كان يا ما كان جنه ام وجهال
ام عظيمه وما يتعبها الزمن
اكبرنه بس ما نشعر بطعم الامان
الا يم الوالده ام اجمل حضن
امي يا امي يابيت اهلي الجبير
اصفى كل كلوبنه واجمل واحن
امي بالماعون لو مدت الايد
نعمة الله تفيض بكتار الصحن
امي دمعتها بكبر نهر الفرات
وثوبها الاسود امطرزها بحزن
كلب امي بكبر خارطة العراق
يلمنه كلنه بلا فضل وبلا منن
وامي من تبتسم احلى امن الصباح
وامي ضحكتها مثل جنة عدن
امي بكرة خيط وتلفنه بحنان
والخيوط بغيرها يتخلبصن
امي لا تقرا ولا تكتب ابد
بس تحب الشعر تتذوق الفن
ماقرت امي القران الكريم
وحافظه اياته في ما انزلن
امي ايمان ووفه وصوم وصلاه
امي من يوصلها خايف يطمئن
امي تعبت لمن سوتنه رجال
وامي رجليها علينه اتفطرن
امي طول العمر مرفوعة الراس
عيونها ليفوك ابد ما دنكن
واذكر امي دنكت من مات ابوي
والشعر شيب والضلوع انحنن
مسا المبارك يالبوجهج تلوح
الماء والخضراء والوجه الحسن
عندي حظنين وسواهن ماريد
هن حضن الوالده وحضن الوطن
رد مع اقتباس
