احنا مقبلين على حرب طائفية بدايتها الكترونية ونهايتها لا سامح الله في الشوارع أهم شي ما ننجرف خلف المنشورات والتعليقات الطائفية أهم شي قبل ما تكتب أي كلمة عد للعشرة وبطريقك بالعد تذكر بيوتنا شگد تتشابه طقوسنا لهجتنا والظروف الي مرينا بيها شگد تتشابه الحصار الي خلانا مثل عائلة وحدة انگطع عليها الكهرباء واجتمعت عاللالة كلنا اجتمعنا على لآلة الأمل وكلنا حلمنا بقوطية ببسي ونستله ما بيها تمر كلنا شفنا نفس الكارتون وحضرنا نفس المسلسل وسمعنا "يا ناس ارحموا بحالي" كلنا اجتمعنا بسفرة مدرسية كلنا دورنا بجيوب الملابس الشتوية مال أبهاتنا بلكي نلگه فلس زايد نفرحهم بيه كلنا حلمنا بطعم الموز ومقطاطة تقط زين كلنا شمينا نفس ريحة الدولمة بالبيت وماكو أحد منا ما ضاگ وحش الطاوة أمهاتنا تتشابه ولبسهم يتشابه واحنا لبسنا الزي الموحد نفسه الي ينباع بالسوگ نتشابه بلبسه همومنا تتشابه وبيوتنا شافت نفس الحسرة على الأسير ونفس العيطة على الشهيد وبالضبط هي نفسها هلهولة العرس وطمغات الحنة عالچفوف كلنا مظلومين وكلنا نحس احنا متهمين من يجي واحد يكتب على مدننا وانتماءاتنا بالشين المخالف يشبهك كلش يشبهك بس الفرق شكوكنا الي خلقته لازم نتحد احنا شباب العراق واحنا اكثر وعي من الي يريد يجرفنا للكراهية اجمل شي بينا المحبة العراقي طيب حيل طيب اذا جيت كلتله اعتذر وانت غلطان بحقه يشبگگ ويبچي دير بالك تنجرف استوعب وأتحمل واصبر واضغط على نفسك بس لا تصدگ ان اخوك العراقي يريد يأذيك لأن انت وياه طلعتوا من بيت واحد واحنا كلنا سوا بمحبة هالوطن ولازم نرجع نلبس زي العراق الموحد ضد الطائفية
رد مع اقتباس
