من غير نظره حسد هذا الوطن بصره
بيه راح تلكه حرز خير وبعد بصره
ممليه شوق وفرح واسمه الحلو بصره
لأبنه الفداله العمر وبصورته ذي قار
ذك الينتشل كل جرح ويصب عسل ذي قار
ياوطن صبح عنده بشكل ذي قار
كاع الشعر والادب وبكل محل ميسان
وجيلات اهلهه شكثر ظهر الظلم ميسان
معروفه ام الصبر بنت الوطن ميسان
ذيج الاهلهه وهلي عاشوا عمر ساوه
وغلطان ارضهه بارض كلمن اجه ساوه
لو مر علينه العطش تروي العطش ساوه
وشعلان ابنهه الفحل نيران اله ديوان
ابيت الاجانب كبل والسفر بيه ديوان
القادسية اسم بس السجل ديوان
يجمع اهل ديرته والحي يطالس حي
وما يوم كف كهوته ليل اليمر بيه حي
يا محله واسط بعد وشغز قضاء الحي
حين اعله درب نمر باطرافه لمن نجف
وننطي الدمع للوطن حد ما دمعنه نجف
دورنه كل الارض ما شفنه مثل النجف
والغاد منهه بعد كاع الذي كربلا
عاشور بأسمه شهد وشكد حمل كربلا
يا كاع مثلج حزن شافت يرض كربلا
ملعون سيف الكفر جي حارب العاصمة
والعاصي امام العصر لابد وان عاصمة
بغداد رمز الوطن هيه التضل عاصمة
اسم الوطن بالعرش محد وصل حله
وبان الحبل يالتضد ما ننهطر حله
تاريخ بيهه انولد ما تنمحي الحله
سرهه بدليلي انكتم ما ينفضح انبار
وعل الحصل بيهه امس من فاجعة انبار
مفجوعة بابل تضل تنزف على الانبار
بس تدري سيف الظلم هم ينثلم موصل
والسيف هذا الوطن سيف الغدر موصل
يا محله بيهه العشك ام الورد موصل
بكل وصله بيهه عسل بيهه الطعم تاميم
ما ينفصل حب هالوطن لا حشى تاميم
ينسر دليله بفرح كل اليطب تاميم
كل قلب منهه يود ويخاطبك ودهوك
وينطيك شدة ورد لهل العشك ودهوك
هذا الوطن بي شجر ويذب ثمر ودهوك
شجرتهه تنكط عسل والمصطفى والدين
وكصبات اهلنه شكثر كتبت كتب والدين
لأم العتابة وقرت بيهن صلاح ال دين
شما اصد انه لموطني من كل كتر اربيل
طيب وسعادة وفخر وابقة العمر اربيل
وبكيفي كلما احب امشي وازور اربيل
الكاهه بيت الفرح يهتفلي ديالى
واشافي القلب لو بيه صفه ديالى
نوراني خد الوطن من شجرة ديالى
فارس صبح موطني محد كدر جبله
ومادام حيدر علي بكاعة يضل جبلة
وي الهور واكف سوه هذا الوطن جبله
والجبل هم متصل وي نخلة البصرة
...........................................
رد مع اقتباس
