درر العراق

الشاعر احمد الحيدري · 20/June/2014

كون وحدي ...كون ديرة بلايه ناس !!
حتى ما اسمع نميمة .. وحتى ما اسمع جذب
وكون بيدي اتصيرلي عصاة موسى ؟؟
وتلتقف حيات ربعي !!!
وبالمقابل ما اريد الدنيا يوسف ...حتى ما اصبح زليخا
بيها اشوف اجفوف ينزل منها دم !
اني رايد بس بساطة وبس وفه ..!
وبابتسامة الليل يخلص ...واكعد الصبحية اشوف اكبالي طيب
كون اعيش احساس واقع ... بي اشوف الدنيا حب
كون وحدي ..
وبس سبع جيران عندي !!!
جار الاول كون شجرة ؟
وجار ثاني بصفي وردة ؟
وجار ثالث حط فراشة ؟
وجار رابع صوت امي ؟
وجار خامس بيه سوي احساس شاعر ؟
وجار سادس خل نهر يمشي بهداوة ؟
وجار سابع بالنهر اخلقلي نورس ؟؟
وها يربي.. هاي يمك !!
انت انت اموصي سابع جار احفظة ؟؟؟؟
يا الهي ابكيفك انت وهاي يمك ...
دير بالك ع النوارس ....ودير بالك ع الورود !!
ودير بالك .. دير بالك
لتخلي ناس ؟؟؟
خلني وحدي .... وكون وحدي
كون عيشة بلاية ناس ...وكون ديرة بلاية ناس ؟؟
حتى اشوف بعيني حب ..حب حقيقي
موحب وكتنا الهسة صار ؟؟
كون اشوف الوردة من تحضن فراشة ...
وكون اشوف اذراع طالع من نهر حاضن النورس بديه ..
وحتى اشوف الشجرة عش ..
بيها من اوراقها اسمع صوت امي ...
هيج واقع كون اعيشة ،،،، وهيج واقع كون املكة ،،..خاطر اشعر صرت شاعر ..