--50 ابو ذيه وابو ذيه--
{1}
اون ودمع عيني مايرنش-------ماجرن
صفن عوب النواظر ما يرنش- مايشوفن
عمه طير النوايب ما يره النش --نش الطير
شمنشنه يگف ويلوذ بيه
======
{2}
الزمن چم باب الي رده وسده
وبنالي عالفرح حاجز وسده
لون الزمن يطلبني وسده
واخلص من بلاويه عليه
{3}
يدهري شمغسل اذنوبك وشرهن
ترد بفعالك الوصخه وشرهن
رهنت اغطاي يادهري وشرهن
شلك عندي بعد تفتر عليه
{4}
المصايب دمرت حيلي وهدت
وناري ماغفت ساعه وهادت
الدنيه اتلملمت ضدي وهدت
ولتني ومحد يدافع عليه
======
{5}
عقلي انصاب من حبه وجن بيه
اسهامه طاحن بگلبي وجن بيه
وجها ما شفت مثله وجن بيه
الثلج والنار بخدوده سويه
{6}
تشور عينه من يگبل ويربي
يريته يسكن بگلبي ويربي
يجر بيه الكلب عده واجر بيه
فضحني وشمت العدوان بيه
{7}
عيوني اعله الدرب تنظر وتربي
بغيابه علتي تكبر وتربي
اخبرك بقه بدلالي وتر بيه
اخافن ينگطع ويعم عليه
{8}
گلبي من اثر هجرك ورم بيه
اطحن بالصبر گوه ورم بيه
سهمك نبت بگليبي ورم بيه------التاف بداخله
اذا اجره يجي گلبي بديه
{9}
هلي بالعز بنو عالي لبنهم
كريم ماصل وصافي لبنهم
الملوك تذل اذا يولد لبنهم
وتخاف الگاع من يحچي ابجديه
{10}
هلي امضه سواعدهم من السيف
المجد بيهم صعد عالي من الساف
هلي خطارهم ياكل منسف
الشجاعه والكرم عدهم سوي
{11}
هلي تاريخهم حافل ودونه
وكل تاريخ من بعده ودونه
اعدانه چي كرم عدنه ودونه
اذا نولي نعف من كل اذيه
{12
هلي لماذلت الواحد دولهم
هلي للهم يوصفوهم دوه الهم
هلي للحرب لو مشيو دوي الهم
تخاف الگاع منهم والمنيه
{13}
ششرحلك جفاك شعمل وشراح
ولا فرحه بغيابك بقت وشراح
ما تدري بجفاك شضاع وشراح
صرت احچي وي روحي من الاذيه
{14}
بله عمري وبعد هيهات ينحاك
الجبل تاليه من الريح ينحاك
يگلبي لاتطير يتعب ينحاك
صرت باخر عمر يا حيل بيه
{15}
يصاحب لا تظل محتار عالحار
التعود ما يفيده الفاي عالحر
الليالي من طبعه اتجور عالحر
وتصعد السفيه اعله الثريه
{16}
اعض اصبع واگولن اخ من اخ
من حيث المصايب اجن من اخ
زماني ما ركبته وسرت من ناخ
العرب وصلت وانه ابحش بالثنيه
{17}
يسالني ويگلي اعليك من جار
وهو بيده اخذلي الگلب منجر
جيشه عالگلب بالعين من جر
دمرني واخذ گلبي سبيه
{18}
لساني شلون طاوعني وحياه
غدر بيه غدر عگرب وحيه
امر مجبور يم داره وحيه
ياخذني الگلب غصبن عليه
{19}
حبيبي ما امل منه شمل بيه
ابد ماظن ورد مثله شم البيه
اذا يوم انگطع شملي شمل بيه
احسه كل هلي البعدو عليه
{20}
باثر هجره صفه گلبي وبه بيه ---وباء مرض
دروبه مقفله لغيرهوبابه
اريد اشكي الهوى لخاله وبا باه
ابوه الي منع وصله عليه
{21}
علي لا تسال شبيه ومالي
اخسرت عمري باثر هجره ومالي
صرت ناعور افرغ المي ومالي
احصل والاحصله موش اليه
{22}
عليمن تحرص اعله المال ينزال
ابنادم للارض تاليه ينزال
يطيب الجدم لوبالدرب ينزال
شيطيبه من تزل بيه المنيه
{23}
الزمن ما يوم بفعاله غواني
عفيف وما غون گلبي غواني
فقير وحالتي حالت غواني
مطخن راس مهما تضيج بيه
{24}
الناس اعله الكريم تزيد بالام--- اللوم
ياهو الخلداه المال بالم----بالجمع
الكريم الي يحط الالف بالام
على اگفوفه النعم گبل التحيه
{25}
يولفي انته الگلتلي انه وانه
انه ليلي اخلصه انه اوانه
انه بضيج وكلامك ان اوانه
اخافن بس حچي وتخون بيه
{26}
ولفي لچنت ازامط بيه ورجاه
غدر بيه وصرت للناس ورجه
ما اريد اعتذاره بعد ورجاه
ما سامح بعد لو باس اديه
{27}
يولفي من البچي اعيوني بها رك
حيث الروح وي هجرك بها رك
حنظل يا ولف اصبح بهارك
طعمك والصبر صارن سويه
{28}
يولفي وياي تتگلب الى ميت
احچي والحچي چنه الى ميت
بكل الي ياذيني الميت
شتجرب ياغدر ياولف بيه
{29}
حبيبي غامض بطبعه وسر بيه
يزعلني وارد ارضه وسر بيه
اذا مني اخذ گلبي وسر بيه
اتبعه لو مشه حد المنيه
{30}
اريد اشكي الهوى منك لخالك
تدير العين من تحچي لخلك
لون واحد انه غيري لخلاك
بعيد وما حمل منك اذيه
{31}
هم الي على كلبي يم هم
لون اعله البشر كلهم لعمهم
موش انته اهجرت منهم يعم هم
مشو وهمومهم ضلت عليه
{32}
الزمن ضيع جدم صبري ودرباه
وترس كاس الصبر گوه ودر باه
بحرهم چان الي صافي ودر باه
انخبط بالطين ضيعهن عليه
{33}
خيوط الفجر بانت والتحنه
العمر ولى يصاحب والتحن له
شتظن ينفع اليصبغ والتحنه
ومن يحدي العمر هم بيه جيه
{34}
سريت وما لحگت الضعن بسراك
وهل المره عرفت الحيل بس رك
على راسي الزمن ياحيف بس راك
گمت بس انهض يتچون اليه
{35}
الدهر يفتر عليه شله مني
حيث الجسد ناحل شله مني
يدهري مره وحده شيله مني
همك يادهر تلتل عليه
{36}
بچيت وما اظن بالعين ظل ماء
وعلى عيوني الظهيره اصبحت ضلماء
دشوف شلون هذا الزمن ضلمه
گمت امشي وتگود الناس بيه
{37}
يزقون العلم زقا بدرهم---- بالرضاعه
ابد ما غاب بالدنيه بدرهم
البغضهم ما اقيمنه بدرهم
الدرهم يعترض ويصيح بيه
{38}
على دين النبي بكل خير ماظين
وعلى اعدانه نصير اسيوف ماضين
ليحب اهلك رسول الله ما اظن
يطب للنار وتلوحه الحميه
{39}
ولي الله ابو الحسنه ونص بيه
النبي هارون گله انته ونص بيه
نص يلهج بسم الله ونص بيه
يتقرب للالاه بحب وصيه
{40}
بحق الحسين
روحك للشمس توؤم تبي الظل
اعداك الخسرت الجنه تبي الضال
ضحيت بعمر روحك تبي تظل
رسالت جدك تنور البريه
{41}
غريب ورحلتي مدري على وين
اخلص بالحزن ليلي على ون
نخيت انه ابو الحسنه على وين
يرد شمل الاهل ويعودبيه
{42}
يهل ماخذ معك روحي بها وين
شتظن تحمل بعد ونه بها ون
طحنت انه الصبر بيدي بهاون
ولهمته وخلصت صبر العليه
{43}
بعدك ياوطن گلبي وشرجاي
الدنيه اغروب تاخذني وشرجاي
اخبرك خيرها ولى وشر جاي
الدنيه شما زهت بالغربه اذيه
{44}
مدام الكمر بعد الليل يغراب
اذن لازم يردكم شوگ يغراب
شلك عندي تصيح بعد يغراب
صفيت وحيد شتصيح عليه
{45}
تمايل ما حمل همي وعى الهم----- وعاء
حيث من الگلب يصعد وعل هام
لچن شماتي امر بيهم وعلهم
وكابر ما اورجهم عليه
{46}
همومي اطفال تاذي الطفل لو ذاك
حرت مدري اسكت هذا لوذاك
يگلبي من الهموم لوين لوذاك
مدام الزمن متحزم عليه
{47}
العليه ما اظن عالغير مر هم
حيث انزرع بالحنجور مرهم
شتظن ينفع لعلتي بعد مرهم
اذا بالظلع كسر الخيل بيه
{48}
ذكرتك والدموع اعليك يارت
وهمومي من بعد عيناك يارت
انه چم دوب اگولن كون ياريت
حضي ينعدل وتحن عليه
{49}
بحر الزمن صافيلك وراكد
بالك لا تامنله وراه كيد---- ورائه كيد
چم طيب اجه يبحر وراه كاد
يغرك بالجرف ويبلعه ميه
{50}
زلگ درب التباهي ما يزلنه
من حيث النواظر ما يزنه
صحيح لما عرفنه ما يزنه
بتواضعنه تخطينه المنيه
{51}
اصبعي من الندم ورم وعض بيه
حيث الگلب ما ينفع وعض بيه
يريتچ يارجل عوجه وعضبه
مشيتي وي الگلب غصبن عليه
كلمات
ناصر اسماعيل الموزاني
رد مع اقتباس
