إلك والحيل حيلك يا شديد الحيل...
يا نجمة الغبشه الماطفاها الليل...
يا راية نشامه ابساعة الشدات..
لو رفت عزم تگبع وراها الخيل...
يا حال العجز منك ضعيف الحال...
هسه الحال حل والمن تريد الحيل...
ناسك... هاي ناسك...
عالدرب ماشين...
لا يبرد عزمها ولاجدمها ايميل...
صوتك... هذا صوتك...
صوت صاحب ذات...
تترتل نشيد وطبعك الترتيل...
يا گمگم مضيف اتگصدك الگصاد
يالريحك يهب گهوه وشهامه وهيل...
يا صاحب... صبور إعله الزعل وياك...
وما تنسه الوگف شاخص...
أبوجه السيل...
ولا تحتار...
الحيره مرض.. والماي من ايحير...
تبهت زرگته ويتناوشه الزنجار...
اليسبح عنده أمل وتلوح رجله الگيش...
والعاگه فطيسه أيشيلها التيار...
مد ايديك...
تجيك الشمس عد رجليك...
تسجدلك غصب وبرادتك تندار...
كتبولك شعر من چان فيـّك حيل..
وباعوك ابرخص من گصت بيّك النار...
گتلهم يجي!..
ومن خيبتي ايضحكون..
أطفه من الخجل منهم وأحس بالعار...
اسمك ينذبح بالدرب.. بالحانات...
ياخذهم عمى وكاساتهم تندار...
لو تدري ابجفاك ابهاي روحي اشصار...
غربه.. وليل خوف.. وصبر وآنه وحيد...
والنار ابدليلي ايشيل منها الجار...
لا تحتار...
أملني ولو ضاع الامل بالحيف...
واطلعني اعله سرك ولو كلي اسرار...
خاف تموت اديه ويذبل النعناع...
ويصك الثلج وانوب ارد احتار...
يا جرحي العزيز المايصلحه أزرار...
يا صاحب دمعتي من الزغر لليوم...
آنه لصوت منك الف فدوه أندار...
يا محنة محنتي.. ويا سمير الكاس...
بس بالليل تذكرني وتمر خطار..
لا تحتار...
بعده الماي مايك يا هدير السيل...
عيب السفن ذيچ ايسوگها الحدار....
ونته النوخذه النشمي وتشم الريح...
وبليل العواصف شيمتك بحار...
ولسه اكبر فخر... ما لاحني الوهواس...
عالي ابهيبتك.. والدون مني ازغار.
رد مع اقتباس