زاعلتك ، لأن حسنك گصه اوياي
لگيتك بالزعل ، انت احلى بهواي
سلامك من تمر نگاط الحبوب
صيف ،او عالبرودة اتطيب الفياي
تتجادح اعيونك غنج ، مو غيض
مثل شمس الغروب التطفه بالماي
من ظهرك تديره الدنيا تندار
او تدب بالراس نشوة او تخدر اعضاي
واظل اتأملك وانعل الشيطان
واصيحن آ.. يضيمي اوعظم بلواي
وارويها او ترد عطشانه العيون
وظل اغرف ابحسنك ، رايح او جاي
واحب حتى ارتباكي من احاچيك
اوياك اتلعثم ، اويه الغير حچاي
هم شايف مراية اوالها وجهين
من وجه او ظهر تعكس خطاياي
مو چنها الك ، متوحشة المتون
واتمنه ارد لحظتها لصباي
من چنت ابوكاحه اصعد للعثوگ
او هسه الخطوة ضيم ،امشيها بهداي
او تحب اتغيظني اتسمعني فيروز ؟
حتى اشتاگلك ، ماتنفعك هاي
او لتدزلي عتب ، وتوصّي اليجون
بلياه انتهي ، اشحاله بلياي
ادع الله يطوّل زعلي وياك
بوي اشگد حلو ، بالزعل .... بويااااااااااااااااي
ـــــــــــــــــــــــــ ـــــــــــــــــــ
رياض الركابي
رد مع اقتباس
المشاركة الأصلية كتبت بواسطة جرح الزمان
