أذا رايد نجاة بيوم الحساب
على المظلوم أحزن وهمل الدمعه
لمصابه الرسول اليوم حزنان
وعليه ناحت الحور وتبجي السبعه
حسين الثورة صرخة بكل الاجيال
اصل الدين هوه وهوه فرعه
أسئل ليش ضحى بروحه وعيال
وبفلذت أكباده وجمع ربعه
لجل الدين واضح عدك أجواب
وعلى نهج الرسول ونهج شرعه
لكن للجواب نريد تطبيق
وعلى ما سار لازم كلنا نسعه
وذا ماكو حقيقه ومظهر أنصيح
اذن اعدائه صرنا واحنا بدعه
الحسين بلا غموض يريد تطبيق
ويرفض لو قضيته تصير سلعه
الحسين يريد نفهم شنهي الحسين
ونعوف التحايل ما نخدعه
الحسين يريد ربعه نصير كل حين
مو مره ويا غيره ومره ربعه
خل ينظر بوضعه اليندب حسين
وكبل غيره بحياد يشوف وضعه
لمنع منكر حسين يقدم ابناء
ونته شقدمت خاطر تمنعه
مع الريح انتمايل يمنى وشمال
ما يرضى الحسين يريد قلعه
الحسين يريد منا نصيح هيهات
لئن هيهاته واجب من نتبعه
من نرفع علم يعني احنا ثوار
ونحترمه العلم كون النرفعه
الروايا اتعلكت فوك البنايات
ظلمه الدنيا يعني الرايه شمعه
من عباس بيها الشاره نيشان
ومن اسمه اتعالى وبيها رفعه
كتب درس التفاني بعلمه عباس
ونطق سيفه بصوت وصرخ درعه
وهو ينادي بلسان الخوف عاداه
شرح دستور نصره الكل يسمعه
عن ديني احامي وافدي الروح
وهذا الجف هديه وسهل كطعه
وهاي العين فدوه العين لحسين
دم يسيل منها وموش دمعه
-------------
رد مع اقتباس
