گالولك نساكوصدگتهم ليش ..؟
وانت الحذرتني وگتلي عدوانك
أشصار .. وشختلف ..؟ ، وانگلبت اﻵيات
بيهم صدگت .. وأنطيت برهانك
ذبولك طعم من حچوا عني وياك ..
حچايه وبالچذب .. بس باگوا لسانك
ما حاجه امنگلك آنه ماناسيك ..
ﻷن تعرف ابگلبي لهسه ماخانك
خوانك صفوا ..؟؟
ﻻ والنبي ايغشوك .. مثل خوان يوسف ذوله خوانك
ولك عدوان صدگ .. آنه اخاف عليك ..
يمشوك ابدرب ويضيع عنوانك
تعال وخل أذَكرك ماضي الك وياي ..
غفت چم مره روحي ابين ذرعانك ..؟
وتعال وخل أَذَكرك .. يمكن انت انسيت ..
شم عطر الوفه تلكاه ابقمصانك
وتعال وخل أَشَوفك بالگلب نيشان ..
من توصل لگلبي اتشوف نيشانك
ماذكرك بيه وﻻ حرف بالشوگ ..؟؟
وﻻ طبعات چفي الفوگ بيبانك ..؟؟
يا نهر آنه مايك وبجفاي اتضيع ..
صبخه وجرح گاع اتصير احضانك
تتباهه ابزرع وچفوفك اموردات ..
ابتعب اچفوف اديه وصار بستانك
على الباگوك روح و شمر الذرعان ..
چاحظي عليه امسرفن اردانك...
منقول
رد مع اقتباس
