الإهداء:الى سيدي ومولاي الإمام المهدي القائم
الحجة المنتظر عجّل الله فرجه بمناسبة عيد ميلاده الشريف
الجفاكم يا عذر عنده و حجه
حبكم بيت أطوفنّه و حجه
محمد قائم إو مهدي و حجه
اسمك بالضمير إيفيض ضيه
يمن جدك إلي منقذ و مهدي
أحبكم من زغر سني و مهدي
إمامي المنتظر إنته و مهدي
دخيلك آنه أول وآخريه
تره إحنا إخلافكم ضعنه وتهنه
الروح إبنوركم تفرح و تهنه
تحيه من الضمير إلكم و تهنه
نزفها من القلب صبح و مسيه
عمود إمثبت المايل ومعدل
حكمك بالوزن وافي و معدل
وحق من خالق و ماخذ ومعدل
نريد الفزعه يا حامي الحميه
جرد علينه الدهر سيفه ولبس لامته
مذخور يبن الحسن تحيي العدل لامته
ماتم صبر بالمحب اهل البغض لامته
چي لن غيابك بطه ماينجرع مره
يجرح الزمن بالگلب ماهاد اله مره
بجاه الله ياسيدي بلچن تمر مره
غيبتك طالت بعد يبن الحسن لامته
يالمحجوب عن العين ونته
على غيابك خفيه الگلب ونته
يبو صالح نحشم بيك ونته
حشاك انسيتنه يبن الزجيه
غيبه وطالت اعلينه شجاها
الضمايرنه الدهر سيفه شجاها
يبن الحسن هاك اسمع شجا ها
كلها اتصيح يا ثار الزجيه
وَعَد بيت الله يشهدها صلاته == بالحق والعدل يحكم صِلاته
على الباطل يشن حتماً صلاته == يفنيها إو يحل عدل الرعيه
مَتَه إيصيح المُنادي حيل بِسْماه == نشوفه إو نرتوي من طيب بَسماه
نصير إوياه بالأفعال بسماه == يقيم الحق أبو النفس الأبيه
أبد آني لغير الخير مَذْهَب == إمامي وإنتظاري صار مَذْهَب
والغايب إلي محبوب مُذْهَب == ذكر مولاي يمليها البريه
ما ناسي عدل يومك ولانه == خايف من أذى هذا إل ( ولانه )
إلَك يبن الحسن ثابت ولانه == نعيش إبشوق للطلعه البهيه
أمان المنتظر إلنَه وجوده == نِتْنَطّر ظهور الحق وجوده
نريد إنعيش بأيّامه وجوده == يروينه إبن حامي الحميه
عَلينَه الناصبي ظُلمَه تراها == وأنوارك عيوني هَلْ تراها
أحبابك يبو صالح تراها == تريدك ياشهم يبن الزجيه
اللهم عجل لوليك الفرج واجعلنا من اللائذين تحت لواءه الشريف
مبروك والف مبروك عليكم ولادة المصلح والمنقذ للعالم والكون والمدخر لتجديد الفرائض والسنن
رد مع اقتباس
