هنا

[ملكةه]

مساء الخير
شلونكم ادري الكل سامعه وقاريه والاغلبيه حافظينه
بس حبيت اذكركم بـــــ غدا
وجزاني الله الف خير
ومااازعل من استهزء بموضوعي

باجر يسألونك وتتحاكم .... وين گظيت العمر يبنآدم
يا بنآدم التفت وأسمع الصوت
لاتغرك ولد وأموال وبيوت
شما تريد تعيش تاليهه تموت
وتدري ملك الموت مايتفاهم
باجر يسألونك وتتحاكم .... وين گظيت العمر يبنآدم
العمر يمشي وهاي ساعاته تنوب
وأنت يومية بأمل باجر وأتوب
شنهو رايك تحط لذنوبك ذنوب
ورايد احمولك بعد تتراكم
باجر يسألونك وتتحاكم .... وين گظيت العمر يبنآدم
الموت ماتعلم بيا ساعه يجيك
وحصتك تخلص بعد وشلون بيك
يصير گبرك بيتك وينسد عليك
وآه يا ظلمته من تتلايم
باجر يسألونك وتتحاكم .... وين گظيت العمر يبنآدم
الگبر بيت الدود وبوحشته يضيج
لا ولد وياك لا خل لا صديج
يبقه الك بس العمل هو الرفيج
وايده بيدك للقيامة ملازم
باجر يسألونك وتتحاكم .... وين گظيت العمر يبنادم
تنسأل عن اربعة بيوم الحساب
وانت يبنآدم شعندك من جواب
بالحشر وگفتك يم رب الأرباب
صعبة وأنت وياهه ماتتوالم
باجر يسألونك وتتحاكم .... وين گظيت العمر يبنآدم
عن شبابك تنسأل أول سؤال
بيمن ابليته يبن آدم تعال
جنت تمشي بطاعت الله وبالحلال
لوجنت تاخذ أعراض العالم
باجر يسألونك وتتحاكم .... وين گظيت العمر يبنآدم
والسؤال الثاني عن مالك منين
بيا وسيلة مجمعة وديته وين
قاسمت بالمال رب العالمين
لو جنت وي ابليس تتقاسم
باجر يسألونك وتتحاكم .... وين گظيت العمر يبنآدم
لون مالك منجمع من الحرام
اقره يبنآدم على الرحمة السلام
الله مايرحم الكل گلبه ظلام
الله يرحم ناسنه التتراحم
باجر يسألونك وتتحاكم .... وين گظيت العمر يبنآدم
ولو حلال المال يالمالك جثير
هم عليه تنسأل وكّبالك يصير
لايتيم انطيت منه ولافقير
ولا بفعل الخير مالك ساهم
باجر يسألونك وتتحاكم .... وين گظيت العمر يبنآدم
يابنآدم ثالث الأسئلة يكون
بيمن فنيت العمر وانگظه اشلون
على الظالم جنت للمظلوم عون
لو ويَه الظالم جنت تتسالم
باجر يسألونك وتتحاكم .... وين گظيت العمر يبنآدم
والسؤال الرابع يكطع النياط
وَيا أهل البيت عندك ارتباط
لو كلت ماعندي ...؟ تهوه من السراط
وراسك يظل بالصخر يترادم
باجر يسألونك وتتحاكم .... وين گظيت العمر يبنآدم
ولو جنت صك الولايتهم تحوز
عل السراط وشدته مأمن تجوز
ماتطب للنار بالجنة تفوز
حيث يشفعلك نبينه الخاتم
باجر يسألونك وتتحاكم .... وين گظيت العمر يبنآدم
آنه اقدملك نصيحه وأرد أكول
كونك تريد النجه بساعة الهول
على مصاب حسين واسيهه البتول
ودوم خلك حاضر بهل مآتم


باجر يسألونك وتتحاكم .... وين گظيت العمر يبنادم



مع دعواتكم لي

[زهور الجنة]

احسنتي اختي
وان شاء الله ما غافلين عنها
لانها اتية لا محالة

[nosha]

احسنتي النشر
وانشاء الله ما غافلين عنها

[ام فاطمه]

يسلمو عاشت الايادي جزاكِ الله خير

[muayad]

اللهم اقنا عذاب النار برحمتك يا ارحم الراحمين
احسنتي النشر