انه ياصاحبي ماعندي وجهين
حته انزع وجه و الثاني البسه
ولا غرتني يوم امراية البيت
اوكف بالركن والزم اكلنسه
المظاهر ماتغير واقع الحال
البيه خير خل يعتز بنفسه
اليمد رجله اعله كد اغطاه موعيب
عيب اعله التندهه الصبح شمسه
نمت متعوب بس فزيت مرتاح
صار الماي حدري وكمت احسه
يسايسني الجرف وضحك عله الروج
عظم هدهد وعاند ومشي عكسه
انه ابن المارضت بكتارهه انلوذ
وبوي الماشبج خمسه اعله خمسه
وانه الوكت الشدايد صوتي ماضاع
وانه الماطلع للجار حسه
اكص اجدامي من تخونهه الكاع
وجوي جفوفي من اتصير نحسه
اليزرع طيب كالو يحصد الطيب
والفلاح يجني اثمار غرسه
لكن طيبتي خلتني ماشوف
واصدك كلمن ايراويني ضرسه
مهيه اتغالطت نبضات الكلوب
اذا يانبض منهن راح اجسه
الحقيقه اتكون مره ابعض الحيان
وبعض الورد يذبل من تلمسه
الحب ضاع وحنه الضيعينا
لان ماجنه نحترمه ونقدسه
وحياتك ماسهرت الليل بطران
ولا متواعد وشبعان ونسه
يمربيه الحجي المايطري عالبال
وتيه ابين صفنه اودمعه خرسه
قطار الذكريات ايودي ويجيب
ومحطات العمر من عدهه شنسه
لهسه اتسولف ابجرحي السجاجين
والنيشان بعده ابضهري لسه
ولو عشريني خلصن طيف جذاب
وثلاثيني ابتدن بضروف تعسه
مامعقوله ابقه اركض وره الغيم
حتما استقر والكالي مرسه
كفاني ازعل وسد الباب وغتاض
ورد افرش شليلي اعتاب اترسه
علئ كل حال الف الحمد لله
خذت حيفي وكسرت اعيون شرسه
علي شاطر ويحفظ كلشي عالغيب
قره اكتاب الزمان وحفظ درسه..
علي شاطر ويحفظ كلشي عالغيب
قره اكتاب الزمان وحفظ درسه..
رد مع اقتباس
المشاركة الأصلية كتبت بواسطة اخلاقي اساس حياتي
