله ووصلنا المستشفى ودخلن هن علدكتورة واني بقيت بالممر واكف انتظر وكلي امل
*********************
جريت باكيت الجكاير وورثتلي جكارة وبديت احسبها للسالفة ماديا لكيت نفسي متورط (مميات- حفاظات-حليب-ادوية- - - الخ)لكيتها سالفة تعبانة
شو ما حسيت الا الدنيا افترت بيه ومعدتي عبالك بيها سجاجين ووكعت بالكاع ازوع(اجلكم الله) واجوي خطية المضمدين ركض شالوني وواحد منهم يكول :
- طاح حظك ... وصختلنا الممر بعد تونا غاسلينة اي مو احنا نشتغل بيت الخلفكم
بس اكيد اني سمعته غلط اعتقد هو جان يكول :
- اسم الله عليك خوية والف قل هو الله احد
وشفت نفسي مثل الطاير بالهوا ودا اباوع الدنيا كلها اضوية ونافورات شغالة والناس رايحة جاية والاطفال ديلعبون بالحدايق وشفت كهوة طرفنا والتلفزيون شغال وطلعت فد مذيعة تخبل دتذيع الاخبار وكالت جائنا توا ما يلي :
(علمت مصادرنا ان مجلس رئاسة الوزراء قرر في جلسته المنعقدة مساء هذا اليوم توزيع المبالغ الفائضة من عائدات النفط للعام المنصرم والبالغة 30 مليار دولار على المواطنين مع الحصة التموينية لهذا الشهر(
*********************
وكبت العيطة بين الناس بس اكو صوت مرية يمي تصيح-يبووووووو يبوووووووووو
فكيت عيوني لكيت امي واكفة يم راسي وتصيح- يبوووو سوتها بت فهيمة الخياطة وسممت الاكل لابني رادت تكتلة اي تريد تنتقم جيف طردتها من البيت
واذا اني بردهة الطوارئ ممدد والسيلان معلك بيدي واجاني الدكتور كال
- حالة تسمم بواسطة مواد كيمياوية الحمد لله وضعكم زين .... وراح الدكتور
اجاني المضمد وكال :
- يا الله عاد لا تستموت كوم اطلع احنا ما عدنا شغل عمل غير المغذي مالك
اني اكيد هم سمعته غلط لانه يمكن كال:
- الحمد لله على سلامتك عزيزي الله دفعها وانشا الله العافية عدك
***********************
وافتهمت اخيرا شنو الفلم ثاري احنا اتسممنا لان مواعين المطبخ صار عليها مبيد الي رشيته وبباب المستشفى علكت بين امي وعمتي وكل وحدة تتهم الطرف الاخر بمحاولة التسميم المتعمد وانفضحنا فضيحة واجوي الشرطة طلعونا برة ورزلونا رزالة زينة
**********************
واتضحلي صحة كلامي لمن كلت (علية وعلى اعدائي) و
وهكذا حقق البعوض نصرا من خلال هزيمته
*
رد مع اقتباس
