باجــر وين يوصل داعش بجنده // وعود أنكَوم نســـــــأل داعش شعنده
من العين الرماد أنمسح شفناهه // خلص تعوي الكلاب وجيشنه بوحده
والاجـــرام يســـرح يمرح بكَاعي // وماكو عين حمره أتوكفَّـــــــه بحدَّه
أجتنه جيوش ماتعرف شنو الاخلآٌق// أم وأب ميعرف عنـــــده ماعنــــده
كَلي ياسياسي ألّي تنفعه هاي // وأذا مالاحــــه حتمـــــا صعَّره الخدَّه
مايسلم شريف العنده غير اليوم // ولاتَّحــه الجبـــان الشـــــابك مخدَّه
كواسر عله الناس أتحوم تنهشهه // وبعد ماظــــــل مكان الخايف أنلبده
شكت لنبار للبصره أشجره عليهه // وبالفلوجــه جــرح جبيــر شيضمده
وصوت الموصل أيحشم بأهل أربيل// ياأهــــل الوطــن ياعُربــــــه ياكرده
وحوش الماتراعي لاعرض لادين // قســـم تتعشه بينه وقســــم تتغدَّه
سمعهه الصرخه أبن حسين والعباس // لكن للأسف كلهه أوكفت ضذه
خلَّه روس داعش بالجدم تنداس // وبدروب أنتصاراتــــــــــــــه زرع ورده
أبن حرَّه وخدرهه من الهوه محروس// ولو حسَّت بخوف تلـوذ يم سِــدَّه
أمّن ياعـــراق بولــد ملحاتــــــــك // ماتكَدر علينــــــه ذيابــــــــة الرِدَّه
رد مع اقتباس
