هنا

[عادل الابراهيمي]

بسم الله الرحمن الرحيم

السلام على صاحب السكينة
السلام على المدفون بالمدينة
السلام على المنصور المؤيد
السلام على ابي القاسم محمد بن عبد الله
ورحمته وبركاته ومغفرته ورضوانه

السلام عليكم ورحمة الله وبركاته ..

شلون تجري ومايك ازرك يافرات؟
وانته ذنبك مو ذنب يفطر سمه


تسابگت بالطف على حسين السيوف
ومايك اول سهم في صدره ارّمه


وطاح ابو السجّاد يم جرفك شهيد
إبين سيفين العدى وسيف الضمه


چان مايك احد من كل السيوف
أثّراعله حسين حيل اوو ألّمه


السيوف اعتنت تطلب دم حسين
وهاي حاسبهه الحسين بمقدمه


بس بنات المصطفى حرى الچبود
حسين حر وهاي للحر تلچمه


وعطش عبدالله التفرفح بين ايديه
گطّع گماطة ولعد مايك ومه


هاي وحدهه صارت كربلاء
عله حسين وكربله من الشرذمه


انا لو منك اودي ويلطيور
ماي خاطر منسئل ليش ولمه


لاچن انته تريد تذنب يافرات
وهاي ماتحتاج شرح وترجمه


انفرط عقد الدين وجروفك تشوف
وچان ممكن غرفه منك تلظمه


عطشيت الدين عن بكرة ابيه
وگطعيت چفوف سبع الموزمه


تدري لو مايك وصل يم الخيام
چا روه العباس منهم صارمه


وچان ما ردت رؤوس على الرگاب
وچان ردت خيلهم تگطر دمه


شلون يمك طاح عطشان الحسين ؟
وما ركض مايك ويم جدمة ارتمه


طاعت اسماعيل صحراء الحجاز
وانته شح مايك لابن حامي الحمة


ما اظن اسماعيل اكرم من حسين
وما اظن امه اِتِّقدَّم فاطمة


ذاك ابن نبي وسأل ربه الجليل
كيف تحيي الموته وترد قائمه


وهذا ابن حيدر علي سيف الرسول
المايهاب بدينه لومة لائمه


الگال لو ينكشف عن عيني الغطاء
مايزيد من اليقين الفاهمة


يافرات وتجري بعدك يافرات؟
المايشوف الحگ عسه بعينه العمه


كلهه ماتت خجل يا نهر الفرات
وانته آخر شاهد عله الملحمه


گوم طم روحك حدر گبر الحسين
واعتذر لله واطلب مرحمه


گوم واغسل مايك برمل الحسين
وخلي مايك يا نهر يتيممه


وشوف فرق البينك وبين الكرام
حسين شاف الدين عطشان لدمه


ضحه باخر قطرة من دمه الشريف
وظلت آخر قطرة ثورة وقائمه


حسين صافي واصفه من ماي الجنان
وانته مايك طين وجروفك طمه


حسين نبع الجود وانته اسمك نهر
ويا نهر للمنبع انطه وكرمه


حسين لو منك شرب چان ارتويت
وچا تشرف مايك ويلامس فمه


لكن انته الحظ عماك وتيهيت
وسوء حظك رادلك هالخاتمة

الشاعر الشهيد
رحيم المالكي
بغداد 1997

[بريق الماس]

قصيدة تموت راااائعه جداا
عاش ذوقك اخي

[شمس الشموس]

كلمات في قمة الروعه .. رحم الله الشاعر واسكنه فسيح جناته

تسلم الايادي على روعة الانتقاء

ارق التحايا

[QuRsAn Al7OoB]

قصيده رائعه شكرا الك استاذي الكريم

[حيدر الخزاعي]

اشكرك اخي العزيز على النقل الجيد
تقبل مروري
لك تقيمي

[علاء المكتومي]

اين ما تضع يدك تخرج بيضاء نقية تحمل اجمل السحر والعطر
بوركت اباليث وبورك مايروقك لانه يشبهك كانه توئمك فانت
وما تضع هنا وهناك من مشاركات اخوة في الجمال والذوق والرقة والعذوبه
والشاعرية والالق والسنا اللهم صلي على محمد وال محمد

[عادل الابراهيمي]

جزيتم خيرا احبتي لمروركم العطر..
برعاية الله وحفظه..

[qas!m]

شكرا لك كل الشكر استاذي العادل