مو ملحد .......
مو ملحد .......
أروع قصيدة قرأتها
مع اعتذاري للاخوة الذين ﻻيفهمون بعض مفردات اللهجة الشعبية العراقية .....
مو ملحد
واحب الله واعرفه بيا كتر موجود..
واندله
مثل حديثه تندل جرة الكحله
ودرب كلبه سهل بالضحكه توصله
ما عنده وجه مسدود....
ما عنده جهنم,
لا يعذب ناس
ولايحجي سوالف سود...
لليسهر غطه ونجمات
لليعطش نهر ممدود..
بي ريحة ندى البستان
وشايل طيبة المكرود...
ربي اللي ربيت وياه ورباني..
الضحكت بوجه من شفت السمه مناغاه,,
واخذني من ايدي مدري لوين وداني...
هذا (الله)الحجيت وياه وحاجاني...
(كلي اضحك وحب الناس تلكاني...
كلي بشوغة العشاك تلكاني
كلي بصفنة المظلوم تلكاني..
كلي بشيله اذا تشتاك كَلبها
تشوف آثار ذرعاني...
واذا تكره غصن شجره يشوكَ الروح
راح انساك واترجاك تنساني...
واذا تكرهني مالومك
ولاكرهك اذا حبيت رب ثاني..
كونك سالم ومرتاح
روح اتركني وآ نه وياك
افك سماي وابقه لجيتك متاني..
تريد تصلي متصلي ولاجبرك..
ليش تخاف من عندي؟
يصنع جفوفي ما كسرك..
ولا عذبك ولاذلك ولا هجرك...
تريد تعيش وحدك عيش
تريد تروح روح تريد
ترجع باقي منتظرك)..
هذا الله العرفته بشوكَ مال صغار
العرفته بخضرة الاشجار
العرفته بدمعه من احتار..
كبل لتشوهه بعض الناس
ويخلو يدور ثار..
ليش صار الله نتيجه؟؟
ورد فعل مقسوم حصرا لليصلي..
وبين جنه وبين نار..
ليش شوهتوا الحنين
الجنه خيمه من الندى بصيف الفقير
يغطي كلمن كلبه حار...
الله بالدنيا انتصار
الله دار وكاع للماعنده دار..
الله مشروع اختيار..
آنه ضد كل المعابد
والجوامع
والكنائس
من تخلي الله تجاره...
آنه ضد الدين من يربط عظمة الله بمناره
آنه ضد اول معلم
كلي اقره الفاتحه
وحصل بنيه ونهر من طعم الخمر طوله حضاره..
آنه اعلن انسحابي
من التقاليد القديمه
من التقاليد الحديثه
من الوجوه الكَالت الله يخوف وما تطفه ناره..
بيه حسره التشهك الدنيا جكاره..
ومن وراكم..
صفنتي ولايه
ووجع كَلبي قصيده
وجرحي يوسعله مغاره..
وك مخنوك..
احس الدنيا ما بيها سوالف شوك..
احس الوكت مثل الثوب ظل مفتوك
بديت اصفن واشك بالناس..
من شفت اليصلي يبوك..
من شفت التزور جفوف اديها حلوك
من شفت الله من وجه الطفل مبيوك
من شفت اليصوم يخاف من الماي
بس عيونه تاكل كل نثايه السوك..
رد مع اقتباس
