الحرامية .... اين ذهبوا ؟
السلام عليكم
من المهن القديمة التي اندثرت هي مهنة(الحرامي)في مجتمعنا,,,حيث كان الحرامية ينامون نهارا ويعملون ليلا على الاغلب وكان هناك احترام للمهنة بينهم ,فكل مجموعة لها منطقتها الخاصة ولا تتجاوز على مناطق غيرها,,,,وكان هناك حرامية (خوش اوادم)لا يسرقون الا من الاغنياء ويوزعون ريع سرقاتهم على الضعفاء من الفقراء والمعدمين,,,,بل وصل الحال ببعضهم الى (رواية من احد العجائز) تقول:
* كان صالح ابو مهيدي ويصيحوله (صالح الحرامي)خوش رجال الله يرحمه,,مره اجا من يمي يمشي كتله_ ابو مهيدي جهالي يتامى وصار شهور ما ضايكين اللحم,,باوع بوجهي وهز راسه وراح وبعد ساعتين جابلي جيس بيه خروف مذبوح وذبه بنص الحوش وراح بلا ما يكول كلمة!!
ورواية لاحد شياب الطرف يكول :
*جانت الوادم من يجيلها خطاب على بنية يكلولة - بوكلها بوكه !! مو على مود البوك لكن على مود يتطمنون على مستقبل بتهم انطوها لرجال حتى يكدر يبوك وما يخليها تحتاج
واخر يقول :
*جانت شغلة الحرامي مو كل واحد يكدر عليها بس الرجال السبع
وبغض النظر عن الجرم المرتكب في عملية السرقة شرعا وقانونا ,,,كانت مهنة الحرامي رائجة فمنهم من تخصص بسرقة المواشي من القرى والمناطق المتطرفة في المدن - ومنهم من كان متخصصا بسرقة الدجاج - ومنهم من كان يسرق الطيور ومنهم من كان يسرق البيوت ويحمل ما فيها من اثاث ثمين ومتاع ( ما خف حمله وغلا ثمنه )ومنهم من كان يسرق بضائع التجار من الخانات والمحلات -
وكان الحرامي يحمل عادة سلاحا ما يتراوح ما بين الخنجر والمسدس والقامة ويتلثم بلثام يخفي وجهه لكي لا يتعرف اليه احد وينتعل حذاء مرن باسفل مطاطي لين( كيوة او حذاء رياضي )ويحمل معه كيسا قماشيا لجمع الغنائم وحبلا يتراوح طوله حسب المهمة التي ينوي القيام بها وربما حمل معه ايضا عدة لخلع الابواب والشبابيك من الدرنفيسات والجواكيج أو هيم (تايليبر )صغير لتسهيل المهمة التي كان يخطط لها ,,,
وربما استعان بزميل له او عدة زملاء لتأمين السلامة والمراقبة وحمل الغنائم والى اخره من المهام التي تصعب على الشخص الواحد
وتفنن الحرامية في اساليب السرقة باستخدام الخدع المبتكرة وحتى الظريفة منها حيث ورد عن بعض الشياب قوله ( اثنين حرامية متفقين اجو على محل صايغ واحد وكف قريب المحل والثاني انتظر الصايغ ديعزل فقبل ما ينزل الكبنك اجا وضربه على ركبته للصايغ ,,فالصايغ عاط بيه ولحكة ولزمة وضربة شجم جلاق وبينما هو ملتهي بيه الحرامي الثاني دخل المحل واختبى وره الاثاث بعدين الصايغ قفل المحل وراح,,,,والصبح اجا يفتح المحل مالته اجه الحرامي الاولاني وهم ضربه على ركبته بعد ما رفع الكبنك والصايغ تخبل ولحكة ولزمه وشبعة بسط ,,,الحرامي الي جان بالمحل طلع وفلت من غير ما يشوفه الصايغ ,,,رجع الصايغ وهو عصبي باوع لكة المحل مالته فارغ ما باقي بي ولا وصلة ذهب)
والقصص هواي بتفانين الحرامية الها اول ما الها اخر ,,,,بس جانت مهنة والها ناسها وحتى الها من يشتري المسروقات مثل سوك الحرامية (وره السده)الي جان معروف والبايع يكول بايكهن والشاري يدري بيه سوك الحرامية,,,,,,,,,,,والكلام يطول وما اله نهاية
سؤال واحد بقى يتردد بذهني بعد احتلال العراق وحلول النظام الديمقراطي الجديد (الحراميــــــة وين راحو؟؟)اشو ما بقى هسه منهم ولا واحد؟معقوله تابو؟لو انعلسو؟خلي انعلس شجم واحد خو مو كلهم؟ يجوز محبوسين؟لو صارو بغير مجالات عمل من ضمن اختصاصهم وربحها هواي وما بيها مسائلة قانونية؟؟
على كل حال ارجو من كل واحد منكم يعرف لو سامع يكليوين راحو الحراميــــــــة!!
رد مع اقتباس
المشاركة الأصلية كتبت بواسطة مواطن تعبان
