يظل منكُم مُرادي
مُـــرادي مُـــرادي === يظل منكُم مُرادي
أحبكُم مو بديّه === يَأولاد الزچيّه
يظل منكُم مُرادي
ـــــــ
فرحنه اليوم وإنهنّي نبينه
ولادة تاسع العتره ولينه
بزغ نوره أبو الهادي علينه
نهنّي فاطمه إو نفرح إجينه
أعــادي أعــادي === رغم كيد الأعادي
حفل نعقد سويّه === يَأولاد الزچيّــــــه
يظل منكُم مُرادي
ـــــ
ننادي المُنتظر ويّانه يحضر
نهنّيه إبجواد العتره الأطهر
فرحنه اليوم بِمحمّد يحيدر
نور إبن الرضا بالكون أزهر
ننـــادي ننــادي === شفيع إنتَ ننادي
محبّتكُم هويــّه === يَأولاد الزچيّه
يظل منكُم مُرادي
ـــــ
يباب الله يبو الهادي حفلنه
لجل عينك نقيمه اليوم إحْنَه
نريدك سيدي إتبارك عملنه
يظل مولاي بيكُم كُل أملنه
يشـادي يـشــادي === يطير الحُب يشادي
أنادي إبهل مسيّه === يَـــأولاد الزچيّــــــه
يظل منكُم مُرادي
ـــــــ
يريت اليوم بالحضره الزهيّه
يمّك ياشهم بالكاظميّه
نهنّي الكاظم إو سيد البريّه
نطش إورود ياإبن الزچيّه
يهـــــادي يهـــادي === فرُض حبكُم يهادي
تمنحوني الهديّه === يَأولاد الزچيّه
يظل منكُم مُرادي
ــــــــ
أريدك سيدي تحضر منيتي
وإبأيدك تناولني هديتي
لولادي تظل دايم وصيتي
أريدن بالذكر معمور بيتي
ودادي ودادي === عشگ روحي إو ودادي
يغيض الناصبيّه === يَأولاد الزچيّه
يظل منكُم مُرادي
ـــــــ
فرح هاليوم والسهره لطيفه
ولادة تاسع العتره الشريفه
يريت إيمُر علينه إنشوف طيفه
أبو الهادي يظل محظوظ ضيفه
مَعـــــادي مَعـــادي === تحضروني إبمعادي
وَحِل بيها العليّه === يَأولاد الزچيــــّه
يظل منكُم مُرادي
ـــــــــــــــــــــــــ ـــــــــــــــــــــــــ ـــــــــــــــــــــــــ ــــــــــــــــ
لشاعر اهل البيت / جابر النجفي
رد مع اقتباس
المشاركة الأصلية كتبت بواسطة زهور الجنة
