أنا الجندي المشمم بالمهد بارود
واحنه ازغار اخذنه اعله الفشك شمره
انا من انكل جدم توكع دول جواي
انا الجندي العراقي القائد الثوره
من اكولن ياعلي داعش يذب الثوب
كبل سواها جده وطلع العوره
انا من البس مرقط يطك ظهر الكاع
انا الشلت العراق اعله السلف شمره
انا من الداهمت خرمشت وجه الغيم
انا من الرفعت ايدي انشكت الكمره
ذيب ومن انام عيوني مفتوحات
انا ابن الجنوب وعصبت السمره
صح جندي ولكن صكر لو جليت
اذا مابيده صيده مايطب وكره
مجرب من فتت زتيتهم لسعود
اخذ هيجي زلم جفتت اعله الصحرا
تره الصوله الشفته اعله الفضائيات
من ذاك النصر ماطلعو كطره
الدليل بصفي اخوي انذبح مارديت
ايد تهوس وايد تحفر كبره
انا شماغ الجنوب وغترة ابن دليم
يسني يخوي ورغم كلهن ماخذت نظره
اعرفك ماتسويه وتخون الزاد
كضينه العمر خوة بلبل وشجرة
اذا تعطش بماي وجوهنه نرويك
جوعان..الجنوب نمده الك سفره
وعلي من حلك خوي اخمش خبز وانطيك
بس لاتنطي بيه لخاطر العشره
انطيني ايدك محلفك بالعزيز عليك
مو وكت المجافه ومنك اتبره
انا ابن الموصل وديالى والانبار
فزعتلي كبل لاتفزع البصره
عراقي وصوتي سيف واذبح اعله الصوت
مو كاطعلي شارع واذبح بشفره
اتغامز وي منيتي مغامز العشاك
اثكال وماغمزنه بيوم للشكره
اذا تنكث الجندي يطيح ملح الهور
من كثر مابنصه المرجله مخضره
انا من ارجع عدل امي شكثر تغتاض
ماريدك تكلي وجيت الكشره
مرضعتك مراجل حتى تحمي الكاع
شو رديت جنت بجبهه لو سفره
لا اطبلي بنفس طب لامك بتابوت
اريد ام الشهيد اتسمه لو مره
خيطت الجفن بيريه من طبيت
انا وي الموت زاد وكهكة فتره
الفشك ماعيب ماركيته بالشاجور
الفشك ركيته بالكافور والسدره
جيش الحر داعش القاعده التنظيم
كل هاي الحثاله وتسمع الزمره
كبل هاي الاسماء انتم عرب جا خوش
اريد اطلع اليوم كل حجي مدثره
منو البيكم نخاني ومافزعت وياه
كضيت العمر بظهوركم وزره
لهسه بالقدس نكهة عراقيين
وعلي انطينه زلم تستاهل الحسره
وحضرتك سوريا من طبت اسرائيل
ياهو الجاب كاعك جبهة النصره..؟
لون عنده حلك ويسولف الجولان
عبي صرنه لخواتك من مشن اسره
وع فكرة من رخصت وحدة الموضوع
للاسماء الكلته نوصل الفكره
( جيش الحر داعش القاعده التنظيم )
ابو فاضل طب اخيته وزمخ يهل الشام
الكد حجايته خل يوصل الحضره
رد مع اقتباس
