هواجس حب في كيه
جلس مقابلها...
هواجسها ..
تباوع لي صفح , ما تستحي شويه
تره مو عيب الغمز, بس متروسه عبريه
اعيوني مو زرك, بس احلى بشويه
اكبار و عسل, اعتقد كحليه
مو من داعش آني و لا آني صدريه
شيعي ابويه و امي سنيه
خوالي كورد و اعمامي فيليه
من جوه الخصر افكاري شيوعيه
و من فوك الخصر ملتزمه دينيه
سيارتي بيها عطل و مجبورة بالكيه
دقلات و فيك و العاب سحريه
مترهم وياي ,و لك آني عراقيه
اغطك بالنهر و ما شربك اميه
متبرعه آني الك, ابوسه هوائيه
و لو تنتحر يمي, ما تحصّل حقيقيه
مضيك عليه الوكت و محرومه حريه
اعمامي كثر, و بشبه منطيه
كللبي الك دك و رجف ,من غمزتك ليه
ما اكدر اصرّح , و البيك هم بيه
------
هواجسه...
اباوع الج صفح و كلّي حسن نيه
ويالحلوات مالي جنص ,بس شوف مكضيه
سيد و اشوّر , و ام امي علويه
خريج و مثقف و احلامي ورديه
فقير و مستلك , و مو ابن بنيه
نظراتج الي ,جدحات ناريه
ضحكاتج قلع , و مرّة يساريه
افكارج الجوه الخصر,افكار ثوريه
افكارج الفوك الخصر ,تغطيها بوشيه
ما ادري انت من الجنوب ,لو انت شاميه
اصغيرة طلبتي ,بس بوسه فرنسيه
من كل كللبج اطيها , اعتبريها عيديه
ابراءة نبتدي , بكعدات وديه
ما يصيرن بالعلن ,نخليها سريّه
همسات من الكللب مليانه ,و اشواق عذريه
لا تنسي انتي الوعد ,و بالعجل يا بنيه
نبديها بهوائية , و ننهيها بحقيقيه
امّج لا تحس , تره تعلكها هجوميه
تراها تنزّل للطشت قوات بحريه
تعززها بمشاة و تسندها جويه
مهجة ما الي للحرب الدفاعيه
من العوام نكطع عشرين بالميه
تخفيضات انت الج و من الخمس معفيه
اخاف اعليج من الهوه و من عجّه شرجيه
ذكرى و معجونة بالنفس كعدتنه بالكيه
تبقى جوّه بالكللب , و بسوات محميه
صدكيني دصدكيني , يا حلوة يا حنطيه
هواجس السائق....
د اطلعني اوباما , شبيك الزكت بيّه
ترمش لي من بعد , عبالي سمتيه
عل اليمنه تطلع, ما تخفف شويه
عدادك يعد ,فوك الميه هم ميه
ستوته على اليسره , حاططلي لطميه
عربانة مطي بصفها ,و سايبه عجميه
تحولّت من دك النجف , و اشريت كوريه
شويه تخرخش بالنكر ,و بدروب فرعيه
صدرها مو قوي مثل السويديه
بس اغراضها متوفرة , و ترغبها التنكجيه
تراني ,للحب ما لي وكت و محتار بالكيه
حسين ج. الحسيني
5/ نيسان /2014
رد مع اقتباس
المشاركة الأصلية كتبت بواسطة جرح الزمان
