السلام عليكم
اليوم جبت ومضات جميله
ارجو يثبت منشور ومانمسح
لاتطالبني بأمر بي معجزات
لأن ماعندي گلب يتعذرك
تريد مني اذكرك شي مستحيل
غير كون انساك حته اذكرك
من چفك أغار لچفك ايلوح
أگص ايدك إذا لاحتها إيدك
أكتب ما أريدك تنشف الما
ينشگ دفتري وتبقه أريدك
بگلبي اتسابقوا لعبوا الحلوين
خسرت كلها بالدور البدائي
وانته بلا لعب صاعد على الكاس
بحلاتك ربك مصعدك نهائي
آني ماشايف مثل وجهك جميل
وهيچي مثل عيونك آني ماشفت
من گلتلي اهواك مدري شبية صار
هيچي واگف وحدي وبوحدي طحت
أگص الساني خاطر بعد ماحاچيك
خاطر ينتهي البينك وبيني
لگيت النوب عيني اسولف اوياك
گلي أشلون اگص السان عيني
ياباقة ورد أهديلك انته شلون
الورد منك خجل مايدخل السلة
لأن مثلك ورد منوجد في هالكون
إذا إنته الورد في عالمك كله
آنه من ظهرك شفت بيك الجمال
وجيت اشوفك حته اصدگ اضنوني
ومن درت وجهك علي وتبسميت
شكر من وجهك طفر بعيوني
تعال بكل وكت تلگاني موجود
بس كونك تجي مو ما تجيني
واذا ماجيتني هم تنحسب جاي
لأن موجود انته بوسط عيني
ناذر للوطن عمري وانه الممنون
وابيع الروح بارخص لو نزل سوگة
طابوگة اشتريت وماخذت دبدوب
خفت يوم الوطن يحتاج طابوگة
سكرت وگلت بلكي بسكري أنساك
صبيتك هموم بكاسي وشربتك
شربت الكاس كله وللچعب دگيت
حسبالي نسيتك بالچعب شفتك
تريد الناس اسولف وآنه كلي هموم
خانگني الدمع ماأگدر احچي
إذا حته الدمع من شافني بهالحال
لبس أسود علية وگام يبچي
بعيونك سحر يسجدله كل سحار
واليخزرك هلاك والله يستر
إذا برمضان تطلع انته فد يوم
تشوفك عيد كل الناس تفطر
مر بية نهر عطشان الك موت
يمته جروفي يرون بيك يمته
ماطاب الجرح لتشوفه ملموم
من گد الألم عظ اعله شفته
گلناله حلو وبس الله يدري شلون
صرنه عيون كلنه ومنه مانشبع
گلناله الشمس بس تطلع انته تغيب
عله اعناد الشمس كل ساعة ظل يطلع
إنته قمة بكلشي وبكلشي ملاك
وكلشي بيك مرتب وحسب الأصول
إنته غيرك من يمر توگفله ناس
وانته لو مريت توگفلك عقول
امن اعيونك أعرفك وافتهم شتگول
واقره بكل وضوح اشتكتب اعيونك
شلونك من تگلي الدنيه بية تطير
واعوف الدنيه كلها وأشبگ اشلونك
سلم من تمر ماتسوه دنياك
ولاتحمل زعل وتشيل غيضة
مو بيضة أطگ لو سلمت يوم
أطگ بگصتك عشرين بيضة
آنه احبك مو لأن انته حلو
چنت اظن گلبك حلو وحبيتك
ومن شفت گلبك مثل باقي الگلوب
خذت گلبي اوياك هالماجيتك
گتله احبك گال أدري
گتله وانته؟ گال مدري
گتله كون انته بمچاني
ومرة عانيت بكثر ماچنت اعاني
چاگلت اوه امداني
وامده الجابك علية
وامده اليمك خذاني
اشوية وخر
وامده الواگف گبالي
وامده الواگف وراني
تالي الليل اگلهم باچر انساك
أفز من غبشة الله واحچي بس بيك
بغيرك فكرت ردت آنه أنساك
طلع غيرك يشبهك فكرت بيك
يالكلچ براءة وكلشي يوصف بي
وتشوفچ اعيون الناس المْغمضة
الشارع بي صداع ايصير من تمشين
طوله ايگوم يفتر يردم ابعُرضه
فتت من باب بيتك والدمع سال
بچيت وطاح مني نظر عيني
عميت وردت أوصل عتبة البيت
إجتني العتبة من سمعت ونيني
أشوفچ مومثل ماشوف كل الناس
لأن رقة جمالچ عالأرض تحفة
وحذرچ وحدچ بالغرفة لتگعدين
بس تصفن لحسنچ توگع الغرفة
ردت أبچي بوداعك بس گلت هيهات
ماطخ راس الك يمخيب اضنوني
سيطرت اعله روحي وگلت الله اوياك
ماطاح الدمع بس طاحن اعيوني
كتاب انته انكتب كل شي حلو بيك
وما مليت منك من قريتك
لو أدري المكاتب منك تبيع
بعت الروح لجلك واشتريتك
رحت اعزي بيوم ميتلي قريب
ولو فتت يهواي أشوفنك ردت
وانته لمن جيت آنه بلا شعور
بالعزة آنه بأعلى صوتي هلهلت
يالهمسك غنه ويالصفنتك موال
وصفه لكل مريض يطيب اليسمعه
واظن سنتين واكثر حبلت امك بيك
لأن دقة جمالك مو شغل تسعة
لتگلي اعله مثلك ما أحصل وين
أشگر داخ منك حته كل اشگر
مو كلمن حلو ويلمع تحضنه الناس
هم كلش حلو وهم يلمع الخنجر
أگلك شغلة بس ماتزعل اوياي
گبل ماگول أحلف حتى اگلك
سبيت امة محمد بالجمال البيك
اشايل من جمال اشتعلوا اهلك
بده العام الدراسي وكيفت حيل
حبيبي اليوم راح ايروح مدرسته
أمشط شعري گمت وچلب اوياي
شلعته وبالعجل رحت آنه قابلته
أبيض مثلك ابيض ماكو بالكون
ولايحمل بياضك أيًٍ من كان
من اللبن ماخذ لون الخدود
لذلك من اضوگك ابقه نعسان
أيس لاتضن ابعيني گطرة ماي
أبچيها عليك وتغرگ اخدودي
عنودي وما أحن لو تنزف العينين
وبضنك لاتضن ايحن العنودي
صح آنه چبير وعمري بالعشرين
أول مرة احس بعيد ميلادي
حسيته صدگ من صرتي إنتي وياي
وصارت كلها حلوة اوياچ أعيادي
مركز للحسن وجناتك الحلوات
وشفافك للنحل صارن خلية
تتأثر الوجنة بخطوتك عالگاع
وتهتز كالجلي گد مـا طرية
عندك نور يشبه نور الهلال
يعني انته گمر وهلال تنقاس
إصعد فوگ بيتك باچر وشوف
إذا مو عگب باچر تفطر الناس
آنه من شفتك حبيبي توهميت
نور وجهك هذا لو شمس الظهر
آنه لو بيدي لسويلك مقام
ومو خمس مرات اصليلك عشر
اعيوني ابغير رسمك كرهن الشوف
اوعندي اخلاف عينك مالهن داعي
ولأن بذراعي اشمن ريحتك دوم
تجي ساعات افكر آكل اذراعي
أحذرك لو تريد اسوي عركة اوياي
ماشايفني حقك لمن اتعارك
أشگ حلگك ابوسة ومنك آخذ ثار
بلكي تهد علية وتاخذ بثارك
أحبك حب ولا مر اعله إنسان
تدري شگد احبك راح افهمك
حلمت آنه بالجنة وانته بالنار
أكفر گمت حته انتقل يمك
على نار انتظر ومتاني الاحباب
واندگ باب بيتي والگلب ذاب
اطلعت للباب عود الباب افتحه
لگيت الباب طالع فاتح الباب
ابوطنة الضحكة شردت من الحلوگ
والعيدية دوم مزاعله الإيد
يجينه العيد چان ومامش اهدوم
هسه اهدوم عدنه ومايجي العيد
شگد شايف شفايف فوگهن شامات
مثل شفتك أبد ما ملتقي بشفة
تكض اللفة تاكل من تحس بجوع
من كثر الحلاوة تعضك اللفة
يا أول عشگ ياخذني لبعيد
يا أول محب يحتل كياني
زعلت اوياك مرة وخلصت اوياك
وآني اوياك صار وطلگاني
آنه البيت عندي وكلشي حاويه
بالايجار الوكت گعدني بالدار
وگلت بگليبي أسكن مايهمني البيت
طلع حتى الگلب گاعد بالأيجار
كل حلو ينباس بس انته الوحيد
دخنه بيك وعدنه صارت هوسة
خدك ايكهرب واليبوسه يطيح
گمنه من ابعيد ناخذ بوسة
چم محب حاول صدگ ينسه الحبيب
وآنه من انساك اظل دايخ عليك
إنته حبك يختلف فد شي غريب
حته نسيانك حلو يذكرني بيك
عذاب البرزخ آنه تعذبت بيك
ولكن بالگلب ظل حبك ايزيد
واذا گالولي عوفه وجنة ننطيك
أريدن برزخك أي جنة ماريد
أمس اباب بيتك ضاعت الروح
واجيت آنه أدور هم شفتها
أظن لمن گعدنة بعتبة الباب
رحت آنه وبقت يمك عفتها
جبتلي گلب ثاني بلكت انساك
صارتلي مصيبة وحبك الثاني
عليك تعاركوا هذا كتل ذاك
زعل گلبي اعله گلبي وموتاني
شميتك گبل ماقاومت وياي
ولميتك نفس واتعثر بلمك
وهسه تريد اشمك خايف آنه اعليك
يمكن راح اخلصك لمن اشتمك
سألوني وتهت من رادوا يسألون
ياهو انته بهويتك ياإسم شلته
جاوبت بصراحة وچنت افكر بيك
نسيت اسمي الثلاثي وجاوبت انته
إذا عينك سفينة تسابق الإعصار
أكيد السفن يمها بلا وشك ترسي
ولأن خايف تحسدك ياحبيبي الناس
عليك الفلق أقره وآية الكرسي
جمالك معجزة وخدين مو خدين
كلش ضاويات ونورهن يسطع
وهيه المعجزة بخدودك الحلوات
لأن أول گمر وية الشمس يطلع
بس اوياك احسن روحي تريد
وغيرك ماشفت حته آنه اريدن
واگف عالمنصة ومن جبت طاريك
گمت لروحي اصفگ حتى اعيدن
چنت آنه اويه غيرك كلي اجروح
أتعنه المصايب والچم اجروحي
لكن منعرفتك گمت احب الروح
ومن گد ماأحبك گمت احب روحي
شاعر عاش عمره بحسرة العوز
وشاعر بالترف من عاش عمره
شوف انته الفرق مابين الاثنين
ياشاعر تحس من تقره شعره
بالحلم چن نهر دجلة بلايه ماي
ناشف ومرمية بي جثة قتيل
واسألت گالولي شارد للفرات
لأن شاف ابمايه ورقة اتگول شيل
أحب روحي گمت شعلية بالناس
خل اللي يگول ايگول اناني
چي غيرك بعد ما حبت الروح
أحب آني گمت چي احبك آني
أگول مزاعلك حته آنه اراضيك
لأن وكت الصلح تغفه ايدي بيدك
واگلك ما أريدك خاطر اتشوف
أحبك حته لمن ما أريدك
ماحب غيري أحد يمشي وياك
أغار اعليك حته من خيالي
كون اصعد واضمك فوگ النجوم
حته الناس جوه وإنته عالي
من گالوا إجه الكل طلعوا ايكرضون
والبيبان طلعت هيه والعتبة
ومن گد ماحلو لزموا سرة ايسألوه
شنهي انته حلاتك صدگ لو چذبة
كون ايصير كلشي بعمري مگلوب
وارضه بكل شي يطلع عن أصوله
كون اول حياتي الكبر والشيب
وآخر لحظة من عمري الطفولة
چنت محتاج اشوفك من چنت
ماشوف
ردتك عين الية بوكت عازة
گزازة انته واضمك بين العيون
وياعين التغمض عالگزازة
كتبت اسمك بصفحة حايط البيت
ومن حس بحنانك صار مسكين
طاح البيت لمن إنته مريت
ولك حبك سطر حته الحياطين
أحس بطعم شوگك وانته زعلان
ومن تبعد جمالك أكثر ايزيد
يجيني العيد أفرح ألبس الوان
وانته من يجيك يلبسك العيد
منهو الگالك بيك آنه مجنون
ومنهو الگالك ماكو مثالك
گبل لتروح خل اتراهن اوياك
من باچر أحب انته بدالك
الگالك إنته حلو ماأنصفاك
وانته شفاف وتموت من اللمس
مغيمة خايب وانته مايع چاشلون
يمكن انته اتموت لوتطلع شمس
سولفلي اعله كيفك حته اعرف البيك
وانته بكيفك احچي امنين ماتبدي
رايد كلمة منك خايب انته اشبيك
وآنه اباب حلگك گاعد امجدي
بحلاتك سيد وينگالك مولاي
ومن گد مادخت گتلك يمولاتي
شفتك غوشت عيني وگمت ماشوف
درت وجهي صفح شافتك اذاناتي
من گد ماحلو محد مشه اوياك
والماشاك هم ماظل يماشيك
إهو ماشاف دربة إتعثر وطاح
لإن گظاها بس ايعاين اعليك
مو بس آني أذوب وأخدر إعليك
إمن احلم بيك حته فراشي يخدر
منو گال الگمر يفتر على الگاع
الگمر شافك وداخ وگام يفتر
حلو وتتگلب ويختلف وضعك
وگذلتك طايرة وتلعب على الريح
الوحيد انته حلو ومحد يتبعك
لأن من تمر كلها تدوخ وتطيح
اسهامك عذبني كطعني
وارافس واضحكت چي ضحك سنك
اشردت منك أحس مرتاح لني
طلعت بيك آنه شارد موش منك
هوه غيرك من اشمنه أموت
لكن آنه ارجع عدل لو شم هواك
تدري آنه اشگد احبنك بحيث
من تهد انته علي افزع وراك
عليك الگلب ثابت قفل مقفول
وأموت وما أدور عن بديلك
مو وكت الصلاة بس گمت اصلي
أصلي لخاطرك حته أندعيلك
وي محمد انته تتغدة واموت
والله حاير بيك شحچيلك شگول
من يشوف اطفال دمها اعله الرصيف
إنته گلي اشلون يتغده الرسول
يوم الاسود يوم گلبي ارتبط بيك
وساعة السودة اعله دربك من فتت
متت منك يالچنت ميت عليك
يعني مرتين آنه من أجلك متت
ما أستثني منك كلشي بيك اهواه
وماأستثني مني بكلشي احبنك
إذا وجهي اعله كيف اختاره آنه ايصير
ثق أختار وجهك حته اشبهنك
من درت عينك شفت والله عيون
ومن درت الوجه شفت الشمس طلعت
ومن درت الشعر رأسا اجانه الليل
لأن خافت شمسنه وبالعجل شلعت
حرت مابين شفتك والجمال البيك
متگلي اشايل من خرة بحظك
لو شافوا حلو تعضعض شفتها الناس
ومن اتشوفه إنته الشفة لتعضك
شيجيبك يباچر والتقي اوياك
واشيلنك گلب مابين الاضلوع
واذا باچر إجه وما جابك اوياه
أكض باچر واشيلنه من الاسبوع
أحبك ماأحبك آنه ميت بيك
وگلبي بغير حبك يعلن افلاسه
أمشيلك واجيك وماأخاف الليل
ولو دربك بعيد وبيه علاسه
ثق لو بالعراق ايصير طوفان
ونبي الله نوح ايرد علينه
يباوع بالبشر مايلگه إنسان
ويصعد وحده وتمشي السفينة
أعدك دوم أول من اعد اعزاز
وانته بيا مكان تحطني من اتعد
يالأنشد عليك شما گصيت اوياي
چا هلبت علية وبالچذب تنشد
تدري السبب ليش اعليك ماأنشد
لأن سلوة دليلي ورسمك بعيني
وبس يغمض جفنها إلك أشتاگ
وانته بكل صلافة تگلي ناسيني
هم تدري صرت مني اقرب امن الروح
لأن إنته النفس اليصعد وينزل
وما أعرف مكانك من اعد اعزاز
بس كلش قليل بحقك الأول
آنه أدري شگد تحبني
بكثر ماضاگ الوطن طعم الأمان
وانته تدري شگد احبك؟
بكثر راتب كل عضو بالبرلمان
ماأسولف بيك واحسبلك حساب
آنه أعرف وزنك ومقياسك
إنته أصلا تافه وراسك زغير
وبس اسولف بيك اكبر راسك
أشد بجروح حبك واشتهي انساك
واگول ارتاح لو مرة نسيتك
نسيتك عود لحظة وكيفت بيك
واگف بالدمع عالخد لگيتك
شفتك ماگمتلي بساعة المريت
بية الصوچ وانته من الذنب خالي
خدرانات أدري من التعب رجليك
هلگد ماتروح وترجع ابالي
مدري ليش اعيونك ادوخني بيك
هيه نظرة وينخطف كل لوني
مدري بعيونك سحر يسحرني ليك
مدري هيه مچلبة بيك اعيوني
أسلاك وحواجز واعمدت دخان
مامعقولة يابغداد هاي انتي
گبل چان الورد مالي الشوارع بيچ
هسه بكل متر مزروع تي أن تي
شوف اللعب عدهم شوف الفنون
منو يگدر عليهم برشلونة
يلزم طوبة ميسي ايخوط بالگول
والحارس يموت ويشيعونه
ميت بيك ميت والنفس خلصان
واتشاهد إذا مريت بية
حالي اوياك هيچي وإنته موجود
چا شيصير من تبعد علية
بابك ما أدگه وإنتهى الموضوع
وگلبي اعله البعد گتلك قنعته
واذا مرة لگيت الباب مشلوع
يعني الشوگ الك هزني وشلعته
گلت باچر أجيك وفرحت الروح
وگلبي من الفرح وياي طاير
شفت باچر بعيد وطول اوياي
رحت آنه اعلمودك جبت باچر
خليتك رسم وعيوني ترسم بيك
وغير عيوني ماواحد يرسمك
صاحوني شكثر بسمي وچنت ناسيه
وگلتلهم نعم من صاحوا اسمك
هاك الروح اخذها وآنه ممنون
ماأنطيك عيني وماأعوفك
مو بخلا عليك وشنهي العيون
إذا أنطيك عيني ابيش اشوفك
مثل لهفة سجين ايتاني الافراج
عليك آنه صرت صدگني ملهوف
واذا گتلك أحبك آنه غلطان
لأن حته الأحبك ناقصة حروف
تعبت اوياك آنه وحيل مليت
وگتله لگلبي كافي وماأريده
بديت بصفحة بيضة وگلت أنساك
طويت الصفحة شفتك بالجديدة
أغار اعليك من گلبي والعيون
لذلك آنه حاير وين اشيلك
وحقي ماأجيلك آنه معذور
أغار اعليك مني وماأجيلك
ابطولة أحله واحد إحنه فوزناك
بطل تستاهل انته الكاس چاگوه
لأن ياهو اليشوفك گال هذا ايفوز
والماشايفك هم گال إي هوه
إنته بعيوني وبعدني ابچي عليك
شلون لو يوم اطلعت من عيني
من كثر حبك دخت كلش بحيث
إنته أندلك وادور ويني
ردت احبك واستحيت وبطلت
خايف اشما أوفي ماترضالي
لأن لجل اهواي مرة اتخبلت
وگال موشي ومارضه اعله اخبالي
گلبت بوراقي بس اسمك لگيت
وماكو غير اسمك إسم بوراقي
كلها گالت راقي عنك من اجيت
وكلها گالت ماكو غيرك راقي
الحكومة انطت شعبها ارقام وارقام
حته ايخابر ويشرح اهمومه
شعب خارج نطاق التغطية ايعيش
إذن شيسوي بارقام الحكومة
ماأشوف شگد علي مروا ألوف
گلها مو بالبال وانته ابالي
انته بس اشما ردت عنك ألوف
اشما أفر راسي تصير اگبالي
غيري ماشافك وغيرك ماأشوف
إنته كل الكون تتراوالي
إنته لو مو آنه مالك كل وجود
وآنه لو مو إنته أعمه شحالي
آنه لو جيتك أجيلك جاري ماي
واشيكضه الماي گلي لو جره
وعنك آنه اشما رحت تلگاني جاي
من كثر ماحبك ارجع لي وره
آنه مدري اشلون ظلت بية روح
من خذنك بالحلم ذرعاني
أحچي بيك الساني ماسمعني صوت
ضل عليك ايغار مني لساني
مابدلك لأن ربك أمرني
إذا يخلقلي ثاني ايجوز ابدلك
واذا بدلتك آني افترض فد يوم
هم اكره بديلك حته اردلك
أحبك حب ولامر اعله إنسان
تدري اشگد احبك راح اگلك
لو إنته حبل وتشد رگبتي
واحس بروحي تطلع ماأفلك
گبل چنت آنه احبك چنت دايخ بيك
أحبك حب نظيف وخالي من الغش
بس هسه مااحبك هسه اموت اعليك
مو كلش أحبك زدت عالكلش
من ظيم العلي ظليت ابيع اهموم
واسعار الهموم مسجلة بخدي
الرايد حزن ياخذ حزن ويروح
والرايد فرح يعذرني ماعندي
يومية الصبح أسمع خبر موزين
ويومية العصر أسمع فجيعة
عراق وكلك اسود حته الاخبار
الابيض بيك بس وجه المذيعة
آية من الجمال ويصعب التفسير
وشنو آنه وافسر للخلگ آية
إجه مره گعد يم المراية احتار
دنت روحه اعله روحه وباس المراية
ماندگ اعله الخشب لمن تفوت
نضرب اعله الوجه مدري شبينه
تحتيي الموته ولا واحد يموت
لو تجي شفافك اتبوس بينه
اسنين الم بشعرك وشعرك طويل
الله ياشعرك يتعب متوني
ربعه لميته وبعد ماظلي حيل
لو ألمن بعد تعمه عيوني
مرة مدري اشبية جيت امشي وراك
جيت اشوف الناس الي يحبونك
حقها هاي الناس مجنونة بهواك
تغار عينك لو تشوف اعيونك
من تفتح عين تضوي دنيتي
من تفتح ثنين نار وتشتعل
گلت خل اوصف جمالك يالحلو
وانته شيوصفك إذا تكتل كتل
لاتظن انساك يالرايد تغيب
ولاتظن اطيب گلبي اجروحه
إنته روحي اتريد اكرهك مستحيل
وهم شفتلك بشر يكره روحه
الناس تخاف ماتحمل هويات
الهوية بجيبهم صارت منية
ذبوها المنية وطلعوا الناس
لگوهم جثث مجهولة الهوية
هذوله من طغوا صحنه لهذولاك
أجو عالصوت فوراً وانتخوله
واجت نفس الوجوه وذولة ذولاك
نصيح المن ونخلص من هذوله
دمك نفس دمي وثبت بالتحليل
وچذب لا إنته اخوي ولا إبن عمي
صرت نفس الفصيلة وياي تعرف ليش
لان خلصت عمرك تشرب بدمي
عشرة اويه المناية ورفگت ادروب
مثل عشرة شذر وية المحابس
اتركن ماي النهر ماتغفه عالماي
على اگبور الشباب اتحط نوارس
علامة بكل درب صرنالك شلون
تمر وتگول ماشفت العلامة
يتامه وننتظر جيتك واذا جيت
يبين العيد بوجوه اليتامة
بعيد الله الچبير اتعيد الناس
وگبل العيد كلها اتخيط هدوم
وانه بكل عيد اظل مدنگ الراس
وادية مزرفة امن خياط الهموم
إذا شمسين تطلع كارثة اصير
وجمالك هذا گلي منين جبته
اتفق وية الشمس لدوخ الناس
لوتطلع شمس لوتطلع انته
حبا بالشعب واتحده الارهاب
وعن هذا كلامي آنه مسؤول
گطعت الكهربا عنكم يالاحباب
ماأرضه عراقي يموت منتول
ملينه الخطب ملينه الاعذار
صدگني بعد عذرك ممقبول
إذا عندك بقت ذرة كرامة
عزلها الوزارة وشيل التيول
مو صوچ البلم من غرگ الناس
الناس أصلا هيه غرگانة
ولاصوچ الحرامي الباگ هالبيت
راعي البيت نام وناسي بيبانه
حط اذنك على گلب المسلم
وركز واسمع كلشي زين
متأكد من تسمع گلبه
اتسمعه يدگ حسين حسين
إذا ناوي تحب وتكون ولهان
لاتخفي خجل بيك المشاعر
واذا قصدك تحبني كون يفلان
حبني انسان لتحبني كشاعر
من مرنه الشته وماعدنه قمصان
ندفه على اوراق الجرايد
وماننشر بعد بس نحفظ اشعار
شفنه النار تاكل بالقصايد
بس باوع علي وتبين الاعذار
مامحتاج منك كلمة تتعذر
من وجهك واعرفك بيك محتار
معقولة الغدر مايعرف الخنجر
مرت سنة من العمر مرت گبلها سنين
نتمنه چنه الكبر بس هسه متندمين
جبنه العمر ننتظر قانعنه چان الصبر
باچر يگول الفرح والباچر متانين
گاعد بس اشوفك إيد فوگ الإيد
ومفتون بجمالك والگلب يسعر
تگرب يمي خدك وآنه اگلك روح
أخافن بس ابوسك يصعد السكر
من اول مشفتچ وآنه هايم بيچ
دخلتي بگلبي شبسرعة سكنتينه
عيد الحب يعيد بينه اظن بس يوم
أشو وياچ كل عمري فلنتينه
المثلك مايخلي تشوفه عين الناس
يظم روحه ميطلع بالشهر ساعة
لأن اتعم علينه وملحدين انصير
إذا شفناك نكفر حته بالطاعة
لاتوگف گبالي وتدري كلش زين
امن اشوفنك اتلعثم كلي وي كلي
ولون عندي جمالك والترافة البيك
أموتها الشباب وزلم ماخلي
راضي آنه بقسمتي وشاكر اهل البيت
وماريد المكان النفسك تقبله
يامعمل كراسي وياحكومة خير
فدوة الشعب رايد حته لو طبلة
بخيت الشاف وجهك لحظة باليوم
جمال البيك عجبة يوگع بساع
لتلوم الگلب مو وحدة معجب بيك
إذا بچعوب رجلك معجبة الگاع
مجنون بجمالك آنه ياقيس
وماتوصل جمالك ليلى بالكون
من اتفوت ليلى اتشلع الگلوب
وانته اويه الگلوب اتشلع اعيون
لاتصعد درج يالكلشي مايع بيك
بالله اعله الدرج وطشرت كلك
شعدك عالسطح والشمس تكتل فوگ
لاتصعد نصيح السطح ينزلك
يالرايد تسافر مني مليت
واحسك ياترف من يمي طافر
لواشنطن تسافر انته ميصير
واشنطن إلك لازم تسافر
أكرهنه اليظل يدلل اوياي
بس انته ولك يعجب دلالك
انشلع گلبي بجمالك شحچي وياك
إذا مشلوع گلبك من جمالك
صديقي ايبيع طرشي وواگف السوگ
وگتله شبيك باقي وهوه يمشي
ولك صورة مهند حطها عالچيس
مو بس يمشي صدگ يركض الطرشي
ماأكتب قصيدة اعليك للدوم
قلمي اوياك ابد ماگعد حظه
باول بيت أكتب وانته عالبال
ومن اسمك أكتبه تصير ومضة
أخاف اعليك حته امن الهوه الهاب
وگضيت العمر كله اعليك خايف
شفتين البشر تملك بالوجوه
وانته منين ماگلبك شفايف
ياكلشي وكلاشي ويااشكال ارناگ
طفل گلبي تعده وشاف دكانك
ظل واگف ابابك گتله اخذ شتريد
شو رادك شلع وي قطعة اعلانك
اختصر ربك بعينك كل جمال الكون
وبخدودك ترافة الماحواها انسان
موش السان واحد يكفي يوصف بيك
اليوصفك بعد يرادله الف السان
يمن بيك الجمال اتعده الحدود
ومن خدك خذوا لمعات النجوم
نحضر اهدوم حلوة لخاطر العيد
وانته العيد لجلك يشتري هدوم
وي گلبي امن اسولف تسمع انته شلون
چنت وين انته گاعد والحچي اسمعته
حيرني الأمر بس طلع بية الصوچ
أسولف للگلب والگلب ثاري انته
شگگت الرسايل حته أنساك
ومن بالي شلت كل العناوين
لگيت اسمك على الحيطان مكتوب
أدري شلون افلشها الحياطين
صفات البيك ماشايلها إنسان
ولاتگدر على اوصافك قصيدة
العسل لو يوم صدفة اتلاگه وياك
يمد ايده عليك ويلحس ايده
رئيس الدولة شاعر لو يصحله ايصير
لأن شاهد بعينه وعاين الحالة
تمثال الرئيس انداس بالرجلين
والشاعر بقه وماطاح تمثاله
أبعد ياحزن خليني مرة ارتاح
خل مرة بحياتي أفرح بروحي
جبت اسنين عمري بس اصب ادموع
أشل اجروح غيري وأنزف جروحي
مسجون الصدگ ياناس تدرون
وخذوا كل الچذب طلقوا سراحه
كل تعبان گالوا يبقه تعبان
والمرتاح يحتاج استراحة
انته يالانواع بيك من الجمال
گلي هم تنباع حته آنه اشتريك
يم المراية تجي تباوع الناس
وانته المراية تجي تباوع عليك
وصل حبي إلك حد ماهو معقول
بحيث اوياي إنته وآنه مشتاگ
تشابگني وتشاقيني واشاقيك
واصيح الله اكبر بسك فراگ
من گد ماحلو من تطلع ايخطفوك
وكل صيف التمره ينگلب أشه
شفت عكس البشر لو حطت الرجلين
الشوارع بيك هيه تگوم تتمشه
إنته بلايه صوت معذب الولهان
واذا أحد يسمعك مات هالأحد
وآنه بغير صوتك شالع الإذنين
واحس آنه بغيابك ماكو چن محد
إنته بلايه آنه محد انصير
وآنه بلايه إنته أبقه محد
مو حزورة هاي تريد تفسير
إنته وآنه واحد يعني ننعد
ماترهملي بس تفصال احس بيك
ومر تكتل واضوگنك اشمحلاك
هله بجيتك أصيح وإنته ماجاي
واقشمرني واگوم اشباگ وياك
يمي بس صعب مو سهل ينلاح
وافكر بيه دايخ يمته الوحه
من گد ماحلو ومدوخ الناس
من گد ماحلو داخ اعله روحه
تظل انته الهوه ونتنفسك دوم
ودنيانه حبيبي انته شمسها
گبال المراية تجي وتتعدل الناس
والمراية گبالك تعدل نفسها
رقيق انته وحلو شخصك يشفاف
يالعينك بحر وسهام رمشك
شما وصفك حبيبي مقصر اوياك
إذا حظنك إلك رايد يحظنك
لحيت اعله ابويه وگتله بيع البيت
يمهم بيت بويه وخاف يتأجر
فرح والله أبويه وگام يطي الوان
طلع حته أبويه اعليچ هم يفتر
السر بمحبتك من اريد انساك
شما أنساك احبك أكثر وأكثر
أنسه وأنشغل وبعزة النسيان
أتذكر نسيتك وارجع اتذكر
إذا ساس البشر من الرمل والطين
إنته من الذهب بس منصنع ساسك
واذا تسعة من عشرة ليوسف الحلوين
إنته العشرة كلها بشعرة من راسك
تگدر بچم فلس تشري المستحيل
بس تره الأخلاق ماإلها سعر
سلم القمة يريد العنده حيل
ويصعد بأخلاق بعدين الشعر
تعرف كلشي بية وماعرفت اشبيك
لغز حلك لغز من يگدر يحلك
راح اشرد واجيك ومدري ليش الخوف
خاف تخاف مني بسدك اختلك
أگولن راح اسولف كلشي من الگاك
واصفن وانشده من اگعد بگربك
هلگد ماأحبك خلص حته الشوگ
ماحبك گمت من كثر ماحبك
يلنك مو مثل كلمن مشه اعله الگاع
ولا وصفك سهل لمن يوصفونك
من ضحكة عيونك شفنه وجه العيد
چا شنشوف لمن تضحك اسنونك
مادامك عدل ماشيها لتخاف
من خصمك وابد لتشيل همه
بس الحذر واجب لأن نوبات
تره الرجلين منهم تجي الحمه
مو كلمن يدگلك صدره وفاي
ولا كل أخ صدگ أخ ايتسمه
أحيانا عدوك ينصح اوياك
وبزادك أخوك ايخلي سمه
كتبت اسمك اعناد بورقة الشمات
گالوا ينمسح وتراهنت يبقه
رادوا يمسحونك بلكت آنه انساك
حروفك چلبت وانمسحت الورقة
ربع حبي يعادل كل اللي يحبون
ونص حبي إلك ماحبتك أمك
من تنجرح إنته يسيل منك دم
دروح افحص وشوفه دمي لو دمك
إذا فعلا تحبني هذا بيتي گريب
جيب اهلك تعال ويالله خطبوني
ولتگلي تعارف نرتبط بعدين
تره صارت قديمة وداعت عيوني
من جاني الخبر گالولي إنته هنا
تمنيتك بگربي وحيل اشمك
وبلهفة إجيتك واسرع من الصوت
لگيت گليبي واصل گبلي يمك
إذا بس مرة احبك كلشي ماسويت
واذا مليون احبك يعني ماحبك
يمعود دخفف من جمال البيك
العالم من جمالك گامت اسبك
لأن مشتاگلك قررت احاچيك
وعليك آنه اسألت كل ضني ألگاك
وگفت اباب بيتك عود اتانيك
شفت ضلي طلع يتمشه وياك
اويه غيرك بالحچي من احچي استاد
وافلت بالحچي من احچي وياك
تسواني وتسوى الراح والجاي
وتسوه الكلشي إنته وحته تسواك
اشلعت گلبي واگل الناس مرتاح
واحس آنه صرت بيدك مراجيح
وسلني تمرجحك بيه صرت خيط
وافكر بيك خاف انگطع واطيح
من كثر الحلاة تشرگ لهات الناس
واليشرگ يصيح الماي الحگوني
وآنه شلون بية من حلات البيك
ماشرگت لهاتي شرگت اعيوني
شفتك مشتعل ردت آنه اطفيك
ولأن رجلية ميته ازحوف اجيتك
ومشلولة الإدين وصعبة اشيل الماي
افتحت شريان گلبي وبيه طفيتك
إذا موبيك اسولف يعني ماموجود
لأن بس بيك اسولف كل وكت آنه
تدري انته بمكانك بية وين ايصير
بس شوية اوخر تطلع اهنانه
يبو شعر الذهب لاتمر بالبستان
لأن تصفن بطولك هالنواعير
يوسف من جماله ابير ذبوه
عجب لي هسه اخوتك مالگوا بير
يالكلك حلو وبالحسن ماتنقاس
وتنگط عسل من جدمك لراسك
قيس انته النحل شافك خطف مريت
دنت نفسه عليك من الحلگ باسك
شيرسمون منك إنته مامرسوم
سراب تصير بعيون الينظرونك
رادوا حاولوا بس تدري من رسموك
خيط ومسطرة وماجابوا عيونك
أمس روحي بشقة ضلت تسب بيك
أبچيها ردت گمت الچم جروحي
وتعاركت اويه روحي وصارت ازماط
ومن گد ما أحبك طلعت روحي
خطية اعيوني شبگت طيفك بنوم
صحيت وردت افكها مخيطة اخياط
نفط وادموع الك رشيت الهدوم
فرحني تعال بعود شخاط
كلش دخت بيك منين مخلوق
إذا من طين اشكن كلش بهاي
كلها بماي تسبح تنضف الناس
ومن ايلوح جسمك ينضف الماي
نضحك بالچذب ونضمضم الدمعات
ومكابر نشد احزامنه البايد
چم دوب الصبر نگضي العمر صيام
والعيد اليمرنه اتقشمر انعايد
شفت حسنك متت كلش وانتهيت
وگمت افر بيدي ولك خايب شفر
الشامة لبخدك ولك مو شامة هاي
هاي آنه ابوستك ماخذ صفر
يالوجهك بالشمس من وصفوه
والشعر چن الشعاع ونوره
گال خل ناخذ صور للذكريات
گتله وجهك يحرگلنه الصورة
بيه كل التعب من هذا الزمان
تعب أكبر من حدودي وطاقتي
ردت آخذ راحتي مرة ابتليت
طلع واحد غيري ماخذ راحتي
آنه دوم الهج بإسمك مانسيت
وصار حبك بيه أجمل سولة
وحته من گد ماگمت أصفن عليك
وحدة من اعيوني صارت حولة
حلو كلك حلو بس احله مابيك
محد بالحسن شايل صفاتك
العسل بس العسل يتشابه اوياك
لأن شافك حلو صار بحلاتك
عفتك بالشمس حته اسمر اتصير
واعيون الحواسد تگطع النظرة
رديت ارد اشوفك من وصلت الگيت
وجهك ماتغير والشمس سمرة
من جمالك كلها وگفت
وآنه گاعد مستريح
مو لأن مامنتبهلك
لأن بس اوگف أطيح
خطار الحزن يومية بالبيت
ولامرة الفرح مر بية خطار
وعزيمة للفرح فد مرة سويت
تيه باب بيتي وراح للجار
أحبك كلمة بس بلساني مانتگال
أتهجاها گوة ويمك انساها
أشوفك أنسه روحي وانسه كل الكون
چا هالكلمة هاي شلون أقراها
ماأدري شيصير بحالي لو مريت
أتراعش أگوم وعيني ماتغفه
ومن الزم چفوفك أبرد بتموز
چا بية شيصير امن الزم الشفة
حاچيت الگمر بالظهر گتله اشبيك
شمالك بالصبح ماتطلع شوية
جاوبني حبيبك للدوام ايروح
وماترهم تلمنه اثنين صبحية
موش اعيون عدنك صدگ اولايات
تفر بيها القوافي والشعر يبحر
ردت مرة أوصف اعيونك احتاريت
بديت برمش منك خلصت دفتر
لبست اسود مثل كل اليلبسون
ونويت احزن مثل كل اليحزون
علية شماله الاسود لعب الروح
وعليك انته شحلاته يجيب العيون
صح انتي جميلة وطولچ شمحلاه
بس عندچ غرور وخمشمچ شعلوه
أنصحچ هالتكبر مايفيدچ يوم
لأن أصل التواضع كمل الحلوة
ردت أكتب شعر بي تفرح العين
وردت غير الحزن والدمعة موضوع
وبديت آنه بقيصدة اتنگط افراح
ومن گد الفرح هم طاحت ادموع
إنحب ياوطن واگضيها آهات
وبعد لاتنخه ولدك مالك احد
صحيح اسلام ونحب الصلاوات
بس للأسف مانعرف محمد
شوصفك ياترف ياعسل ياشفاف
عن كل البشر متميز بميزة
الوادم من تسافر تختم وتأشير
وانته امريكا لجلك تدخل بفيزة
قرينه بالدروس غراب عطشان
حط اخوانه بالجرة وطلع ماي
وقرينه بالطفوف حسين عطشان
حط اخوانه كلهم ماطلع ماي
خطية شگد ابويه مصدگ بلير
وعد يبني الوطن ويشغله حارس
عشر اسنين نام وإگعد وشوف
تلگه الدولة بس تصبغ مدارس
چانت دمعتي ابعيني بت بيت
واضن حته الرمش مايدري بيها
هسه الدمعة ضلت كاضة الباب
الرايح واليجي يباوع عليها
كلمن مدلي چفه وكضلي اقليم
وعلى لوح الوطن مارسموا الساس
وهلگد ماتجر اچفوفهم بيه
شگوا خارطتنه وطاحت الناس
گدامك طحت ماشفت وجهك گام
هاك ابسط مثال وشوف وتصور
ولك خشبة بطبر فرگست چف حطاب
من شافت حطب گدامها اتطبر
من گد ما أحبك صرت دايخ بيك
صوتي اتغير ووجهي ونبض گلبي
والساني بعد مدري شجراله النوب
يمكن راح اصيرن أشبه اللمبي
ماگلك أحبك چي صريح اوياك
وانته البية عايش تعرف البية
إذا اگلك أحبك أنحسب چذاب
لأن مو مرة احبك لا900
اتحبني ماتحبني آنه اموت اعليك
ايعجبك مايعجبك هو هذا آنه
آنه من آنه أبطل لو لگيته بيوم
وي غيرك يسولف واگطع السانه
بوسة انطيني گتلك ماكفرت اشصار
گلت لامك علية وگبت الهوسة
حلگك بي اشكال انطيني خدك عاد
وچنك ماشفتني وماخذ البوسة
صاير جلد باب البيت وياك
مدري شلون يتحمل لزمتك
واحنه البيت يهتز لو تعديت
وناس بناس توگع من خطفتك
آنه ماشايف تره بعيني أكيد
وهايه عيني تشتغل بس عالرمش
هسه شفتك إي صحيح وگمت اشوف
ومن كثر ماركزت طاح الرمش
مايسوه البچي ولاتسوه الاحزان
ولايرهم الهم ودمعة العين
لو يسوه الحزن صدگني والله
چا عاشور رجع إلنه الحسين
من يمر رمضان حاول لاتصوم
إنته مو واجب شهر رمضانك
لأن بشفافك عسل داير عليه
يعني تفطر من تضوگ السانك
گبل الجدري بس اعله الجلد صار
بس هسه الضماير صابهن جدري
بميلاد ابن مريم تدري كلها الناس
وبمولد محمد كلها ماتدري
جميل انته بجمالك دوخيت الناس
وياهو الشاف شخصك صابته الجلطة
يمعود دخيلك روح طب للبيت
شفت دعوة عليك بمركز الشرطة
مرة الگمر شافك من طلعت بليل
ضل يحرگ بروحه وجر ألف حسرة
صفن صفنه اعله نفسه وگال مامعقول
أكو غيري حلو موجود بالبصرة
وين ماألتفت بعيوني تصير
ويمته ماأبچي على خدودي تصب
بعد شلي بعيني يالصرت انته عين
أخذ عيني وخل اشوفك بالگلب
آنه مال انساك أكبر مستحيل
بية كل دگة گلب تحتاجلك
وآنه ما أشتاگلك تدري انته ليش
لأن ماناسيك حته اشتاگلك
من تمشي وتدوس برجلك انته ترات
يطلعلك زمرد صافي من يلمع
هاي برجلك وهيچ التدوسه ايصير
إذا لحت التراب بشفتك شيطلع
مرهون بجمالك بس كسير اجناح
شفتك مرة وحدة وبعد ماعفتك
عينك ليل ظلمة ووجنتك تفاح
وشفتك ياغزال مطعمة بشفتك
كل عيد اليمر واجب أعيد الناس
واسلم عالحبايب واحدا واحد
بس انته سلامك يختلف عالناس
أشگن صدري ولگلبي اعايد
سولف گول الك واهس تضل وياي
واذا ماإلك واهس گول لاتخجل
ما أقبل أحبك وانته مامرتاح
وما أرتاح احبك وانته ماتقبل
آنه ماصدگت إنك خابريت
من طلع إسمك نفض جسمي نفض
وايدي مالحگت تفتح إتصال
اتخربطت وضعيتي وانطيتك رفض
شفت إبنك عطش فكيت باب العين
من ماي العيون الغالي شربته
ومن شفتك جعت ماچان عندي اطحين
عجنت ابني الزغير وچيمت بخته
من يوم الهويتك ماأفكر بيك
رغم شوگ البگلبي الصار الك وحدك
مافكر بشخصك مو لأن ناسيك
لأن ابيش افكر والعقل عندك
القناعة اتضيع مني امن التقي اوياك
وعيني لشوفتك ماعاد تكفيني
ولأن يرادلك عين بكبر بغداد
راح بإيدي اوسع خارطة عيني
أحبك مو مثل باقي اليحبون
مجنون وعثرله بخيط مجنون
إذا طيفك يجي أرميله چيلات
واذا إنته تجي شرميلك اعيون
إنته غير الناس عنهم تختلف
وماكو صورة تشبهك بكل الصور
الگمر يصعد للسمه حته يصير
وانته نزلتلك وصرتلها گمر
حبيبي العيد بعيونك والخدود
واذا تضحك شفافك ينچفي العيد
أريد اشرب شعر من هاي الشفاف
واصيح الله عليك وشفتك اتعيد
صحرة ومتانين ماتمطر شجاك
تدري عطشانين الك منذ الأزل
وانته رحمة ونزلت اعله امك وابوك
واعله هاي الفقرة ظيم الله نزل
أتنطر تجي وبس بيك اسولف دوم
والم اسنين عمري وبيك اطشرهن
يالعيونك خضر ورمشومك اتصب ماي
مو طلعت شمس ماتطلع اتشرهن
آنه لوگتلك أجي معناها جاي
وانته مامرة گلتلي وجيتني
مرة أذكر بالحلم گتلي تعال
واركض بنص الحلم خليتني
انموت فدوة ألمهم عمرك يطول
لخاطرك صار الچفن ملبوسنه
إنته تجرحنه ونگل للناس لا
الوطن مايجرح يريد ايبوسنه
عالسمه مو عالورق نكتب عراق
حته من نقراها نرفع روسنه
أريد اكتب شعر بوصافك ومحتار
شكتب عن اشفافك لو كحل عينك
إذا كلك حلو وبالوجنة نور ونار
يمكن من حليب الله خلق طينك
إذا رايد تسولف سولف بماعون
عسل كلمات ثغرك لاتبديهن
واذا دمعك نزل قارورة حط للعين
دمعاتك شذر مو كفر تبچيهن
اشهل بياض البيك شتسوي تعال
فوگـ هذا ولازم مراية بديك
عمي لو عدنه مثل وجهك حرام
انذب المرايات ونباوع عليك
واجب انبوسك إذا مرينه بيك
ايطبه طوب الخلفك لو مارضه
ايحطك ابيته ويظل قافل عليك
ومن وره الشباچـ ونبوسك قضة
أحبك ثم احبك ثم احبك موت
ماترهم أعوفك وانفرد وحدي
منو بگدي يحبك دور اتحداك
أمك لاچذب متحبك بگدي
لاتروح لأي عرس خايف عليك
ودير بالك لمن يعزمونك
الناس عطشانة شهر شربت بديك
خاف شربت ماكو ويشربونك
إگعد يافرح مارح ينزلوك
كافي من الملامة انفخت راسي
خطتنة هذيچ وحلها مكشوف
دومك إحتياط ومو أساسي
إتحقق حلمنه ورحنه كليات
گلنه نشوف بيها العالم الثاني
بس ماندري بيها تنفجر عبوات
وانحصل شهادة موت رباني
من اجروحك أنه الماچنت امِل مليت
وجبل شوگي تبايد ونهدم سفحه
ومن گد مافتحنه لغلطتك صفحات
بسجل اوراق حبك مابقت صفحة
فدوة اتوسلك لاتزعل اترجاك
ولو أدري بزعلتك آنه راح انذل
خل انذل اولي يطبني مية طوب
بس هيچ ابحلاتك كفر من يزعل
من طبعي امن اشوفك لازم ابچي اعليك
وانته تگلي إسكت حتى احظننك
شلون اسكت واشوفك وانته دمع العين
إذن أبچيك لازم حتى اشوفنك
تريد انساك چا عاوني أنساك
بشرط كون انته تظمن أنسه طاريك
گلت ماأحچي بيك گبال هالناس
گمت چي چذبوني وحلفت بيك
إنته مو مثل البشر لا مستحيل
إنته صح شكلك بشر بس يختلف
إنته أقوى انسان گدامك ضعيف
بنظرة من نظرات عينك يرتجف
شلون تعقلها آنه اعوفنك واروح
يالسكنت بروحي وبوجداني
مرة صاحوا بسمك وگلت آني ها
لو يگولون انته معناها آني
أحبك ماأحبك والله حرت اوياي
بيك آنه حرت وانته ولا چنك
ساعات آنه اگولن آنه احبك ليش
وساعات آنه اگولن ليش احبنك
متواعد اويه الفرح والوعد صار سنين
لامر عليه بحلم ولاشفته شوف العين
ناشدت وين الفرح گالولي متأسفين
ممنوع هسه الفرح عن العراقيين
تصح ومضة شعر تفرش دواوين
ويصح ديوان ما يفرش حصيرة
وتصح كومة زلم ماتسوه فلسين
ويصح مثلك أخو يسوه العشيرة
لاتدنگ عالذهب لو شفته طاح
هوه يخضعلك إذا شافك قنوع
وجوة تمثال الثلج لاتستراح
لأن بس تطلع شمس لازم يموع
ما أركض واطيح وبية اشمت الگاع
مو آنه اليطيح وكلمن يفوته
أركض بالعكس لو دار بيه الكون
أصير آنه اليهد والناس مشحوته
من گد ما أحبك بس اسولف بيك
وگمت بيك آنه اسولف حتى بالسكته
من سألوني شسمك تعرف شرديت
بسمك جاوبت حتى اسمي تيهته
گمت اغار اهواي من عندي عليك
وأي جزء مني عليك يعاني
ولأن يحچي اهواي وياك اللسان
گمت اسولفلك بدون الساني
شفناك وسكرنه بهاي شتگول
على هذا الأمر نتحاسب هناك
الله يساعد الصيام عالصوم
مفاطير وفطرنه بيوم شفناك
أحير منين ابوسك من الآگيك
ولو بيدي عليك امطر شفايف
أمس سولفت يمي وصار ما صار
مشيت وگمت ابوسن بالسوالف
إنتَه أكبر معجزة ودوّخت كون
ويلّي غصن البان من طولَك خجل
آنه ماشايف صبع ينگط حلاة
ومن يجيس الماي يتحوّل عسل
تگلب بالجريدة اچفوفها الحلوات
وذاك اليوم چانت قاسية اعلينه
مو زينة الاخبار الصادرة و مأساة
وبس كضتها كلها تحولت زينة
كلش مختلف ماتشبه الناس
وجمال البيك ما موجود بالكون
طاحت عيني بيدي بيوم مريت
ما شايف جمال ايطيح العيون
ماشايف جمال بهاي الاوصاف
شو كلك حلو وعيونك اوساع
آنه ادري الگمر بالسمه گاعد
معقولة الگمر نازل عله الگاع
إبعد لاتجي وتتقرب اترجاك
جمالك صاطع انته وخاف يأذيني
شافت شمس عيني وكلشي ما صار
وشفتك من بعيد وغوشت عيني
إذا من نضرة وحدة رجف گلبي تگول
وحبيتك گلت صرت انته خلاني
آنه من المهد مر علي طيفك گال
لو هذا التحب لو ما تحب ثاني
شفت الشمس غابت مدري شنهي الصار
بظهر الصيف احس الناس بردانه
لن وجهك حبيبي ضوه كل الكون
وغابت هالشمس ثاريها خجلانه
اقبل اي جرح بس جرح الاحساس
يظل ينزف عمر لو بشر داسه
ميضوج الورد لو داسته الناس
بس يضوج اذا الفلاح داسه
من طبعي شرس وتخاف مني الناس
بس منك اخافن من الآگيك
أشرد منك آنه واختل آنه اوياك
وتشرد بية إنته وبية اخليك
من شفت الدمع سايح عله الخدين
أصدگ ماأصدگ دمع بجفونك
طلع گلبك ثلج وانصهر من الشوگ
ذاب من الخجل واستقر بعيونك
من شفتك حبيبي ارتجت اعضاي
ومدري شوگع مني بگد حنيني
دخلت البيت دايخ راسي مسطور
دگ الباب واحد جاب عيني
دوس اعله الورد گام الورد ينداس
بس عطر الورد ماتگدر اتدوسه
يصح واحد جريمة من الوجه ينباس
وواحد عالرجل يستاهل تبوسه
يومية اعله مودك عركة آنه اوياي
واتعارك اوياي وأنذبح دونك
تعال بلا عيون انوب اذا مريت
لأن هاي الطلايب من وره عيونك
يالطعمك عسل ماترحم العطشان
ولو گطرة نده اشوي خاف من ربك
نصبك بستكان الچاي چاي اغروب
من كثرة حلاتك چاينه ايشربك
بعد ماسامحك واعذارك بفلسين
وجحا لتصير املك واكشف اليجره
ولا كل ساعة جاي بحجة البسمار
هاك الباب بيعه وفكني من شره
صح مرات اضيع بيتي والعنوان
بس هيهات اضيع يوم عنوانه
قوس القزح ولفي وفوگة ثمن الوان
يعني اخمصطعش مجموع الوانه
الساني شگد طويل يخورس الشيطان
ما وزني بحياتي ولاگدرلي بليس
بس وياك اصير حجارة عدها عيون
واخجل كالعروس بدخلت العريس
ليشوفك عمت عينه من ضواك
والمشافك عمت عينه شگد خسر
فدوة لاتطلع أخاف يفرهدوك
لأن مامنطين بالحصة شكر
مو من طين ذني خدود من جام
وطبع الجام يبقه شما تعب يلمع
أخاف من ارد ابوسك تطبع شفاي
وتظل شفتي اعله خدك بعد ماتطلع
ماشبهك گمر هو ايتشبه بيك
أم الگمر چانت بيك تتنسه
ومن گد ماحلو لمن تمر بالناس
تگوم تغني حته الوادم الخرسة
أكلني العوز اكل بس ماگلت جوعان
واكلت الساني كله ولاچته سنوني
صح اخرس صرت بس المهم مرتاح
ماكوا السان عدي يگلكم اطوني
بذاكرتي مسحتك واسمك انته انزال
وانسيت الغرام وتيهت دربي
وفجأة اذكرت وگليبي ظل يهواك
ثاري اسمك طلع مستنسخه بگلبي
حقي امن اختصر وياك بالشوگ
مو سهلة القضية وحيل خطرة
ضامي وخاف اخلصك من اصد ليك
لذلك گمت اشوفك گطرة گطرة
إجيت وغير گلبي البية موجود
دخيلك صحت ياستار ربي
من گد ماتشابگنه بالاوداع
أثاري تبادلن گلبك وگلبي
مانحمل شمس هنوب شمسين
صدگ نحترگ ونموت سكته
من هسه اتفق ويه السماوات
لو تطلع شمس لو تطلع انته
ماشايف گبل وعيوني عثرن بيك
واول ماوعيت عيوني الك صدن
شفتك مو بشر شفتك ضوه اعله الگاع
ومن تمشي الكواكب كلهن يسجدن
شاعر لو يوصفك يتعب هواي
لأن يحتاجلك فد ست دفاتر
ماشفت ابياضك آنه من حيث
الشمس من شافتك لبست مناظر
مريض ومايشافيني دوة الغير
واشفه من المرض لو ضگت سمك
من گد ماأسولف بيك للناس
نشدوني على اسمي وگلت إسمك
ليش ماشوفك لأن بيك آنه اشوف
وآنه ماحبك أموت آنه عليك
گام ياهو يشوفني يبوس بدي
مو لأن سيد لأن كضيت اديك
أگلك مو حلو بس هذا مامعقول
لأن تدري غلط وبهاي اظلمنك
إگعد بالحديقة وبين جوري وياس
أتيه بينهن واگعد واشمنك
إنته مو مثل البشر بيك اختلاف
إنته من توگف تحير الوگفة بيك
وظهرك يباوع على خصرك يگوم
ولو مشيت يذب حچي حلگك عليك
ليش متقصد تعل گلبي بهواك
وتدري أبچي الروح اذا شح الدمع
تريد تشلع گلبي فوت بكل قواك
آنه عندي گليب خاطر ينشلع
آنه شايف في حياتي المعجزات
وگمت اعرف الزين من عند الردي
بس امر حيرني خلاني أدوخ
عمي ماشايف گمر لابس بدي
خلي نگلب صفحة ونعوف اللي راح
هاي جملة نبيع بيها ونشتري
آنه ماعندي بعد صفحة وسماح
بكثر ماشگيت خلص دفتري
فدوة لله الناس گالت من تمر
دير بالك ياحلو لاتنحسد
عطرك اللي بيك احله من العطر
ومن يشمك يمكن يذوب الورد
انته بشر شفته اعله هذا الكون
حلو ماكو بحلاتك ذرة مملوحة
سكر من ابوسك خاف بية يصير
لأن كلمن يشوفك تنسحن روحه
إذا بيدك حجر لاتضرب الناس
عدها الناس إيد وگاعك احجار
واذكر بيتك المصنوع من جام
يعني حجارة وحدة يصير طشار
نخاف اعليك من اعيون الذياب
بوسط عين المحنة نضمك انريد
ياأول حزين بعالم الآه
من ارموش عينك نگط العيد
حاجز لاتخلي الباب فد يوم
من عين البشر لاتنحسد خاف
يبو وجه اليشع ياباب اليفيد
سور الصين لو خليته تنشاف
لاتجيب الوان واحمر للشفاه
ولاتلزگ ارموش ساعة وتنشلع
آنه من وجهك أحس رب الجمال
خالقك للناس قالب للصنع
على گلبي انكسر گلبي من الفراگ
وبچة گلبي علية وهم كسر گلبي
يعني الگلب يبچي والگلب مكسور
وانطبگن علية وتيهت دربي
آنه اللي أحبه مايحب الناس
ولهذا السبب دمعاتي مفضوحة
لأن اعشگت واحد دور بهالكون
ماشاف بحلاته رد عشگ روحه
حيرتني الدنيه هاذي
والله بالمگلوب تمشي
لليخون اتصير حمزة
وللي يوفي اتصير وحشي
نختنگ لمن علينه انته تغيب
إنته لو مريت نشتمك هوة
طالع من البيت تضوي من الصبح
شنهي عمي يصير متريگ ضوة
ماأدري شوگع من انته مريت
أباوع ماكو شي طايح علية
من گد ماحلو من شفتك تفوت
أثاري آنه الطحت ماأدري بية
ياأرق إنسان شفته بهالوجود
المايحبك ماأظن شايف عشگ
والله ادوخن وانسطر واحسدها حيل
شفتك اعله الشفة لمن تنطبگ
جمالك مو جلوس يوگف الناس
وتظل تنظر عليك بعين طماعة
بس گلي اعله قصتي الساعة بالباكيت
من شافت جمالك وگفت الساعة
الجمال البيك ما مثله جمال
وتدري منك غار بستان الورد
إنته ربك ميزك عن العباد
تطلع بتموز يكتلنه البرد
اكتبت عنك قصايد عدد شعر الراس
عفتهن گلت أكتبلك جديدة
بديت اوصف شفافك كملت بعدين
دنت نفسي وگبل بست القصيدة
شفت هوسة وبابي طايح والسياج
اشصار گلت ولنه واحد عايط
فات خلك گالي وبابك إجاه
ظل ورا يركض وجر الحايط
خذت گلبي من فاتت والعقل والروح
زغيرة ودوختني وخبطت الواني
ردت للبيت اطبن من فتحت الباب
گعدت ولنه طالع بيت جيراني
مو طبع الجبل ينجر بالحبال
ولا طبع الأسد يحتاج حارس
ومو كلمن ركب عالخيل خيال
ولاكلمن يشيل السيف فارس
صفت مثل المسلسل عشرتي وياك
وجزت حلقات من عدها كثيرة
وانه من الحلقة الاولى تولعت بيك
واظل اهواك للحلقة الأخيرة
داخوا بالحشر للجنة ماودوك
تتعارك عليك الشيعة والسنة
ودوك لجهنم بيها ماخلوك
خافوا من جهنم تنگلب جنة
عليك شگد اخاف شگد اداريك
حبيبي اتمنه داخل گلبي اضمك
إذا مو إنته بيها الدنيه شتفيد
ولك همزين ابوك اتزوج امك
دخفف من جمالك رجل ذب ايد
ذب شعرك امعود لادذب خصرك
بس تبقه حلو إي وحگ من سواك
لو مو تذب ايدك لوتذب كلك
صدگ كلش حلو وعندك حسن ماصار
وصدگ تكتل مشيتك من تلف خصرك
خل اسكت بعد ماداعي اوصف بيك
إذا شفتك تريد تبةسك بحلگك
من جمالك كلها وگفت
وآنه غامرني السكوت
لأن بس احچي بجمالك
يصعد السكر واموت
على اعيونك تصد وتشتكي الناس
چم فارس إجه وبرموشهن طاح
إذا صديت مو بس تصطر البال
إذا عالگاع تنظر تسطر الگاع
أمي ماتت بالمفخخ والدمار
گلت ماأدفنها خل تشبع هوه
هيه كل يومين ثالثها انفجار
متاني ابويه ايموت وادفنهم سوه
جيت اشوفك مالگيت بعيني شوف
الشوف گبلي اتعنه راح ايشوفك
ردت اعوفك ماشفت بيدي چفوف
لأن راحن چلبن بچفوفك
جماعة اتگول عنك مو بشر حاشاه
وجماعة اتگول حتما مو بشر حتما
واختلفوا عليك وبيك مايدرون
إنسان وملاك بواحد انجمعن
يا عيسى ابن مريم والله محتار
شريد اكتب عليك وابتدي منين
يبدي البشر نطفة وينتهي بموت
وانته اول بشر مامر بالاثنين
الشوارع من تمرها تصير كلها حلوگ
حتى تبوس جدمك من تمر يفلان
ليلية اعله بالي وأظل صافن بيك
عالحيطان ارسمك واشبگ الحيطان
ماأريدن يجهد السانك كلام
آنه أفتهمك إذا تهمس همس
اليوم ماشفنه شمس وكت الشروق
ليش ماتصعد تصير انته شمس
ياورد الأجيبه بمولدك يالون
ويالون اليناسب گلي وي عيدك
من جبت الورد شفت آنه موقف صار
الورد منك خجل دنگ يبوس ايدك
شعرك طار فوگ اعيونك الحلوات
واذا طگه الهوه يتلاعب بخصرك
يمكن ماي شعرك واعتقد شلال
واذا شعرك توصخ تغسله بشعرك
أحبك إنته احبك ماأحب الغير
واگلك غير حبك ماأحبن
كون آنه ببحر واتمنى أغرگ بيك
خاطر من اموتن بيك اموتن
أرد اسألك ياحلو وشهذا الجمال
گلبي من شدة جمالك بي هوس
يصير أمك بيك متنسية بغزال
واني بيه يصير متنسية بعدس
شوصفنك حلو مابيك ذرة عيب
وابدع بالخلق من صورك ربك
من گد ماعذب ماتشرب انته الماي
خاف الماي يطمع بيك ويشربك
صباح الخير اگلك واحنه نص الليل
لأن خدك ضوه وياليل اليسده
تسد عين الشمس لو فتحت تك عين
لاتفتح اثنين عيونك اتهده
عجوز من الصبح حطت جدرها يفور
ومنتظرة إبنها يجيب مسواگه
الساعة العصر دگوا عليها الباب
من لحمات ابنها انطوها علاگة
عذرا ماأمدحك خايف من الناس
وتدري الناس عدها حلوگ مفتوحة
ولأنك إنته روحي وخايف يگولون
شكثر مغرور هذا ويمدح بروحه
عقل عندي شتظن واتسودن اعليك
بقه بس عقلي هذا وجبته بالدين
أمشي بلاوعي واركض بالدروب
إجه مخبل سألني الخبلك وين
يالشفتك بحر وتروي كل عطشان
واليصفن بشفتك ينسبي سباية
الناس من العطش تركض وره الماي
وانته الماي يركض شربك مايه
جلست والخوف بعينيها
تتأمل وطن ماشايف الشافه
قرت فنجانه طلعت عبوة بالفنجان
طگ فنجانها وماتت العرافة
عليك الناس تحچي اشكال والوان
وتگول انته الذهب والذهب من ساسك
بعد بيمن نقارن لو نحط مقياس
نقيسك بالشمس وانته الگمر قاسك
من تمشي حبيبي تعـوذ الشيطان
بگلوب البشر خليت چـم علـة
جدمك بالأرض ماخلة أي نيشان
ولأن شفاف جسمك ما ترك ضله
إذا اگلك حلو چذاب اصير اوياك
وحلاتك بالوصف غلبت حلاتك
واذا شفافك عسل ومطعمة بنعناع
حظر تجوال لو طلعت لهاتك
أسجد من اشوفك واشكر السواك
خلي بماي شوگك روحي تتوظة
يل من طين واكفر لو گلت من طين
بس طينك ذهب ومطعم بفظة
إندفن كرسي الحكومة وگلنا نرتاح
وانه من الناس گلت ارتاح راسي
وصح زخت مطر بس مطرت سلاح
والكرسي ارتوى وخضر كراسي
يالجمالك غار مـن عنده الجمال
وبجمالك گلي هـم يحصل بشـر
بطن أمك من چنت متنسية بيش
رحمة للعبآس متنسية بشكر
من ماي الورد رب الحسن سواك
ومن جابتك أمك بيك ماحست
ولروعة جمالك عندي بس تفسير
أمـك بالنساوة بيوسف تنست
ما نگدر نوصفك حتى بالأشعار
جبل من نوصفك مانگدر نلوحك
لذلك جبنه ورقة وقلم وانطيناك
وانته براحتك ضل وصف بروحك
يالوصفك مدارس جيل يتبع جيل
وحسنك صار منهج حتى للروضة
خصرك درس اضافي وعالدروس امتاز
عفنه دروسنه وبس درسك نحفضه
إذا انته محب وياك عندي اعتاب
واعتبره طلب بس كون مترفضه
ومضت شعر حسنك فتت صحنه الله
صحنه الله غير تعيدها الومضة
غبت أيام عنچ مانشدتي شبيك
ولامرة اتصلتي وگلتي اشلونك
واظن كلبچ تغير وآنه احسن بيچ
أظن الياهو گوگل غير اضنونچ
نيوتن والتجاذب كلها هـاي اسرار
بس لغزچ يحلوة بإيدي مفتاحه
نزلت للأرض خجلانة حقها بهاي
شلون گبال خدچ تبقى تفاحة
يستحي ظلچ يظم روحه وراچ
وحقه ظلچ مـن جمآلچ لو خجل
إنتي لو نحلة عـرفتچ من زمان
آني أعرف النحل بس انتي عسل
سبحانه الجليل شلون من سواك
وانطاك الحسن واللولة ماهيه
ردت شوية منك بيه صار سنين
طابگ عالسرة وماتلتفت ليه
گيمر چنها شفتك والحلگ ماعون
والخد العليك تگول كاهيه
إلمن جاي يمي وآنه الك جوعان
جيتك هاي حرشة لو حسن نية
گالوا وصفوا عنك حچولي هواي
وگآلو كل حلو هم تلگه بي لولة
من شفتك شفت مابيك هلگد لول
بس عين التشوفك تنگلب حولة
چانت ليل يمنه وشفنه شمسين
البشر كلهم احتاروا بالجره وصار
وك چان احترگنه وهاي نارين
الحمد لله حبيبي خدودك صغار
فصلت البشر سويتهم تمثال
وانته الروح بالتمثال خليتك
حجر كل البشر بس گاموا يحنون
قطرة نطيتهم من بحر حنيتك
حبيبي بشفتك ما ابوس انوب
واذا بستك أگضي البوسة خايف
لأن شيكظها روحي وهنه جكليت
وانته شلون تبقه بلا شفايف
لا توصل الحينه الناس ضجت بيك
شارعنه اشتكالي وزعلوا الجيران
إنته شعرفك سلمت وتعديت
ماتدري وراك تطلگت نسوان
الدنيا لمت كل دولها
وبالشعر سوت سباق
وبس اجه وگال آنه حاضر
فاز عالدنيا العراق
دگ بابي مرة الفرح كلت شعجب غلطان
لو فاقد الذاكرة لو تيه العنوان
رد وسألني الفرح دليني بيت فلان
مرة بحياتي الفرح جاني وطلع سكران
طعم شفتك عسل والوجنة رمان
وتره روحي بغرامك حيل مجبورة
لأن طعمك حلو والناس حساد
لازم وي حلاتك تخلط مرورة
يالمهدر جمالك مثل چاي وهيل
وزن لامحترگ لافاهي لاشايط
أمس بيتك وگع والصوچ منك چان
اعله شيلة صورتك حايط ردم حايط
أنه بجيبي لحضرتك صورة ماشيل
أشوفك بيها من يشتد حنيني
أنه من اشتاگ امد ايدي على العين
أطلع صورتك من جيب عيني
إكتب ياقلم خل تشهد الايام
والتاريخ شاهد يبقى عالساحة
الثابت بالگلب ماينمسح للدوم
إلا الگلب نفسه يصير مساحة
من تمشي الصبح خل عينك اعله الگاع
لأن نظرات عينك تكتل ابنادم
واذا بالليل تطلع عمي طب بساع
أذا هيه الصبح وادمنه تترادم
عنك لورحت ماطوّل هواي
الرموش فراگهن حسبة ثواني
وامانة لغيري وجهك لاتراويه
واذا تشتاگ سولف وي مكاني
آنه أدري بروحي أسود مو حلو
وانته أبيض والحسن بيك اكتمل
آني صح اسود ولكني بلال
وانته صح ابيض ولكنك هبل
تره صرنه بغيابك مثل يعگوب
من گد البچي بعدك عمينه
واذا مابيك جيه ويوسف تصير
بس ودي قميصك لاتجينه
آني حبيتك غفل ماأدري بيك
وخاف ما تدري أزيدنك علم
الله كاتبلي أنام بهيچ يوم
تحلمت بيك وطلعت من الحلم
گمت اغمض عيني خاطر ماتشوف
لأن دوم عيوني يغويها النظر
وخاف من تشوفك اتخيل عليك
وتاخذك مني واموت من القهر
إنته شگد مميز والحلاة البيك
تغري اللي ينظرك تسحره بعينك
سنينك 16 ماواصل العشرين
شتذب من فلك لوزادن سنينك
فدوة لاتزعل إذا نسأل عليك
الدنيه ظلمة وحارة ومامش فجر
گلوب عدنه ومروحة وعمك فقير
وردنه نص امبير مـن خدك نجر
لأن إنته ورد نزعل إذا تنداس
وعليك نموت كلنه ومحد يدوسك
ولأن إنته حلو ونخاف نلزگ بيك
گمنه انرش عليك اميـة ونبوسك
الجائز والمحال انطبگن بدنياك
وحديت الجمال وصرت إنته الحد
يبوس الشفة خدك عكس كل الناس
وبعين اليشوفك حتى رجلك خد
طبع بالناس تلعب من يجي العيد
وانته العيد هوه اليلعب اوياك
وچذب مو صاك إنته الصاك تربيع
لأن لو شاف حسنك يفقد الصاك
يومية بحلاتچ عركة آنه اوياي
أسولف بيچ فني واوصفج فني
إذا لمن دخلتي قراية النسوان
الملاية فقدت گامت تغني
سألو هم تحبه وجاوبتهم حيل
أحبنك گبل لاينولد جدي
أمك من كثر گعداتي يم البيت
إنطتني ربع حسبالها مجدي
أطرد بالغزل يومية بالليل
يرد ويگلي تكتبني أريدك
أكره ذوله ليبوسون بالإيد
واحب روحي گمت من بست إيدك
حبيبي من تمر يتصدع الكون
والشارع يتيه بطوله وبعرضه
إذا ومضة شعر ما وضفتها شلون
صدگني من ابوسك تعتبر ومضة
تحياتي الكم حبايب
اتمنه عجبتكم الومضات
نراكم في موضوع
جديد
رد مع اقتباس
